Kyua mâo hdră êlan mă bruă mrô 8 amai Châu Thị Ngọc Điệp dôk ti alŭ Đại Nghĩa Thắng, să Đại Tâm nao bi mguôp hlăm lu bruă hâo hưn hŏng alŭ wăl. Mơ̆ng anăn. Ñu mtă mtăn kơ dŭm gŏ sang riêng gah thâo săng lehanăn mâo bruă klam đru bi răng kriê phung mniê lehanăn phung hđeh.

Kâo nao bi mguôp hŏng mta bruă mrô 8 snăn kâo nao hlăm klei hâo hưn čiăng kơ jih jang phung ƀuôn sang lehanăn amai adei đăm lĕ hlăm klei ngă jhat hlăm gŏ sang, amâo mâo biêng anak aneh msĕ si êlâo ôh, đru bi răng kriê phung mniê lehanăn phung hđeh.

Mta bruă mrô 8 mâo ngă ti 3 boh alŭ dleh dlan hĭn hlăm kdriêk Mỹ Xuyên. Anăn jing alŭ Đại Nghĩa Thắng, să Đại Tâm; alŭ Sóc Bưng, să Thạnh Phú lehanăn alŭ Phú Giao, să Thạnh Quới hŏng lu bruă ngă klă mngač ngă leh, dôk ngă ară anei. Amai Dương Thị Mỹ Nhiên, Khua êpul hgŭm bruă mniê alŭ Phú Giao, să Thạnh Quới, kdriêk Mỹ Xuyên, čar Sóc Trăng lač:

Hlăm wưng tinăp, Êpul hgŭm bruă mniê alŭ Phú Giao, să Thạnh Quới srăng hgŭm jăk hŏng êpul hgŭm nah dlông, lehanăn hlăm dŭm gưl dhar bruă, ngă jăk bruă čuăn mơ̆ng bruă mrô 8. Anei jing dŭm hdră êlan prŏng, yuôm bhăn djŏ tuôm hŏng phung mniê lehanăn phung hđeh, anăp truh bi sĭt mta kñăm mtăp mđơr êkei mniê, lehanăn mđing mghaih msir mâo klei tŭ jing djăp mta klei hŏng phung mniê, lehanăn phung hđeh hlăm krĭng mnuih djuê ƀiă.

Wưng leh êgao, Êpul hgŭm bruă mniê kdriêk Mỹ Xuyên truăn mđing ngă hlăm 3 mta bruă phŭn. Anăn jing hâo hưn, mtrŭt mjhar bi mlih hdră mă bruă, lăm lui jih klei mĭn amâo mâo thâo bi djŏ, dôk knŏng sa nah tĭng đing sa nah pŏk, khăp kơ êkei lu hĭn kơ mniê hlăm găp djuê lehanăn ƀuôn sang, dŭm klei bhiăn amâo mâo lŏ djŏ, lehanăn dŭm klei amâo mâo jăk hlăm yang ƀuôn, đru bi ksiêm, lehanăn đru bi blŭ mgang, đru kơ phung mniê hlăm klei mă bruă hlăm bruă kđi čar. Aduôn   Trần Hồng Ni, Khua êpul hgŭm bruă mniê kdriêk Mỹ Xuyên, čar Sóc Trăng cho lač:

Čiăng mâo ngă jăk mta bruă mrô 8, Êpul hgŭm bruă mniê kdriêk Mỹ Xuyên mđĭ hĭn klei hâo hưn, mkŏ mjing dŭm gru bi hmô djŏ guôp hŏng boh klei dôk găn hlăm alŭ wăl, lehanăn mghaih msir bi djŏ klei bi keh koh kyua amâo mâo klei mtăp mđơr êkei mniê, truh klei ap gư̆ ktư̆ juă phung mniê lehanăn phung hđeh hlăm krĭng mnuih djuê ƀiă, lui hĕ jih dŭm klei mĭn mpŭ kơ êkei lu hĭn kơ mniê, lui jih klei bhiăn amâo lŏ djŏ, nao hlăm klei mđĭ kyar mbĭt hŏng alŭ wăl.

 Leh sa wưng hlue ngă mta bruă mrô 8, kơ klei mtăp mdơr êkei mniê, kơ klei dưi hriăm mjuăt, mă bruă, dlăng kriê klei suaih pral kơ phung mniê ti Sóc Trăng mâo leh klei bi mlih; boh nik hŏng phung mniê hlăm krĭng taih kbưi, krĭng mnuih djuê ƀiă. Bruă klam, klei dưi mơ̆ng phung mniê knư̆ hrue knư̆ mâo klei tŭ jing hlăm djăp mta hŏng klei hdĭp yang ƀuôn lehanăn hlăm gŏ sang. Ƀuh jing amâo jăk lŏ mâo lu ôh klei bi kah êkei mniê, djăp mta klei mâo leh klei bi mlih jăk hĭn. Tui si ênoh tĭng yap truh kơ knhal jih thŭn dih, kluôm čar mâo 109 să, ƀuôn hgŭm, wăl krah mâo leh dŭm klei bi hmô jăk hlăm bruă bi kdơ̆ng hŏng klei ngă jhat hlăm găp djuê, hŏng giăm 180 êpul bi hgŭm, mâo giăm 650 êpul gang mkhư̆, bi kdơ̆ng hŏng klei ngă jhat hlăm găp djuê, êbeh 800 anôk năng jưh knang hlăm ƀuôn sang, giăm  850 mrô đĭng blŭ mjêč pioh iêo mbăng knang kơ klei đru mgang./.