Ti knăm anăn, anôk bruă Đảng kahan gưl dlông, Phŭn bruă lĭng kahan pah mni kơ 35 êpul, lehanăn 80 čô jing kdlưn hĭn hlăm bruă thâo đru čung ba mnuih ƀuôn sang mơ̆ng lĭng kahan hlăm krĭng mnuih djuê ƀiă, lehanăn čư̆ čhiăng wưng thŭn 2019-2024. 5 thŭn êgao, bruă Đảng kahan gưl dlông, Phŭn bruă lĭng kahan, Knơ̆ng kiă kriê kđi čar kahan mâo leh klei mđing kiă kriê, gĭt gai ngă klei bi ktưn “Đru čung ba mbruă”, mkŏ mjing êpul êya kahan ngă jăk bruă đru čung ba mđrăm hlăm djăp anôk , kjăp dưi ngă hlăm djăp bruă ƀuôn sang mâo, mđrĭng hŏng hdră êlan mtrŭt mjhar mơ̆ng kluôm ala, mâo ba wĭt leh lu boh tŭ dưn jăk. Mđrăm mbĭt kơ klei răng mgang lăn čar bi êdah ai tiê jih jang mnuih ƀuôn sang đru bi răng mgang klei êđăp ênang, mjing klei đăo knang kjăp hlăm krĭng mnuih ƀuôn sang djuê ƀiă hŏng Đảng, knŭk kna, lehanăn lĭng kahan, kahan lĭng ngă jăk bruă đru mnuih ƀuôn sang duh mkra, bi lar knhuah mngač mơ̆ng lĭng kahan Awa Hô hlăm ênuk gưl mrâo.

Mơ̆ng thŭn 2019-2024, djăp êpul kahan hlăm kluôm ala mâo leh bruă bi hgŭm hâo hưn kơ êbeh 250 êbâo tlam hŏng êbeh 20 êklăk čô mnuih nao hmư̆, mtrŭt mjhar êbeh 11 êbâo gưl gŏ sang, lehanăn giăm 56 êbâo čô mnuih hiu dôk êngiê lehanăn êbeh 20 êbâo čô phung hđeh hriăm hră lŏ dơ̆ng nao sang hră mơar. Mâo klei bi hgŭm kjăp lŏ bi hriăm mbŏ klei thâo săng kơ bruă răng mgang klei êđăp ênang hŏng êbeh 18.300 gưl čô mnuih jing phung khua mduôn, khua ƀuôn, mnuih mâo k’hưm hlăm ƀuôn sang, nao hgŭm hlăm êpul răng mgang ƀuôn sang, êpul mơ̆ng alŭ wăl iêo jak bi răng mgang ƀuôn sang, mghaih msir bi pral dŭm klei amâo mâo jăk mâo hlăm ƀuôn sang, amâo mâo jing hĕ anôk rŭng răng, mkhư̆ klei jhat đĭ lar.

Thiếu tá kahan truăn kơ bruă Nguyễn Thị Thúy, hlăm knơ̆ng bruă 723, Binh đoàn 15 (dôk hlăm kdriêk Đức Cơ Gia Lai) mtrŭt mnuih ƀuôn sang lăm lui dŭm mta klei đăo amâo mâo djŏ, mâo lŏ wĭt hŏng ƀuôn sang:

“Mâo sa blư̆ kâo nao truh hŏng ƀuôn sang, mâo sa čô hđeh hriê kmiêk jơ̆ng kâo lač, ih nao duah brei amĭ kâo đa, kâo ênguôt kơ amĭ kâo snăk. Klei jing mơ̆ng sa čô amĭ bluh đĭ hlăm kâo, leh hmư̆ sa čô hđeh lač klei ñgơ̆ amâo mâo amĭ. Snăn kâo mbĭt hŏng ƀĭng kahan mă ba rông hđeh anăn, dôk mbĭt hŏng hmei, bi hriăm gơ̆, mbĭt hŏng phung hđeh mkăn hlăm ƀuôn sang”.

 Blŭ hrăm ti anôk mtrŭt mjhar, Thượng tướng Trịnh Văn Quyết, khua kiă kriê anôk bruă kđi čar kahan, hlăm knơ̆ng bruă lĭng kahan yang ƀuôn Việt Nam mñă, krĭng mnuih djuê ƀiă lehanăn krĭng čư̆ čhiăng jing anôk yuôm bhăn hlăm klei mđĭ kyar bruă duh mkra, dhar kreh, yang ƀuôn, lehanăn bruă răng mgang klei êđăp ênang, bruă hŏng tač êngao. Boh sĭt mơ̆ng cách mạng Việt Nam mâo bi mklă leh, mnuih ƀuôn sang djăp djuê ana mâo nanao klei thâo bi mguôp lehanăn đru mguôp leh prŏng prĭn hlăm bruă cách mạng Đảng, lu krĭng lăn jing leh anôk phŭn kơ klei bi blah, rông ba lehanăn răng mgang knuă druh, lĭng kahan, dŭm êbâo čô anak ƀuôn sang nao mŭt kahan, mđrăm mbĭt hŏng jih jang ba wĭt klei tŭ dưn prŏng kơ bruă răng mgang klei êđăp ênang lăn čar. Bruă đru čung ba mnuih ƀuôn sang, mâo leh lĭng kahan čoh čuăn ngă kyua lĭng kahan kbiă hriê mơ̆ng ƀuôn sang mơh, kyua mnuih ƀuôn sang yơh bi blah. Bi êdah klă lăn čar hlăk dôk čhuang nao hlăm ênuk mlih mrâo mđĭ kyar mdrŏng sah, mjing anôk hdĭp jăk bi êdah ai tiê thâo khăp kơ lăn čar, klei čŏng pô bi êdah ai ktang mơ̆ng mnuih ƀuôn sang djăp djuê ana, đru mnuih ƀuôn sang lŏ dơ̆ng đru mguôp hlăn bruă rŭ mdơ̆ng lăn čar. Thượng tướng Trịnh Văn Quyết lač:

“Gưl bruă Đảng kiă kriê, kčĕ leh kơ phung knuă druh lĭng kahan hlăm kluôm lĭng kahan, hlăm anăn mâo êpul, lehanăn mnuih dưi mâo tŭ mă klei pah mni, lehanăn mđĭ ai lŏ dơ̆ng ngă jăk hĭn bruă đru čung ba mnuih ƀuôn sang, mđrăm mbĭt hŏng mnuih ƀuôn sang hlăm djăp mta bruă. Hgŭm kjăp hĭng hŏng bruă sang čư̆ êa, hâo hưn mtrŭt mjhar mnuih ƀuôn sang hlue gưt klei Đảng kiă kriê, gĭr ktir bi rai jih mnêč jhat mơ̆ng phung bi roh, kñăm bi kah ana mbha djuê mơ̆ng klei thâo bi mguôp jih jang djuê ana”.

          Ƀri wưng anei, Phŭn bruă lĭng kahan mkŏ mjing hdră “mnuih kơ ƀuôn sang”, mđung hlăm hdră mđung rup lĭng kahan lehanăn bi lar hlăm dŭm pŏk hră klei mrâo lĭng kahan kñăm hâo hưn mtô mblang, hưn mdah dŭm bruă ngă, dŭm klei jăk siam mơ̆ng lĭng kahan hŏng mnuih ƀuôn sang, hlăm anăn mâo mnuih ƀuôn sang djuê ƀiă, lehanăn krĭng čư̆ čhiăng./.