Tơdah ênai čing ti Sang dhar kreh alŭ M6, să Vĩnh Hoà, kdriêk Vĩnh Thạnh, čar Bình Định kwang ăt jing hlăk êpul tông čing mơ̆ng ƀuôn anei bi kƀĭn. Êpul tông čing alŭ M6 mâo djăp gưl thŭn, phung khua thŭn wăt phung mda asei mnuih Bahnar. Ară anei, alŭ M6, să Vĩnh Hòa dôk ngă Mta bruă mrô 6 kơ klei Răng mgang, mđĭ lar ênoh dhar kreh djuê ana jăk siam mơ̆ng dŭm djuê ana mguôp hŏng mđĭ kyar hiu čhưn ênguê hlăm Hdră kñăm ala čar mđĭ kyar bruă duh mkra- ala ƀuôn krĭng mnuih djuê ƀiă leh anăn krĭng čư̆ čhiăng. Alŭ M6 kƀĭn răng mgang leh anăn mđĭ lar ênoh dhar kreh djuê ana pô, êdah êdi jing mđĭ kyar dhar kreh čing čhar mguôp hŏng klei kdŏ čhoang djuê ana Bahnar. Grăp mlan, leh klei bi kƀĭn, phung mâo kơhưm ti alŭ M6 lŏ bi kƀĭn phung êdam êra hlăm alŭ mtô bi hriăm klei tông čhing.

Y Khoa, 69 thŭn, mnuih Bahnar ti alŭ M6, să Vĩnh Hòa, kdriêk Vĩnh Thạnh jing đảng viên mâo kơhưm ti alŭ wăl anei. Hlue si Y Khoa, hŏng mnuih ƀuôn sang M6, ênai čing čhar kwang jing klei bi knăl êđăp ênang, wăl bi mkŏ yang hŏng êpul êya.

 “Hmei gĭr djă pioh leh anăn răng mgang kơ knhuah dhar kreh djuê ana drei boh nik knăm mơak čing čhar, kdrăp tông ayŭ djuê ana. Čiăng mđĭ lar dhar kreh djuê ana snăn phung khua mduôn mâo kơhưm brei hâo hưn mtô mblang, mtrŭt mjhar phung mda asei. Dŭm knăm mơak snăn brei tông čing čhar. Phung thâo tông brei lŏ mtô bi hriăm, ngă jăk klei mđĭ lar dhar kreh djuê ana drei”.

 Alŭ M6, să Vĩnh Hòa, kdriêk Vĩnh Thạnh mâo hlăm brô 60% jing mnuih Bahnar, klei hdĭp mda dôk jưh hlăm bruă mkra mjing lŏ hma, rông mnơ̆ng. Hlue ngă hdră kñăm ala čar mđĭ kyar bruă duh mkra- ala ƀuôn krĭng mnuih djuê ƀiă leh anăn krĭng čư̆ čhiăng, wưng êgao kdriêk Vĩnh Thạnh đru leh hdră duh ƀơ̆ng kơ gŏ sang, đru masin kơ đa đa gŏ êsei mnuih ƀuôn sang. Đinh Văn Hảo, Khua alŭ M6, să Vĩnh Hòa, kdriêk Vĩnh Thạnh brei thâo, čiăng kơ dhar kreh mnuih Bahnar dưi răng kriê, grăp čô đảng viên brei bi hmô ba anăp hâo hưn, mtrŭt mnuih ƀuôn sang djă pioh klei jăk siam djuê ana pô. Grăp mlan, leh dŭm mmông bi kƀĭn ti sang dhar kreh alŭ M6, êpul tông čing srăng mtô mnuih ƀuôn sang klei tông čing. Hảo brei thâo, đảng viên, phung mâo kơhưm ba anăp tui hriăm hŏng phung êdam êra, ktrâo lač kơ phung hđeh tui hriăm phung nao êlâo.

 “Grăp blư̆ bi kƀĭn hŏng mnuih ƀuôn sang mtô lač nanao kơ mnuih ƀuôn sang mđĭ lar knhuah dhar kreh djuê ana pô. Hŏng bruă klam đảng viên snăn kâo pô ăt msĕ si phung hlăm ƀuôn sang bi mguôp hlăm grăp gŏ sang hâo hưn mtô mblang kơ mnuih ƀuôn sang, ya klei digơ̆ ka thâo săng snăn hmei mblang kơ mnuih ƀuôn sang thâo kơ boh klei ăt msĕ mơh klei bi dôk ung mô̆ mơ̆ng mda.”

Kdriêk čư̆ čhiăng Vĩnh Thạnh, čar Bình Định jing alŭ wăl ngă jăk dŭm bruă hlăm Hdră kñăm ala čar mđĭ kyar bruă duh mkra- ala ƀuôn krĭng mnuih djuê ƀiă leh anăn čư̆ čhiăng. Mơ̆ng hdră anei, klei hdĭp mda ai tiê, mnơ̆ng dhơ̆ng mnuih djuê ƀiă lŏ dơ̆ng mkra mlih, ênoh gŏ êsei ƀun hrŏ lu, hdră duh mkra ala ƀuôn nah gŭ dưi bi liê, bruă mtô bi hriăm mâo lu klei tŭ dưn jăk, bruă kriê dlăng klei suaih pral mnuih ƀuôn sang ƀrư̆ jăk hĭn; knhuah dhar kreh dŭm djuê ana dưi răng mgang leh anăn mđĭ lar... Đinh Tiêu, Khua adŭ bruă djuê ana kdriêk čư̆ čhiăng Vĩnh Thạnh brei thâo, ti kdriêk mâo 31 čô mâo kơhưm. Phung mâo kơhưm đru mguôp leh lu snăk hlăm klei mtrŭt mjhar mnuih ƀuôn sang hlue ngă hdră êlan mơ̆ng Đảng, hdră bhiăn knŭk kna. Anei ăt jing “kngan mkŏ” hlăm bruă bi grăng, msir mgaih klei amâo thâo bi djŏ, bi mmiă lăn ala mơ̆ng mnuih ƀuôn sang ti alŭ wăl. Hlue si Đinh Tiêu, phung mâo kơhưm mbĭt hŏng bruă sang čư̆ êa mtrŭt mjhar mnuih ƀuôn sang myơr lăn mkra êlan.

 “Tơdah hlue ngă hdră kñăm krĭng mnuih djuê ƀiă, jih bruă kđi čar hrăm mbĭt pŏk ngă. Phung mâo kơhưm, đảng viên ba anăp hlăm bruă hâo hưn mtô mblang msĕ si klei bi dôk ung mô̆ mơ̆ng mda leh anăn bi dôk anak amiêt awa, klei djă pioh leh anăn mđĭ lar dhar kreh krĭng mnuih djuê ƀiă ăt msĕ mơh mtrŭt mjhar mnuih ƀuôn sang hgŭm hlăm hdră bruă mkra mjing. Phung mâo kơhưm, khua dlăng bruă Đảng, khua alŭ đru gưl să, Anôk bruă gĭt gai gưl kdriêk pŏk ngă mkŏ mjing hlue ngă mguôp hŏng anôk bruă nah gŭ, mkŏ mjing dŭm hdră bruă mđĭ kyar bruă duh mkra krĭng mnuih djuê ƀiă”.

Kdriêk Hoài Ân mâo 3 să krĭng čư̆ čhiăng Ðak Mang, Bok Tới, Ân Sơn jing anôk hdĭp mda mơ̆ng lu mnuih djuê ƀiă Bahnar, H’Rê. Wưng 2021-2025, kdriêk Hoài Ân hlue ngă Hdră kčah, mkŏ dăp hơĭt kjăp mnuih ƀuôn sang ti dŭm să krĭng taih kbưi anei. Mơ̆ng phŭn prăk hdră kñăm ala čar mđĭ kyar bruă duh mkra- ala ƀuôn krĭng mnuih djuê ƀiă leh anăn krĭng čư̆ čhiăng, kdriêk Hoài Ân mkŏ mjing leh wăl mnuih ƀuôn sang T6 (Ƀuôn mrâo Đak Bok), să Đak Mang. Wăl mnuih ƀuôn sang anei dôk hlăm Hdră bruă tal 2: Hdră kčah, mkŏ dăp, hơĭt kjăp mnuih ƀuôn sang ti dŭm anôk čiăng êdi hlăm Hdră kñăm ala čar mđĭ kyar bruă duh mkra – ala ƀuôn krĭng mnuih djuê ƀiă leh anăn čư̆ čhiăng. Hdră bruă anei mphŭn rŭ mdơ̆ng mơ̆ng thŭn 2022, truh ară anei klă klơ̆ng bi leh leh anăn mprăp jao kơ Knơ̆ng bruă sang čư̆ êa să Đak Mang dăp anôk dôk mrâo kơ mnuih ƀuôn sang. Nguyễn Xuân Phong, K’iăng Khua Knơ̆ng bruă sang čư̆ êa kdriêk Hoài Ân bi mklă, bruă mkŏ mjing wăl mnuih ƀuôn sang ƀuôn Đak Bok, Đak Mang đru msir mgaih klei čiăng lăn dôk kơ mnuih ƀuôn sang, hnưm hơĭt klei hdĭp mda:

 “Boh sĭt klei đru mguôp mơ̆ng phung mâo kơhưm hlăm êpul êya mnuih ƀuôn sang bi êdah klă mngač hlăm bruă pŏk ngă hdră mđĭ kyar bruă duh mkra ala ƀuôn leh anăn hlăm dŭm hdră bi hrŏ ƀun hlăm krĭng mnuih djuê ƀiă. Anăn jing hdră mkŏ čiăng kơ Đảng, Knŭk kna leh anăn bruă sang čư̆ êa alŭ wăl bi tuôm hŏng mnuih ƀuôn sang, Mơ̆ng phung anei, dŭm bruă dleh dlan mơ̆ng alŭ wăl srăng mâo phung mâo kơhưm ruh mgaih hŏng klei hgŭm mơ̆ng dŭm anôk bruă sang čư̆ êa alŭ wăl”.

 Grăp thŭn, Anôk bruă djuê ana čar Bình Định mkŏ mjing dŭm adŭ hriăm mjuăt, mbŏ klei thâo kơ phung mâo kơhưm. Đinh Văn Lung, Khua Anôk bruă djuê ana čar Bình Định brei thâo: Knơ̆ng bruă sang čư̆ êa dŭm kdriêk ăt pral mkăp klei hâo hưn, mtô mblang hdră bhiăn kơ phung mâo kơhưm, klei thâo bruă hâo hưn kơ phung mâo kơhưm.

 “Ară anei čar Bình Định mâo 21 să hlue ngă Hdră kñăm ala čar mđĭ kyar bruă duh mkra- ala ƀuôn krĭng mnuih djuê ƀiă leh anăn čư̆ čhiăng. Bruă klam phung mâo kơhưm hlăm mnuih djuê ƀiă nao hlăm bruă hâo hưn mtô mblang mnuih djuê ƀiă hlue si Hdră mtrŭn mrô 1719 anei snăn bruă klam phung khua mduôn jăk snăk. Tơdah Anôk bruă djuê ana čar Bình Định ăt msĕ mơh dŭm dhar bruă hâo hưn mtô mblang ti krĭng mnuih djuê ƀiă snăn phung khua mduôn mâo ƀô̆ mta sơăi, hmư̆ hdră bruă, boh phŭn, boh nik hlăm 10 hdră bruă leh anăn dŭm hdră bruă đơ điêt leh anăn bruă mkăn”./.