Hdră hŏng tač êngao lehanăn ñŭ kma tar rŏng lăn kơ phung knuă druh mniê amâo djŏ knŏng mkăp kơ phung amai adei dŭm klei hâo hưn kơ hdră êlan hŏng tač êngao mơ̆ng Việt Nam hlăm boh klei mrâo; Klei bi mjĕ mơ̆ng dŭm ala čar hlăm tar rŏng lăn lehanăn klei hmăi truh kơ Việt Nam; Hdră mtô mblang ênuk mrâo lehanăn ba yua kdrăp mrô mrâo; Dŭm klei kčah mtrŭn hlăm hdră tŭ drông, mkŏ mjing klei bi kƀĭn, kƀĭn trông lu ala čar djŏ tuôm kơ bruă hŏng tač êngao… kbiă hriê mơ̆ng dŭm bruă klă klơ̆ng mđĭ klei thâo săng mơ̆ng phung knuă druh mniê.

Ti čar Sóc Trăng, bruă ksiêm dlăng, tĭng dlăng kñăm mđĭ klei thâo săng mơ̆ng êpul knuă druh, mnuih mă bruă Anôk bruă sang čư̆ êa dŭm să, hlăm anăn mâo knuă druh mniê mnuih djuê ƀiă, mjing klei sa ai mơ̆ng mnuih lehanăn êpul hŏng klei mă bruă mơ̆ng dŭm anôk bruă knŭk kna, đru mkra mđĭ mrô bruă mkra mlih klei ngă hră m’ar jing bruă brei hluê ngă nanao đrông. Mơ̆ng dŭm gưl ksiêm dlăng, tĭng dlăng đru leh kơ knuă druh êpul mnuih mă bruă gưl să, boh nik jing phung mniê mnuih djuê ƀiă bi mklă klei đua klam, mơ̆ng anăn bi leh jih bruă klam mâo kčah jao. Amai Phan Thị Lầu, Knuă druh Adŭ bruă – ksiêm yap, Anôk bruă sang čư̆ êa ƀuôn hgŭm 2, Wăl krah Ngã Năm, čar Sóc Trăng brei thâo:

“Kâo ƀuh jih jang knuă druh, mnuih mă bruă ară anei hluê ngă jăk bruă pô ti phần mềm sa ƀăng bhă hluê hdră online. Kyua anăn, dôk čiăng phung knuă druh, mnuih mă bruă thâo săng klă kơ tin học, raih klei ba yua kdrăp mrâo čiăng hluê ngă bruă anei”.

Mđĭ klei thâo phung knuă druh mniê đru kơ phung mniê đăo knang hĭn kơ pô, jhŏng ñŭ kma hŏng tả rŏng lăn. Ti čar Phú Yên, lu alŭ wăl hlăk lehanăn dôk mđĭ lả bruă klam khua kiă kriê mniê mŏng dŭm gưl bruă, đru mkŏ mkra anôk bruă kđi čar kjăp kluôm dhuôm. Jing Đảng viên, lu thŭn ngă Khua Êpul bruă mniê să Sông Hing, kdriêk Sông Hinh, alŭ wăl mâo êbeh 90% jing mnuih djuê ƀiă, amai K’So H’Vỹ mđĭ lar nanao bruă klam kiă kriê, mtô mblang, mtrŭt mjhar mnuih ƀuôn sang hluê ngă jăk hdră êlan mtrŭn mơ̆ng Đảng, hdră bhiăn mơ̆ng Knŭk kna lehanăn mđĭ kyar bruă duh mikra gŏ sang, mkra mđĭ klei hdĭp kpưn đĭ tlaih kơ ƀun.

“Êpul ăt mkŏ mjing dŭm gưl bi mjĕ mjuk ti alŭ, ƀuôn, hluê hŏng anăn čiăng kơ amai adei hlăm êpul thâo klă klei čiăng mđĭ kyar mơ̆ng grăp čô amai adei mniê.

Hŏng hdră êlan mguôp hŏng bruă čuăl mkă ruah knuă druh mniê, boh nik knuă druh mniê mda asei mâo klei thâo, đĭ kyar, kdriêk Sông Hinh hluê ngă leh hdră bi mlih anôk mă bruă hlăm phung knuă druh mguôp hŏng klei đua klam, kriê dlăng mơ̆ng Khua bruă Đảng să hluê ngă dŭm klei kčah mtrŭn hluê Hdră mtrŭn mâo ba mdah. Trương Thị Thu Hà, Khua bruă Đảng să Ealy, kdriêk Sông Hinh brei thâo:

“Hmei mâo klei mđing dlăng čiăng mjuăt bi hriăm mbŏ.Boh nik, dưi bi mlih anôk mă bruă ăt jing sa klei găl čiăng kơ hmei lŏ thâo hĭn kơ bruă nah gŭ mơ̆ng anăn mđĭ hĭn klei thâo kơ pô.

Nguyễn Bá Kim, K’iăng khua Anôk bruă mkŏ mjing bruă Đảng čar Phú Yên brei thâo:

“Dŭm gưl bruă Đảng, bruă sang čư̆ êa alŭ wăl lehanăn dŭm anôk bruă ăt mđing truh kơ hdră čuăl mkă. Hluê hŏng hdră čuăl mkă mơ̆ng êpul knuă druh mniê, boh nik phung mniê mnuih djuê ƀiă nao hgŭm hlăm hdră mjuăt bi hriăm. Mđĭ klei thâo hlăm hdră kriê dlăng”.

Čuăl mkă hnưm, mjuăt bi hriăm djŏ hdră, jao bruă djŏ hŏng klei thâo mguôp hŏng ai tiê gĭr ktưn mơ̆ng phung amai adei mniê, klei thâo mơ̆ng phung knuă druh mniê ti krĭng čư̆ čhiăng, krĭng mnuih djuê ƀiă čar Phú Yên klă sĭt dưi mđĭ lar lehanăn ba wĭt klei tŭ dưn hlăm hdră mđĭ kyar bruă duh mkra – ala ƀuôn ti alŭ wăl. Anei jing klei găl čiăng kơ knuă druh mniê mnuih djuê ƀiă mđĭ klei thâo kơ hdră hŏng tač êngao, ñŭ kma tar rŏng lăn./.