Dŭm hruê knhal jih hruê kăm, khua mduôn Điểu Xem, djuê ana M’nông, kahan hđăp, mnuih mâo kơhưm ti ƀuôn Dak Blao, wăl krah Kiến Đức, kdriêk Dak Rlâp, čar Dak Nông nao mbĭt hŏng êpul čŏng kriê dlăng truh ti grăp gŏ sang ƀun hlăm ƀuôn. Khua mduôn brei thâo, grăp sang mâo klei hdĭp mdê mdê, nao bi tuôm, jĕ giăm kơh dưi thâo lehanăn mâo klei đru brei mơ̆ng knŭk kna truh hŏng mnuih ƀuôn sang. Dŭm gŏ sang mâo ktrâo kơ hdră duh ƀơ̆ng, đru kơ mnơ̆ng dhơ̆ng msĕ si mjeh mnơ̆ng rông, mnơ̆ng pla, bi hriăm kơ hdră mnêč, mđĭ ai gĭr ktưn kpưn đĭ. Hluê si Khua mduôn Điểu Xem, klei bi hgŭm mguôp đru leh kơ ƀuôn sang hơĭt kjăp lehanăn ƀrư̆ hruê ƀrư̆ đĭ kyar.

         “Mnuih ƀuôn sang hlăm ƀuôn bi hgŭm mguôp, siă suôr, thâo bi đru mă bruă knuă, mđĭ kyar bruă duh mkra. Klei hdĭp mnuih ƀuôn sang hơĭt kjăp lehanăn lŏ mâo klei đru, mđing dlăng mơ̆ng Đảng, Knŭk kna duh mkra anôk bruă nah gŭ, mđing mkăp prăk duh bi liê kơ mnuih ƀuôn sang mă bruă, klei hdĭp ƀrư̆ hruê đĭ kyar.

        Ti să knông lăn Quảng Trực, kdriêk Tuy Đức, čar Dak Nông, bruă klam mơ̆ng phung khua mduôn, mnuih mâo kơhưm ăt dưi mđĭ lar jăk hlăm bruă krơ̆ng klei hơĭt kjăp ti krĭng knông lăn lehanăn mđĭ kyar bruă duh mkra. Khua mduôn Điểu Đi, ƀuôn Bu Prăng 2, să Quảng Trực brei thâo, sa ai tiê hluê Đảng, hluê cách mạng, klei hdĭp mnuih ƀuôn sang ƀrư̆ hruê ƀrư̆ trei mđao, krĭng knông lăn bi mlih hlăm grăp hruê hruê.

“Hlăm ênuk bi blah snăn kâo nao hgŭm kdơ̆ng mblah răng mgang Ala čar lehanăn răng mgang krĭng knông lăn anei. Ară anei êđăp ênang leh, phung đảng viên, kahan hđăp brei ba akŏ, jing gru mngač lehanăn mtrŭt mjhar mnuih ƀuôn sang mđĭ lar ai tiê hgŭm mguôp, gĭr mă bruă knuă, mđĭ kyar klei hdĭp lehanăn răng mgang kjăp krĭng knông lăn anei”.

Bi mklă êpul khua mduôn, mnuih mâo kơhưm mâo bruă klam yuôm bhăn, mơ̆ng thŭn 2013, bruă Đảng čar Dak Nông ba mdah leh Hdră mtrŭn 05 kơ bruă mkŏ mjing êpul knuă druh phŭn krĭng mnuih djuê ƀiă. Truh ară anei, êpul anei mâo giăm 500 čô, mâo mprăp klei thâo kơ hdră mtrŭn mơ̆ng Đảng, hdră bhiăn mơ̆ng Knŭk kna, klei thâo mtrŭt mjhar, đru čung ba mnuih ƀuôn sang hlăm boh klei mrâo. Mơ̆ng anăn, pral thâo klă klei čiăng mơ̆ng mnuih ƀuôn sang, hưn mthâo klă dŭm boh klei mjêč mâo ti alŭ wăl čiăng mâo hdră msir mghaih.

Ăt hluê hŏng hdră mtrŭt mjhar mơ̆ng mnuih mâo kơhưm đru leh kơ mnuih ƀuôn sang mđĭ klei răng, gang mkhư̆, bi kdơ̆ng tŭ dưn hŏng mnêč jhat, duah mplư luar, mjhua hŏng klei đăo, djuê ana. Lu klei amâo thâo bi djŏ, keh koh, kuan miă dưi bi mgrăng, msir mghaih mơ̆ng nah gŭ mtam. Mbĭt anăn, êpul mâo kơhưm lŏ nao hgŭm hlăm hdră bi ktưn khăp kơ ala čar, dŭm hdră mtrŭt mjhar ti alŭ wăl msĕ si hdră jih jang mnuih ƀuôn sang hgŭm mguôp mkŏ mkra krĭng ƀuôn sang mrâo bi hrŏ ƀun hơĭt kjăp.

Hồ Văn Mười, Kơiăng khua bruă Đảng čar, Khua Anôk bruă sang čư̆ êa čar Dak Nông bi mklă, mđĭ lar bruă klam mơ̆ng phung đảng viên, mnuih mâo kơhưm hlăm krĭng mnuih djuê ƀiă jing bruă klam yuôm bhăn mơ̆ng dŭm gưl, dhar bruă čiăng kơ čar mđĭ kyar.

“Dŭm gưl bruă Đảng, bruă sang čư̆ êa alŭ wăl pral mkŏ mjing dŭm hdră bruă kñăm mđĭ lar bruă klam mơ̆ng mnuih mâo kơhưm, êpul knuă druh phŭn, lŏ dơ̆ng mkŏ mkra, bi kjăp, dăp ênŭm mnuih mă bruă mâo kơhưm hlăm krĭng mnuih djuê ƀiă; lŏ dơ̆ng mkŏ mkra lehanăn mđĭ lar dŭm gru mngač hlăm djăp mta ra bruă, čiăng đru mđĭ kyar bruă duh mkra, dhar kreh – ala ƀuôn, bruă lĭng kahan – răng mgang kli êđăp ênang ti dŭm alŭ wăl, đru mkŏ mkra ƀuôn sang Dak Nông ƀrư̆ hruê đĭ kyar jăk siam”.

Tĭng dlăng djŏ bruă klam mơ̆ng mnuih mâo kơhưm hlăm êpul êya mnuih djuê ƀiă, mâo hdră mtrŭn djŏ guôp čiăng mđĭ lar tuič hnơ̆ng bruă klam “Pô ana mnŭt akŏ êa hra akŏ ƀuôn”, đru kơ čar Dak Nông krơ̆ng kjăp klei êđăp ênang bruă kđi čar, dưi mâo dŭm boh tŭ hlăm hdră mđĭ kyar bruă duh mkra, tlaih mơ̆ng čar ƀun lehanăn gĭr jing čar đĭ kyar ti krĭng Lăn dap kngư./.