Việt Nam leh anăn Lào mâo êlan knông lăn mbĭt hŏng boh taih hlăm brô 2.340 km găn 10 čar mơ̆ng Việt Nam leh anăn 10 čar mơ̆ng Lào. Dua tĭng mâo 8 hlâo ƀăng jang knông lăn prŏng, 7 ƀăng jang knông lăn ala čar, 18 êlan pŏk knông lăn leh anăn wăl anôk bruă duh mkra.

          Hlăm mmông blŭ hrăm phung khua kahan mda asei lĭng kahan knông lăn Việt Nam leh ană phung khua kahan mda asei Anôk bruă răng mgang klei êđăp ênang – Phŭn bruă kahan ksiêm Lào hrăm mbĭt ksiêm wĭt boh tŭ dưn klei bi mguôp ngă bruă hlăm wưng êgao. Mñă klă bruă klam yuôm bhăn mơ̆ng phung khua kahan mda asei hlăm klei đru kčĕ, rơ̆ng kơ klei bi mguôp hluê ngă dŭm bruă klam. Thượng uý Nguyễn Văn Quang, Pô đru kčĕ bruă, Êpul hâo hưn mtô mjuăt, adŭ bruă kđi čar, lĭng kahan knông lăn čar Kon Tum brei thâo:

 “Dưi nao hgŭm mjĕ mjuk jing klei găl čiăng kơ kâo leh anăn êpul phung khua kahan mda asei bi tuôm, bi trông, mđĭ hĭn klei thâo, mđĭ hĭn bruă kriê dlăng leh anăn răng mgang knông lăn. Kâo pô mâo klei hriăm čiăng čŏng pô bi mguôp hŏng êpul phung khua kahan mda asei ala čar mah jiăng Lào, mơ̆ng anăn hmao ƀuh mnêč, hdră ngă bruă mơ̆ng phung ngă soh čiăng hmao hư mthâo hŏng phung khua gĭt gai mâo dŭm hdră êlan gang mkhư̆, bi kdơ̆ng hŏng phung ngă soh”.

Mơ̆ng akŏ thŭn 2023 truh kơ ară anei, phung khua kahan mda asei lĭng kahan knông lăn Việt Nam leh ană phung khua kahan mda asei Anôk bruă răng mgang klei êđăp ênang – Phŭn bruă kahan ksiêm Lào ngă leh hră mơar kơ 499 êpul knuă druh dua ala čar bi găn êrô ngă bruă,  bi mguôp gak răng 264 blư̆ hŏng dŭm êbâo gưl čô knuă druh, lĭng kahan nao hgŭm, bi mguôp mă kơ̆ng, ƀuah mkra êbeh 1.500 klei ngă soh hŏng 2.400 pô ngă soh…

Hluê si Đại tá Nguyễn Thanh Hải, k’iăng khua bruă kđi čar lĭng kahan knông lăn Việt Nam, Êpul khua kahan mda asei jing phung lŏ čuê mơ̆ng êpul lĭng kahan dua ala čar, dŭm klei mjĕ mjuk mâo boh tŭ dưn yuôm bhăn hlăm bruă kriê pioh, ksul mbŭ klei bi hgŭm knhuah gru, klei bi mguôp Việt Nam – Lào:

 “Klei mjĕ mjuk phung khua kahan mda asei lĭng kahan knông lăn Việt Nam, phung khua kahan mda asei Anôk bruă răng mgang klei êđăp ênang, kahan ksiêm Lào hruê anei jing klei bi klă hdră êlan bi mguôp plah wah Knơ̆ng gĭt gai lĭng kahan knông lăn leh anăn Anôk bruă răng mgang klei êđăp ênang, kahan ksiêm Lào. Bi êdah klei uêñ mĭn, klei đăo knang mơ̆ng khua gĭt gai dua êpul hŏng phung mda asei, ngă klei găl čiăng kơ phung mda asei dua êpul dưi bi tuôm, mjĕ mjuk, kah mbha klei hriăm, mbĭt anăn lŏ wĭt bi hdơr knhuah gru hing ang, klei bi hgŭm, ƀĭng knga Việt Nam – Lào”.

Khua êpul bi ala dua tĭng bi tŭ ư đa đa mta phŭn leh anăn hdră hluê ngă dŭm bruă klam kñăm hlăm wưng kơ anăp hŏng êpul phung khua kahan mda asei lĭng kahan knông lăn Việt Nam leh ană phung khua kahan mda asei Anôk bruă răng mgang klei êđăp ênang – Phŭn bruă kahan ksiêm Lào. Hlăm anăn kñăm mđĭ hĭn klei bi trông, klei blŭ hrăm, bi mguôp, rơ̆ng ngă jăk, ngă kjăp dŭm klei kuôl kă răng mgang knông lăn leh anăn ƀăng jang knông lăn plah wah knŭk kna Việt Nam leh anăn knŭk kna Lào, răng mgang, ksiêm dlăng klei mŭt kbiă, klei dôk jưh, êrô êbat mơ̆ng mnuih ƀuôn sang grăp lăn čar, bi mguôp gang mkhư̆, bi kdơ̆ng tŭ dưn hŏng phung ngă soh, mkŏ mjing wăl êđăp ênang leh anăn klei găl kơ mnuih ƀuôn sang, knơ̆ng bruă dua ala čar êrô êbat găn knông lăn, bi mguôp mđĭ kyar bruă duh mkra, mjĕ mjuk dhar kreh, nao čuă găp djuê.

Êlâo kơnăn, Êpul bi ala phung khua kahan mda asei dua tĭng mkŏ mjing leh dŭm mta bruă pla ana kyâo bi hdơr, mđup brei klei đru hriăm hră kơ phung hđeh sang hră dleh dlan, hâo hưn, mtô mblang klei bhiăn lăn čar kơ mnuih ƀuôn sang dua tĭng knông lăn hlăm čar Kon Tum (Việt Nam) leh anăn čar Attapư, mkŏ mjing dŭm klei kdŏ mmuñ, bi lông mjuăt asei mlei, nao čuă dlăng dŭm anôk hiu čhưn ênguê, dhar kreh knhuah gru djuê ana ti alŭ wăl ƀuôn prŏng Kon Tum.