Đinh Văn Tây ti să Ia Klar nao ti anôk bruă tŭ mă leh anăn ba wĭt hră mơar knŭk kna kdriêk Đức Cơ ti čar Gia Lai ngă hră mơar tla prăk jia. Knŏng luč mă hlăm brô 30 mnĭt ñu dưi ngă leh dŭm mta hră mơar:

Phung mă bruă tinei diñu hur har, mă bruă hmar. Yăng đar pô kreh hriê ngă sa blư̆ leh yơh, tơdah mâo klei kpăk diñu hưn brei pô lŏ nao mkra, tơdah hơăi hmar êdi.

Hluê si Hồ Thị Hiền, k’iăng khua adŭ bruă kiă kriê bruă knuă kdriêk Đức Cơ, ư ai, amâo mâo ư ai, nao ai sơnăk jing 3 hnơ̆ng čiăng kơ mnuih ƀuôn sang ti Đức Cơ brei puăng êjai ngă bruă hŏng knuă druh. Thŭn 2022, hnơ̆ng mrô ư ai kơ klei ngă hră mơar knŭk kna mơ̆ng kdriêk Đức Cơ dôk tal 5 hlăm 17 kdriêk, wăl krah, ƀuôn prŏng:

Klei bi klă mơ̆ng mnuih ƀuôn sang hŏng klei ngă bruă mơ̆ng dŭm anôk bruă knŭk kna êjai mnuih ƀuôn sang hriê blŭ hrăm hlăm bruă hluê ngă dŭm mta hră mơar knŭk kna, êdei anei ngă dŭm mta hră mơar srăng mâo sa knhuang mnuih ƀuôn sang mâo phung knuă druh, phung mă bruă knŭk kna mtô leh anăn ngă hră mơar knŭk kna, leh kơnăn phung knuă druh srăng mbha hră kơ mnuih ƀuôn sang, akâo klei blŭ mguôp klei ngă bruă kơ mnuih ƀuôn sang tinei mâo klei nao ai amâodah hơăi. Tơdah nao ai diñu bi klă, tơdah amâo mâo nao ai diñu ăt bi klă čiăng lŏ dơ̆ng mgaih msir, mkra mlih hlăm wưng kơ anăp čiăng ngă bruă jăk hĭn.

      Ăt kñăm mđĭ hnơ̆ng mrô nao ai mơ̆ng mnuih ƀuôn sang, knơ̆ng bruă êjai nao ngă hră mơar knŭk kna, ti čar Quảng Ninh, Dŭm mta hră mơar knŭk kna hlăm klei dưi mgaih msir mơ̆ng alŭ wăl dưi bi klă ti anôk bruă leh anăn mbah điện tử. Bùi Tuấn Anh, K’iăng khua kiă kriê Knơ̆ng bruă kiă kriê bruă knuă čar Quảng Ninh brei thâo:

Quảng Ninh gĭt gai hŏng mnuih ƀuôn sang nah gŭ leh anăn gưl să hâo hưn hŏng lu hdră. Mơ̆ng bi klă ti anôk bruă să, sang dhar kreh čiăng hâo hưn hlăm anôk mđung rup alŭ wăl grăp mmăt čiăng kơ dŭm hdră kčah mtrŭn mơ̆ng gưl dlông, alŭ wăl dưi truh hŏng mnuih ƀuôn sang, čiăng kơ mnuih ƀuôn sang thâo săng leh anăn đru mguôp klei blŭ. Bi hŏng klei akâo, hmei bi klă grăp mlan mâo lei bi tuôm, blŭ hrăm leh anăn mgaih msir jih hnơ̆ng boh klei mâo.

Đa đa čar, ƀuôn prŏng msĕ si Quảng Bình, Quảng Trị, ƀuôn prŏng Hồ Chí Minh hluê ngă tŭ jing kčĕ “Mnuih ƀuôn sang brei puăng” hŏng 6 hnơ̆ng mrô: Ai tiê, klei drông, mtô ngă hră mơar, mmông ngă hră mơar, mmông ba wĭt hră mơar djŏ hruê, bi kơ ênoh prăk amâo mâo klă klơ̆ng leh anăn klei nao ai mbĭt. Hnơ̆ng mrô nao ai mbĭt mơ̆ng mâo 7 hlăm hnơ̆ng 9, mđĭ leh jing ti dlông 8, mâo alŭ wăl mâo 9 puăng. Nai Prĭng Lê Đặng Trung, Khua kiă kriê knơ̆ng bruă hlăk mblang mmông sĭt, sa hlăm dŭm anôk bruă nao êlâo nao hgŭm hlăm hdră mnuih ƀuôn sang brei puăng bi klă:

       Mkŏ mjing kơ mnuih ƀuôn sang leh anăn knuă druh klei mưng sơnei, anei jing sa hdră wĭt lač leh ngă hră mơar, jing sa hdră êlâo êdei. Kâo mĭn anăn jing sa boh tŭ dưn prŏng, kyua klă sĭt lu thŭn hŏng anei ngă klei akâo brei amâodjŏ knŏng mơ̆ng anôk bruă knŭk kna ƀiădah wăt mơ̆ng mnuih ƀuôn sang diñu tŭ dưn klei anăn. Hŏng mbah wĭt lač hmar, wĭt lač djŏ, mkŏ mjing wăl mnuih ƀuôn sang dưi wĭt lač amâo mâo klei uêñ mĭn ƀiădah ăt mâo ai dưi bi klă, knhuah mkŏ mkra hlăm bruă wĭt lač anăn jing lu êdi.

            Thŭn 2022, kah knar hnơ̆ng mrô nao ai kơ klei ngă bruă knŭk kna mơ̆ng 63 alŭ wăl jing 80,08%. Hluê si klei tĭn mkă mơ̆ng Phŭn bruă kiă kriê bruă knuă, hnơ̆ng mrô anei hlăm thŭn 2023 (srăng hưn mdah hlăm wưng tlâo mlan tal 2 thŭn 2024), srăng mâo 87,7%. Dŭm klei mlih mrâo ktang phĭt hlăm bruă hluê ngă knŭk kna mrô mđing truh mkŏ mjing sa yang ƀuôn jăk yâo, sa bruă knŭk kna jăk, kyua mnuih ƀuôn sang ngă bruă brei ƀuh dŭm boh tŭ dưn jăk, mđĭ ai grăp čô, grăp alŭ wăl bi kluôm hdră mrâo mrang mrô hlăm bruă mlih mrâo klei ngă hră mơar knŭk kna./.