Ti wăl tuh tia mkra mjing Tân An, ƀuôn prŏng Ƀuôn Ama Thuôt, lu knơ̆ng bruă hưn mthâo ruah mnuih mă bruă tă kčoh, điện tử, mkra mjing mlâo ală mgưt hŏng hnơ̆ng prŏng. Wăt tơdah hưn mdah lu klei dưi dưn jăk kơ prăk mlan, pah mni, đru kơ hruê mdei hlăm yan puôt wiă ƀiădah lu knơ̆ng bruă ăt kăn djăp mnuih mă bruă rei. Trần Chí Vĩ, Khua anôk bruă duh mkra tă kčoh Lực Thiêm brei thâo, knơ̆ng bruă mâo klei čiăng ruah thiăm 300 čô mă bruă, ƀiădah knŏng mrâo dưi ruah hlăm brô 50 čô:

“Hlăk yan pĕ kphê, yan tiu tơdah phung mă bruă mâo lăn pla mjing, diñu srăng dưi akâo mdei hlăm wưng anăn čiăng wĭt kơ ang đru bruă hlăm sang. Ăt čang hmăng mơ̆ng yan kphê mlan 6 anei snăn srăng ênưih ruah hĭn.”

Bi ti wăl mkra mjing Čư̆ Kuin, boh klei kƀah mnuih mă bruă, ngă kơ lu knơ̆ng bruă lŏ mkra mlih hdră kčah mkra mjing ăt msĕ mơh hră akâo blei mơ̆ng phung mkăn. Vũ Nguyễn Tường Linh, klam bruă hrŏng ruah mơ̆ng knơ̆ng bruă kphê Ngon brei thâo, knơ̆ng bruă bi hgŭm leh hŏng dŭm sang hră gưl krah, gưl prŏng ti alŭ wăl leh anăn srăng mtô bruă amâo mă prăk ôh, ƀiădah ênoh akâo hră hrŏng ruah ăt ka mâo msĕ si klei čang hmăng ôh:

“Knơ̆ng bruă hmei čiăng hrŏng ruah giăm 50 čô mnuih mă bruă hŏng kngan truh kơ phung mă bruă thơ̆ng. Klei dleh dlan jing kƀah phung mă bruă thơ̆ng, boh nik bruă hdră mnêč msĕ si pui klă, mkra mjing. Leh anăn hlăm knơ̆ng bruă hmei snăn sa knơ̆ng bruă mâo ala tač êngao bi liê, hmei čiăng mâo thiăm klei thâo blŭ  klei blŭ ala tač êngao anăn jing klei kƀah phung mă bruă ti Dak Lak.”

 Boh klei kƀah mnuih mă bruă dôk mâo lu ti čar Dak Lak. Nguyễn Thùy Tâm, pô ngă bruă hră mơar kơ mnuih mă bruă knơ̆ng bruă Trung Nguyên Franchising ti Dak Lak brei thâo, knơ̆ng bruă mđĭ leh hnơ̆ng đru ƀiădah ăt dleh ruah mnuih mă bruă:

“Tơdah mă bruă, phung mă bruă dưi bi lông mđĭ hnơ̆ng prăk mlan, dưi bi siñê hră kuôl kă mă bruă djăp klei dưi dưn hlăm hdră bhiăn mă bruă. Êngao anăn, phung mă bruă lŏ mâo klei pah mni KPI, mnơ̆ng hlăm kruê kkiêng, knăm mơak, têt hat leh anăn hlue si boh sui thŭn mă bruă. Anôk hmei ăt ruah mnuih mă bruă hlăm lu hdră hâo hưn mtô mblang ƀiădah ară anei ka djăp ôh klei čiăng kơ mnuih mă bruă.”

 Hlue si klei hâo hưn mơ̆ng Anôk duah bruă mă čar Dak Lak, hlăm 6 mlan akŏ thŭn Anôk bruă mâo êbeh 50 anôk bruă duh mkra hgŭm hlăm êbeh 20 gưl duah bruă mă hŏng klei čiăng dŭm pluh êbâo čô mă bruă. Khădah snăn, boh sĭt lu mnuih dưi ruah amâo msĕ si klei čiăng ôh. Nguyễn Hoàng Giang, Khua Knơ̆ng bruă mnuih mă bruă kahan êka êkeh leh anăn ala ƀuôn čar Dak Lak mblang:

“Hrŏng ruah phung hriăm jing mta tal sa dleh dlan. Tal dua jing tơdah bi hriăm leh snăn anôk bruă duh mkra lŏ mtô mơh, amâo dưi yua ôh kyua anôk bruă kdrăp mnơ̆ng mtô bi hriăm, klei thâo hlăm sang hră ka djŏ ôh hŏng anôk bruă duh mkra čiăng.”

Ăt hlue si Nguyễn Hoàng Giang, thŭn 2024, čar Dak Lak gĭr mjing bruă mă kơ êbeh 30 êbâo čô. Čiăng dưi ngă hdră kñăm anei, dŭm anôk bruă mtô bruă brei mđĭ hnơ̆ng jăk mtô, ngă djŏ klei čiăng mơ̆ng anôk bruă duh mkra, mtô hlue si hră akâo blei, klei čiăng boh sĭt mơ̆ng anôk bruă. Kơ mnuih mă bruă brei mtô bi hriăm, mbŏ klei thâo hdră mnêč, klei thâo bruă leh anăn gĭr, pral duah bruă mă./.