Jing krĭng čư̆ čhiăng knông lăn, hnơ̆ng mnuih mnuih ƀuôn sang jing mnuih djuê ƀiă êbeh 80%, dŭm thŭn êgao, Lai Châu bi klă ngă jăk dŭm hdră êlan djuê ana, đru kơ mnuih ƀuôn sang jing mnuih djuê ƀiă mđĭ kyar klei hdĭp mda, bi hơĭt klei hdĭp, lăm lui klei ư̆ êpa ƀun ƀin. Hŏng 20 djuê ana hdĭp mda, hlăm anăn mâo 4 djuê ana ênoh ƀiă sơnăk jing Cống, Mảng, La hủ leh anăn Si la, klei thâo săng leh anăn knhuah dhar kreh lu jơr. Khădah jing klei găl ƀiădah ăt jing klei lông dlăng hŏng bruă sang čư̆ êa dŭm gưl hlăm bruă bi lar knhuah dhar kreh plah wah dŭm djuê ana ti alŭ wăl čiăng hrăm mbĭt đĭ kyar. Lai Châu ba mdah leh hdră mtrŭn kơ hdră êlan mđĭ kyar bruă lŏ hma mnơ̆ng dhơ̆ng wưng thŭn 2021 – 2025. Anei jing klei găl čiăng kơ dŭm kdriêk, ƀuôn prŏng mtrŭt mjhar mkŏ mjing, iêo jak dŭm êpul hgŭm bruă duh bi liê, mkŏ, hrăm mbĭt hŏng bruă sang čư̆ êa alŭ wăl mkŏ mjing tŭ jing hdră grăp să sa mnơ̆ng dhơ̆ng, bi klă jing sa hlăm dŭm hdră êlan tŭ dưn mơ̆ng Lai Châu kñăm đru kơ mnuih ƀuôn sang dŭm djuê ana duah anôk ba čhĭ boh mnga bruă lŏ hma đru lăm lui, bi hrŏ klei ư̆ êpa ƀun ƀin hŏng klei kjăp. Lê Xuân Tiến, k’iăng Khua knơ̆ng bruă tuh tia Lai Châu brei thâo:

“Hlăm wưng mơ̆ng thŭn 2021 – 2025, čar bi klă mđĭ kyar 7 anôk čhĭ mnia kơ krĭng mnuih djuê ƀiă. Bi hŏng bruă mkŏ dŭm mta boh mnga bruă lŏ hma mơ̆ng mnuih ƀuôn sang jing mnuih djuê ƀiă, Knơ̆ng bruă tuh tia hưn leh hŏng bruă sang čư̆ êa čar mkŏ mjing 16 hdră čiăng hluê ngă, čiăng mkŏ jih jang dŭm mnơ̆ng dhơ̆ng bruă lŏ hma mơ̆ng mnuih ƀuôn sang hlăm sang čhĭ mnia prŏng, anôk mnia mblei ti čar, ăt msĕ hŏng đa đa alŭ wăl”.

Mơ̆ng sa alŭ wăl amâo mâo anăn hlăm hră knăl ana ƀơ̆ng ƀoh, ară anei Sơn La jing anôk pla mjing boh kroh prŏng hĭn ti krĭng kwar Dưr leh anăn dôk tal 2 hlăm lăn čar. Mnơ̆ng dhơ̆ng dưi ba čhĭ truh kơ lu anôk mnia mblei ksiêm dlăng kjăp dlông rŏng lăn leh anăn ba wĭt mơ̆ng 150 -170 êklăk dolar Mi grăp thŭn, dŭm êbâo čô ƀĭng ngă lŏ hma jing mnuih djuê ƀiă jing phung mdrŏng prăk êklăk, prăk êklai. Nao mbĭt hŏng bruă mtrŭt mđĭ jing anôk pla mjing boh kroh mơ̆ng krĭng kwar Dưr jing bruă mtrŭt mđĭ klei ba čhĭ boh mnga hŏng dŭm mta bruă mtrŭt mđĭ klei mnia mblei. Ară anei, mâo 16 mta mnơ̆ng dhơ̆ng boh mnga bruă lŏ hma čar Sơn La dưi ba čhĭ truh kơ 12 ala čar. Boh mnga bruă lŏ hma ăt dưi ba čhĭ ti dŭm sang mnia prŏng msĕ si Lotte, Hapro, WinMart. Boh mnga bruă lŏ hma doh êbăt mơ̆ng Sơn La ƀrư̆ ƀrư̆ dưi mkŏ mjing klei đăo knang, anăn knăl hlăm lăn čar leh anăn tač êngao, mâo lu phung blei ba yua khăp čiăng leh anăn dlăng yuôm bhăn kơ hnơ̆ng tŭ jăk. Quàng Văn Dương, sa čô hgŭm hlăm Êpul hgŭm bruă lŏ hma Xuân Tiến, Sơn La hmăng hmưi:

“Hmăng hmưi mơ̆ng mnuih ƀuôn sang ăt msĕ hŏng êpul hgŭm bruă jing klei ba čhĭ mnơ̆ng dhơ̆ng anei, hmăng hmưi mnơ̆ng dhơ̆ng boh soai ƀrư̆ hruê ƀrư̆ đĭ kyar, dưi ba čhĭ lu, lu mnuih thâo, ba čhĭ hlăm lăn čar leh anăn ala tač êngao”.

Bình Phước jing anôk mâo lăn jăk, yan adiê găl čiăng pla mjing ana kñŭl leh anăn dưi dlăng jing anôk pla kñŭl prŏng êjai mâo giăm 50% ênhă leh anăn êbeh 54% hnơ̆ng boh kñŭl hlăm lăn čar. Asăr kñŭl ti Bình Phước mâo klei găl boh lu leh anăn hnơ̆ng tŭ jăk hŏng asăr kñŭl ba čhĭ kơ ala tač êngao, đru kơ ana kñŭl jing ana pla mjing phŭn leh anăn mâo ênoh ba čhĭ, jing mnơ̆ng dhơ̆ng mnia mblei phŭn mơ̆ng čar hlăm dŭm thŭn giăm anei

Aduôn Thân Thị Xiêm- khua kiă kriê knơ̆ng bruă duh mkra mnia mblei An Thuận Phát           ƀuăn hrăm mbĭt hŏng ƀĭng ngă lŏ hma Bình Phuớc hlăm bruă ba čhĭ:

“Hmei hrăm mbĭt hŏng mnuih ƀuôn sang ti čar Bình Phước, mơ̆ng mnuih ƀuôn sang jing mnuih djuê ƀiă, hlăm anăn mâo mnuih S’Tiêng, hmei tuôm bi mguôp lu thŭn jing ƀuăn hŏng mnuih ƀuôn sang êjai truh yan hjan, dŭm klei dleh dlan mơ̆ng mnuih ƀuôn sang hmei srăng đru leh anăn truh kơ yan hrui pĕ hmei srăng đua klam mbĭt bruă anei, čiăng ba kñŭl truh kơ sang măi mkăm pioh, djŏ phŭn mơ̆ng Bình Phước čiăng mkŏ mjing bruă mă kơ mnuih ƀuôn sang leh dŭm hruê hjan leh anăn dŭm hruê hrui pĕ, kyua mnuih ƀuôn sang lăn Bình Phước knŏng mâo mă kñŭl jing hnư hrui wĭt phŭn.

Hlăm wưng êgao, dhar bruă tuh tia kñăm kơ bruă mtrŭt mđĭ dŭm bruă mnia mblei kñăm mkŏ mjing čiăng ba yua mnơ̆ng dhơ̆ng kơ mnuih ƀuôn sang, hlăm anăn mâo mnuih ƀuôn sang jing mnuih djuê ƀiă krĭng čư̆ čhiăng, krĭng taih kbưi. Phŭn bruă tuh tia hrăm mbĭt hŏng dŭm alŭ wăl gĭr hưn mdah mnơ̆ng dhơ̆ng kluôm dŭm anôk čhĭ mnia leh anăn mâo lu ƀĭng hgŭm tui duah. Dŭm mta bruă klă klơ̆ng anei đru mkŏ mjing klei jăl hŏng hnơ̆ng ba čhĭ boh mnga bruă lŏ hma mơ̆ng mnuih ƀuôn sang hlăm dŭm thŭn leh anăn mâo truh ti dŭm anôk čhĭ mnia prŏng ăt msĕ hŏng ba čhĭ kơ dŭm lăn čar dlông rŏng lăn.