Wăl krah Ƀuôn Hô, čar Dak Lak mâo êbeh 100 êbâo čô, hŏng 25 djuê ana hrăm mbĭt hdĭp mda, hlăm anăn mâo giăm 31% jing mnuih djuê ƀiă. Hluê ngă hdră bruă lehanăn hdră mtrŭn djuê ana, hlăm 5 thŭn êgao, wăl krah Ƀuôn Hô mkŏ mjing leh 20 gưl đru kčĕ, hưn mthâo bruă mă, ba giăm 3 êbâo čô mnuih nao mă bruă ti ala tač êngao, mkrah wah ênoh anăn jing mnuih djuê ƀiă. Mkŏ mjing 27 adŭ mtô bi hriăm bruă kơ giăm 1 êbâô čô mnuih mă bruă krĭng ƀuôn sang jing mnuih djuê ƀiă ƀun, giăm ƀun. Dŭm thŭn êgao, wăl krah Ƀuôn Hô mâo mkăp 20 êklai prăk čiăng hluê ngă dŭm hdră duh bi liê kơ anôk bruă nah gŭ ti dŭm ƀuôn, msir mghaih klei kơ sang dôk, lăn dôk, lăn pla mjing, êa yua kơ dŭm boh ƀuôn dleh dlan lehanăn đru bi hriăm bruă kơ phung êdam êra.

Êlan klông mlir wăl krah dưi bi kjăp, jih jang mnuih dưi yua pui kmlă lehanăn êa doh. Hdră kriê pioh lehanăn mđĭ lar dhar kreh dưi mđing duh bi liê. Hdră mkŏ mkra anôk bruă kđi čar mguôp hŏng bruă mjuăt bi hriăm klei thâo kơ phung knuă druh jing mnuih djuê ana mâo mđing. Y- Cing Mlô, Kơiăng khua Anôk bruă sang čư̆ êa wăl krah Ƀuôn Hô brei thâo: Wăl krah lŏ dơ̆ng iêu mtrŭt djăp klei găl mâo mơ̆ng gưl dlông truh kơ alŭ wăl mđing duh bi liê mđĭ kyar bruă duh mkra – ala ƀuôn kơ dŭmalŭ wăl krĭng mnuih djuê ƀiă.

 “Hlăm wưng ti anăp, Anôk bruă sang čư̆ êa wăl krah srăng mđing pŏk ngă bruă phŭn hlăm hdră mtrŭn mơ̆ng Đảng, Knŭk kna djŏ tuôm kơ hdră bruă djuê ana hlăm wưng ară anei, duh kơ anôk bruă nah gŭ, bruă duh mkra – ala ƀuôn čiăng mđĭ hnơ̆ng hdĭp mnuih ƀuôn sang. Mđing mđĭ kyar bruă duh mkra – ala ƀuôn, ktrâo lač kơ mnuih ƀuôn sang ba yua kdrăp mrâo čiăng mđĭ hnơ̆ng mâo boh mnga, hnơ̆ng tŭ jăk mnơ̆ng dhơ̆ng. Mđĭ hĭn bruă răng mgang klei êđăp ênang ala ƀuôn”.

Mâo čar Kon Tum ruah ngă alŭ wăl phŭn, kdriêk knông lăn Sa Thầy mkŏ mjing tŭ dưn leh Klei kƀĭn phung bi ala mnuih djuê ƀiă tal IV thŭn 2024. Kdriêk knông lăn Sa Thầy, čar Kon Tum mâo ênoh mnuih êbeh 54 êbâo čô, hlăm anăn mnuih djuê ƀiă êbeh 57%, kdriêk mâo 11 să, wăl krah hŏng 64 alŭ, ƀuôn hlăm anăn mâo 45 ƀuôn mnuih djuê ƀiă. Hluê ngă Hdră ngă bruă lehanăn klei gĭr ktưn mơ̆ng Klei kƀĭn phung bi ala mnuih djuê ƀiă tal III kčah mtrŭn, 5 thŭn êgao, dŭm djuê ana hlăm kdriêk bi hgŭm mguôp, gĭr mtrŭt mđĭ kyar bruă duh mkra – ala ƀuôn.

Truh ară anei, êlan klông mơ̆ng wăl krah kdriêk truh kơ dŭm să lehanăn 64 boh ƀuôn dưi mkra kjăp, rơ̆ng klei găn êrô hlăm yan bhang lehanăn yan hjan, jih gŏ sang hlăm kdriêk dưi yua pui kmlă ala čar, mâo anôk bruă mdrao mgŭn djăp hnơ̆ng čuăn; kdriêk mâo 5 să djăp hnơ̆ng čuăn krĭng ƀuôn sang mrâo lehanăn mâo 1 să djăp hnơ̆ng čuăn krĭng ƀuôn sang mrâo kdlưn hĭn, 7 ƀuôn dưi tŭ yap jing ƀuôn krĭng ƀuôn sang mrâo mơ̆ng mnuih djuê ƀiă. Bi ala mnuih djuê ƀiă êdi mnuih djuê ana Rơ Măm nao ti anôk bi kƀĭn, A Thái, Khua bruă Đảng, Khua ƀuôn Le, să Mô Rai, brei thâo:

 “Nao ti Klei kƀĭn phung bi ala mnuih djuê ƀiă kdriêk Sa Thầy tal IV thŭn 2024 kâo mơak êdi. Hŏng bruă klam jing Khua bruă Đảng ƀuôn, khua ƀuôn kâo ba akŏ hlăm bruă mtrŭt mjhar mnuih ƀuôn sang mđi kyar bruă duh mkra, pla mjing kñăm mkra mđĭ klei hdĭp. Boh nik hluê ngă Klei klah čŭn 08 mơ̆ng bruă Đảng čar bi mlih klei mĭn, hdră ngă hŏng mnuih djuê ƀiă lehanăn lui dŭm klei bhiăn amâo djŏ mơ̆ng hđăp đưm. Nao ti knăm anei, dưi êmuh hriăm lu klei thâo, gru hmô jăk mơ̆ng dŭm ƀuôn, să mkăn čiăng mơ̆ng anăn tui hriăm lehanăn ba yua hlăm klei hdĭp.

Ti Klei bi kƀĭn phung bi ala dŭm djuê ana ƀiă kdriêk Sa Thầy tal IV, phung bi ala tĭng dlăng leh boh tŭ hluê ngă Hdră bruă djuê ana lehanăn klei gĭr ktưn mơ̆ng Klei bi kƀĭn tal 3, bi mklă klei gĭr ktưn mơ̆ng Klei bi kƀĭn tal 4 hŏng mta kñăm bi kjăp klei hgŭm mguôp dŭm djuê ana, mđĭ klei thâo mnuih mă bruă djuê ƀiă, iêu mtrŭt djăp klei găl mâo mơ̆ng kdriêk čiăng ngă bruă; kriê pioh lehanăn mđĭ lar boh tŭ yuôm dhar kreh djuê ana ƀiă… Klei kƀĭn ruah leh 22 coco bi ala nao ti Klei kƀĭn phung bi ala mnuih djuê ƀiă čar Kon Tum tal 4 thŭn 2024.