15 čô knuă druh, lĭng kahan krĭng 6, hlăm knơ̆ng bruă kahan čar  Gia Lai, alŭ wăl 5) pral hwai êmiêt jih mtih sang klưh, bi mdoh mkăm mčah rai, mkă atur, lehanăn klei kuai atur sang pioh mdơ̆ng sang kơ amai Trần Thị Lợi, ƀuôn hgŭm Phù Mỹ, čar Gia Lai (êlâo dih jing să Mỹ Quang, kdriêk Phù Mỹ, čar Bình Định). Đại úy Đỗ Xuân Nam pô nga bruă kđi čar, pô kiă kriê kahan răng mgang krĭng 6 brei thâo, hŏng 15 čô knuă druh lĭng kahan mâo tiŏ nao đru mnuih ƀuôn sang, sĭt nik êpul lĭng kahan srăng rŭ mdơ̆ng sang bi leh êlâo kơ hrue 31/1/2026.

“kahan alŭ wăl V jao leh bruă knuă, kiă kriê êpul lĭng kahan mơ̆ng anôk bruă răng mgang, kăp đru kčĕ bruă mbĭt hŏng knơ̆ng bruă kahan čar nao đru rŭ mdơ̆ng sang kơ mnuih ƀuôn sang êlâo kơ Tết Nguyên đán. Bruă Đảng anôk bruă răng mgang krĭng 6 yap anei jing bruă kđi čar yuôm bhăn, đru mdơ̆ng brei sang kơ mnuih ƀuôn sang hŏng klei pral, čiăng kơ mnuih ƀuôn sang hơĭt klei hdĭp mda, ba klei jăk mơak lehanăn h’uh mđao kơ mnuih ƀuôn sang.”

Hlăm gưl êa lip prŏng leh êgao, sang amai Trần Thị Lợi êa ngă rai jih; 3 tôn mdiê, mbĭt hŏng tivi, hip êăt, lehanăn lu mnơ̆ng yua mkăn êa mđung jih. Leh klei êa lip, knŭk kna đru 60 êklăk prăk pioh kơ amai Lợi lŏ mdơ̆ng sang mrâo, mâo lĭng kahan pô rŭ mkra brei. Amai Trần Thị Lợi mgei ai tiê, kyua mâo lĭng kahan đru ñu mdơ̆ng sang, amâo mâo uên kơ mđiă hjan:

“Êlâo hĭn kâo mâo klei lač jăk kơ phung lĭng kahan lu snăk đru leh kâo mdơ̆ng sa boh sang mrâo pioh dôk, čiăng kơ phung anak kâo mâo anôk dôk, hriăm hră mơar.”

Võ Trọng Đàng, ti ƀuôn hgŭm Hoà Thịnh, čar Daklak (êlâo dih dôk hlăm să Hoà Thịnh, kdriêk Tây Hoà, čar Phú Yên hđăp), ăt tuôm hŏng klei êa ngă klưh rai jih pưk sang, ngăn dŏ leh mjut mjing mkuôm pioh hlăm dŭm thŭn leh êgao, bhiâo riâo rit êa mđung mđuĕ jih. Gŏ sang ñu dôk hlăm ênoh mâo klei knŭk kna đru mdơ̆ng brei sang mrâo, mâo lĭng kahan đru rŭ mdơ̆ng. Dlăng phung lĭng kahan răng mgang krĭng Tuy Hoà amâo mâo mđing kơ mđiă hjan, hrue mlam dôk mă bruă, Võ Trọng Đàng mgei ai tiê lač;

“Mơ̆ng leh mâo khua knŭk kna mtrŭt mjhar klei bi đru rŭ mdơ̆ng pưk sang kơ mnuih ƀuôn sang, snăn phung lĭng kahan nao rŭ mdơ̆ng brei leh p\ưk sang kơ mnuih ƀuôn sang. Msĕ hŏng hmei, grăp hrue mâo nanao êbeh 10 čô lĭng kahan dôk mă bruă rŭ mdơ̆ng, ară anei mâo mkra leh kdrêč atur sang.”

Angĭn êbŭ mrô 13 lehanăn klei êa lip prŏng nga jhat rai leh jih ƀhut truh 1.653 boh sang lehanăn ngă klưh truh 39.462 boh sang hlăm 4 boh čar Gia Lai, Daklak, Lâm Đồng lehanăn Khánh Hoà. Leh ruĕ klei êa ngă, khua knŭk kna   Phạm Minh Chính mâo leh klei mtrŭt mjhar “hdră êlan Quang Trung” hŏng klei pral mdơ̆ng brei sang kơ mnuih ƀuôn sang găn klei jhat rai mơ̆ng yan adiê ngă. Lĭng kahan jing sa hlăm dŭm êpul knơ̆ng mơ̆ng bruă anei. Ti 2 boh čar Gia Lai lehanăn Daklak, knŏng êdei kơ 10 hrue leh khua knŭk kna mtrŭt mjhar, mâo leh êbeh 750/1.075 boh sang mâo rŭ mdơ̆ng, lehanăn hlăm brô 80% ênoh sang anăn dơ̆ng bi leh.

Đại tá Trần Minh Trọng, K’iăng khua bruă Đảng kahan alŭ wăl 5, brei thâo, êbeh 5.000 čô knuă druh lĭng kahan hlăk hrue mlam mă bruă, kñăm čiăng bi leh sang mrâo djŏ tui si klei khua knŭk kna mtă:

“Dŭm êpul êya lĭng kahan mơ̆ng phŭn, lehanăn alŭ wal 5 mâo mkŏ mjing leh truh 279 êpul nao đru rŭ mdơ̆ng pưk sang, hŏng êbeh 5.300 čô knuă druh lĭng akah nao đru mnuih ƀuôn sang. Ară anei, dŭm êpul êya lĭng kahan hlăk mđrăm mbĭt hŏng bruă sang čư̆ êa, nao rŭ mdơ̆ng pưk sang ktưn čiăng bi leh êlâo kơ hrue 31/01/2026 srăng hmao jao pưk sang kơ mnuih ƀuôn sang dôk, hdĭp mda, drông Tết Nguyên đán 2026 hlăm sang jiă klei khăp lĭng kahan lehanăn mnuih ƀuôn sang.”

Hlăm dŭm boh ƀuôn sang tuôm hŏng klei êa ngă, dŭm boh sang mrâo mâo lŏ mdơ̆ng, mơ̆ng ai tiê êa hŏ hang lĭng kahan, msĕ si knuh mnga klei čang hmăng, čuh blang hlăm grăp mnĭt mmông. Dŭm boh sang kjăp amâo mâo djŏ knŏng dưi đru mnuih ƀuôn sang pral hơĭt klei hdĭp mda, ƀiădah lŏ kuič mngač klei bi jưh knang, lŏ bi ksul mbŭ ai tiê klei khăp lĭng kahan hŏng mnuih ƀuôn sang knư̆ hĭn mơh lŏ hyuă kjăp, bi sĭt klei ƀuăn mơ̆ng Đảng, Knŭk kna lehanăn bruă sang čư̆ êa djăp alŭ wăl kơ klei hơĭt anôk dôk hŏng mnuih ƀuôn sang dhŭng kwar krah lehanăn lăn dap kngư./.