Gŏ sang amai Bàn Thị Hằng jing sa hlăm dŭm gŏ êsei mđĭ kyar bruă duh mkra mbruă ti să Quân Chu, kdriêk Đại Từ, čar Thái Nguyên. Kyua klei kreh kriăng, thâo gĭr, dua ung mô̆ amai Hằng mkŏ mjing leh gru hmô pla ana boh kroh hŏng êbeh 3 ha mtei hrah, giăm 3 êbâo boh kruê̆ dŭng, boh ktruôl leh anăn boh êrang, mâo prăk hrui wĭt kjăp dŭm êklăk prăk grăp thŭn. Amai Bàn Thị Hằng brei thâo, anei ăt jing boh tŭ mơ̆ng klei mtăp mđơr, hrăm mbĭt kah mbha mơ̆ng ung mô̆ diñu, mơ̆ng leh mkŏ mjing gŏ sang truh ară anei”

 “Hlăm klei hdĭp gŏ sang, ung kâo ăt mâo bruă đru hlăm gŏ sang leh anăn bruă ngă grăp hruê. Kyua anăn kâo mâo lu mmông kriê dlăng kơ pô hĭn.”

Ayŏng Nguyễn Văn Dân, ung amai Hằng bi êdah klei mĭn:

 “Klei mĭn kâo pô jing đru mô̆. Wĭt mă bruă truh ti sang srăng hrăm mbĭt knă êsei tŭk djam hŏng mô̆, êmiêt pưk sang đru kơ mô̆ anak. Kâo ƀuh snăn kơh mơak".

Bi hŏng amai Nguyễn Thị Luyện ti să Đồng Thịnh, kdriêk Định Hóa, čar Thái Nguyên, klei mơak leh jih mmông mă bruă jing bruă mă hŏng gŏ sang leh anăn kriê dlăng anak čô mâo leh ung kăp đru. Wăt tơdah kkiêng anak knŏng mâo mniê, klei hdĭp thâo mâo ƀiă, ƀiădah gŏ sang ñu ăt kăn mâo klei mĭn lŏ kkiêng thiăm anak êkei ôh. Klei thâo bi djŏ đru diñu hdĭp jăk mơak, phung anak kriăng hriăm hră anăn ku thŭn gŏ sang mâo nanao anăn knăl gŏ sang dhar kreh. Amai Nguyễn Thị Luyện brei thâo:

 “Kâo jing nai mtô hđeh snăn jing bruă suăi snăk ƀiădah ung kâo kăp đru bruă anăn kơ kâo, ti sang klam bruă kriê dlăng pưk hma, bruă hlăm sang, kriê dlăng anak čô đru anăn kâo mơak snăk.

Êlâo dih hlăm mnuih djuê ƀiă mâo nanao klei mĭn “mpŭ kơ êkei amâo uêñ kơ mniê”. Klei bhiăn hdĭp mda kthŭl mluk sui thŭn… ngă kơ phung mniê jing êpul êdu awăt. Čiăng ƀrư̆ ƀrư̆ bi mlih klei mĭn anei, Dương Thị Thanh Luyến, Khua Êpul hgŭm phung mniê kdriêk Đại Từ, čar Thái Nguyên brei thâo:

 “Hmei ăt gĭt gai mkŏ mjing dŭm gru hmô, hdră ngă si tô hmô dŭm gru hmô, êpul hgŭm gang mkhư̆ klei ngă jhat kơ phung hđeh, êpul hgŭm gang mkhư̆ klei ngă jhat hlăm gŏ sang, đru kơ phung mniê mkŏ mjing êpul hgŭm bruă, êpul bi hgŭm čiăng mđĭ kyar bruă duh mkra bi hgŭm”.

Yap truh jih thŭn dih, ênoh phung mniê dưi mâo gưl hriăm nai prŏng hlăm ênoh phung mâo gưl hriăm nai prŏng ti čar Thái Nguyên mâo 54,0%. Ênoh phung mniê ngă khua anôk bruă duh mkra, êpul hgŭm bruă mâo 28%... Êngao anăn, mâo leh dŭm êbâo gŏ êsei kyua phung mniê ngă khua, gĭr ktưn tlaih ƀun, đru bi hrŏ ênoh gŏ êsei ƀun ti čar hrŏ adôk êbeh 4%.  Hoàng Văn Chính, K’iăng Khua Dhar bruă djuê ana čar Thái Nguyên bi mklă:

 “Hlăm wưng kơ anăp, Dhar bruă djuê ana čar Thái Nguyên ăt lŏ dơ̆ng kčĕ kơ gưl bruă Đảng leh anăn bruă sang čư̆ êa alŭ wăl ti čar jing dŭm alŭ wăl brei gĭr, lŏ dơ̆ng mđĭ klei hâo hưn mtăp mđơr êkei mniê. Boh nik jing dŭm boh phŭn dưi čih hlăm hdră kñăm ala čar mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng.”

 Mtăp mđơr êkei mniê jing hdră amâo dưi kčah ôh hlăm hdră mkŏ mjing leh anăn mđĭ kyar bruă duh mkra ala ƀuôn krĭng mnuih djuê ƀiă. Bruă mđĭ klei mtăp mdơr êkei mniê krĭng mnuih djuê ƀiă mguôp hŏng klei mđĭ kyar hrăm mbĭt kơ anôk bruă nah gŭ, mđĭ bruă duh mkra ala ƀuôn ti čar Thái Nguyên ƀrư̆ đĭ kyar. Mơ̆ng anăn srăng ƀrư̆ mâo lu phung mniê dưi mâo klei găl čiăng tui hriăm, mđĭ lar ênoh yuôm leh anăn jing klei yuôm bhăn, đru mguôp hlăm klei đĭ kyar mbĭt mơ̆ng ala ƀuôn./.