Anei jing sa hlăm dŭm gru hmô hlue ngă mtăp mđơr êkei mniê leh anăn msir mgaih klei ngă jhat hŏng phung mniê leh anăn hđeh điêt.

Să Trường Sơn, kdriêk Quảng Ninh, čar Quảng Bình jing sa hlăm 8 să mâo Êpul bruă phung mniê gưl dlông Việt Nam ruah mă hluê ngă hdră êlan mrô 8. Tinei, klei bi hmô Êpul hâo hưn yang ƀuôn dưi mkŏ mjing hŏng 10 čô hgŭm. Êpul mâo bruă klam hâo hưn, mtrŭt mjhar mnuih ƀuôn sang bi mlih knhuah mĭn, hdră mă bruă, mđĭ kyar bruă duh mkra, lăm lui dŭm klei mĭn leh anăn klei bhiăn amâo mâo djŏ hlăm gŏ sang leh anăn yang ƀuôn, lui jih dŭm klei bhiăn mluk mgu, amâo mâo jăk. Aduôn Hồ Thị Thư, bản Đá Chát, să Trường Sơn, kldriêk Quảng Ninh, čar Quảng Bình brei thâo, êlâo dih, čiăng brei ung nao hgŭm hlăm dŭm mta bruă yang ƀuôn jing klei dleh dlan êdi. Ƀiădah, mơ̆ng hruê mâo dŭm mta bruă mơ̆ng êpul hâo hưn yang ƀuôn, ung ñu mâo lu klei mlih klă nik hlăm klei mĭn leh anăn bruă ngă. Ñu thâo đru mă bruă mta bruă hlăm gŏ sang čiăng kơ amai mâo thiăm mmông mă bruă yang ƀuôn hlăm alŭ:

“Êdei anăp kâo srăng mkŏ mjing klei kƀĭn mnuih ƀuôn sang hâo hưn kơ klei mtăp mđơr êkei mniê. Sitôhmô phung êkei ya bruă srăng ngă leh anăn ya bruă srăng đru kơ mô̆ anak brei mâo klei mtăp mđơr leh anăn klei găl hlăm gŏ sang. Tơdah ung amâo mâo săng, lŏ mdưm kơ mô̆, ngă klei ktrŏ kơ mô̆, ƀiădah tơdah mâo klei mtô hŏng klei mtăp mđơr êkei mniê srăng mâo boh tŭ kơ pô leh anăn kơ yang ƀuôn. Kâo pô srăng mblang kơ mnuih ƀuôn sang thâo săng hĭn jing dŭm ênuk thŭn êdam êra.”

 Amâo djŏ knŏng amai Thư ƀiădah lu phung mniê mkăn ti să Trường Sơn ăt brei thâo, leh nao hgŭm hlăm dŭm mmông hâo hưn mơ̆ng êpul hâo hưn ti alŭ, lu phung ung mâo leh klei mlih, thâo đru kơ mô̆ anak anak dŭm mta bruă êlâo dih knŏng phung amai adei mniê mă ngă. Lu klei mưng đưm dưi lui jih, ba wĭt klei êđăp ênang kơ dŭm gŏ sang leh anăn ƀuôn sang. Ăt ti să knông lăn anei, Êpul hgŭm bruă phung mniê čar ăt ba mdah dŭm klei bi hmô anôk bruă đăo knang, mtô mjuăt kơ klei mtăp mđơr êkei mniê ti alŭ leh anăn klei bi hmô Êpul bi mguôp păn kŏ mơ̆ng klei mlih ti Sang hră gưl tlâo knŭk kna rông ba hđeh sang hră mnuih djuê ƀiă, sang hră gưl 2 Trường Sơn, mbĭt anăn hlăm gưl să ăt mkŏ mjing thiăm 6 êpul hâo hưn yang buôn ti 6 alŭ. Aduôn Dương Thị Hồng Chuyên, khua kiă kriê êpul hgŭm bruă phung mniê Kdriêk Quảng Ninh, čar Quảng Bình brei thâo, hŏng dŭm êpul hâo hưn yang ƀuôn, dưi hâo hưn truh hŏng mnuih ƀuôn sang djuê ana Bru-Vân Kiều kơ dŭm klei bhiăn msĕ si: Hdră bhiăn mtăp mđơr êkei mniê, hdră bhiăn bruă knuă hlăm pưk sang, gang mkhư̆ klei bi dôk ung mô̆ mơ̆ng mda leh anăn dôk anak amiêt awa, dŭm klei hưn leh anăn klei thâo čiăng êdi kñăm đru kơ phung tuôm hŏng klei čăm biêng, klei ngă jhat hlăm gŏ sang:

“Hlăm wưng kơ anăp, Êpul hgŭm bruă phung mniê kdriêk srăng lŏ hrăm mbĭt hŏng Êpul bruă phung mniê să čiăng gĭt gai, mkŏ mjing dŭm klei bi hmô êpul hâo hưn mâo boh tŭ dưn hĭn. Boh nik êpul srăng knăm kơ bruă mtô bi hriăm, mđĭ klei thâo săng kơ klei mtăp mđơr êkei mniê, mkŏ mjing gŏ sang yâo mơak.

Êngao kơ bruă hâo hưn dŭm êpul hâo hưn lŏ mtrŭt mjhar, mđĭ ai mnuih ƀuôn sang nao hgŭm hlăm dŭm hdră, boh nik phung êkei hriăm mbĭt, đru mă bruă pưk sang, mkŏ mjing klei găl kơ phung mniê mđĭ hĭn ai dưi klei mtăp mđơr, bi hrŏ klei čăm biêng, ngă jhat hlăm gŏ sang, đru bi leh dŭm bruă klam mơ̆ng hdră ala čar kñăm mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng ba mdah leh. Aduôn Nguyễn Thị Kim Dung, Khua êpul bruă hâo hưn, Êpul hgŭm bruă phung mniê gưl dlông bn brei thâo, Klei bi hmô Êpul hâo hưn yang ƀuôn dôk hlăm hdră hluê ngă klei mtăp mđơr êkei mniê leh anăn mgaih msir dŭm boh klei mjêč hŏng phung mniê leh anăn hđeh mniê mơ̆ng Êpul hgŭm bruă phung mniê gĭt gai đru leh kơ 120 čô hgŭm phung amai adei să Trường Sơn, kdriêk Quảng Ninh dưi mâo klei hriăm kơ klei mtăp mđơr êkei mniê, lăm lui dŭm klei bhiăn mluk mgu leh anăn ƀrư̆ ƀrư̆ mđĭ kơhưm phung mniê hlăm gŏ sang, yang ƀuôn:

“Êwang kpleh êkei mniê leh anăn dŭm klei mĭn bi kah êkei mniê ăt adôk mâo hlăm yang ƀuôn, hlăm anăn boh nik jing krĭng mnuih djuê ƀiă. Kyuadah, mkă hŏng klei kah knar mbĭt kơ klei thâo săng ăt msĕ hŏng klei hdĭp mda mơ̆ng mnuih djuê ƀiă akôk mâo dŭm klei kpleh klă sĭt. Hmei hmăng hmưi dưi mđĭ klei thâo săng čiăng diñu mâo klei mlih, lăm lui hĕ dŭm klei mĭm anăn, lăm lui hĕ dŭm klei kpăk anăn čiăng mđĭ ai dưi, klei găl mđĭ lar bruă klam, klei thâo pô.”

Yap truh mlan 5 thŭn anei, čar Quảng Bình mkŏ mjing leh 32 êpul hâo hưn yang ƀuôn, 6 êpul bi mguôp păn kŏ mâo klei mlih leh anăn 19 anôk bruă đăo knang. Hŏng boh tŭ hluê ngă phŭn kčưm brei ƀuh, dŭm mta bruă mơ̆ng hdră mrô 8 dưi mkra mjing leh anăn hluê ngă nao klă hŏng boh sĭt hră tă mơ̆ng hdră, mâo knhuah kluôm dhuôm, klă klơ̆ng, găl guôp hŏng boh sĭt, ba wĭt boh tŭ dưn kơ phung mniê leh anăn hđeh ti dŭm alŭ wăl ngă hdră, đru mđĭ klei thâo săng, bi mlih knhuah mĭn, hdră ngă bruă./.