Să Trà Mai, kdriêk Nam Trà My, čar Quảng Nam mâo 4 alŭ hŏng 15 wăl mnuih ƀuôn sang. Kluôm să mâo êbeh 1.200 gŏ êsei, êbeh 5000 čô mnuih, hlăm anăn giăm 80% jing mnuih djuê ƀiă. Êbeh 2 thŭn êgao, ênoh prăk mơ̆ng dŭm hdră bruă hlăm Hdră kñăm ala čar mđĭ kyar bruă duh mkra ala ƀuôn krĭng mnuih djuê ƀiă leh anăn čư̆ čhiăng đru kơ krĭng čư̆ čhiăng anei mlih mrâo.100% gŏ êsei ti să dưi yua pui kmlă, jih jang sang hră ti să djăp hnơ̆ng čuăn ala čar gưl I. klei hdĭp mda mnuih ƀuôn sang krĭng čư̆ čhiăng dưi mkra mđĭ lu, prăk hrui wĭt kah knar giăm 38 êklăk prăk/thŭn/čô. Nguyễn Thanh Út, mnuih Ca Dong, K’iăng Khua bruă Đảng să Trà Mai, kdriêk Nam Trà My brei thâo, alŭ wăl mbha kơ phung knuă druh nao ti alŭ, ƀuôn đru kơ mnuih ƀuôn sang alŭ wăl pŏk ngă tŭ dưn hdră bruă hlăm Hdră kñăm ala čar mđĭ kyar bruă duh mkra- ala ƀuôn krĭng mnuih djuê ƀiă leh anăn krĭng čư̆ čhiăng.

 “Hmei jao bruă klam kơ phung mă bruă anăn jing ktuê dlăng tinăn. Tơdah mâo klei gun kpăk snăn hưn kơ Anôk dlăng bruă Đảng să, Hlăm Anôk bruă srăng bi trông ruh mgaih klei gun kpăk čiăng hlue ngă. Hŏng bruă Đảng alŭ snăn hlăm grăp thŭn mâo sơăi hdră êlan ngă bruă.”

Êbeh 2 thŭn êgao, Knŭk kna mtrŭn lu klei bhiăn, hdră êlan mrâo čiăng ruh mgaih klei dleh dlan gun kpăk kơ hră mơar, hdră kriê dlăng, mkŏ mjing hlue ngă Hdră kñăm ala čar mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng. Khădah snăn, ară anei ăt adôk mâo dŭm boh phŭn brei lŏ dơ̆ng mkra mlih. Klă klơ̆ng, 10 hdră bruă mơ̆ng Hdră kñăm ala čar mđĭ kyar bruă duh mkra- ala ƀuôn krĭng mnuih djuê ƀiă leh anăn čư̆ čhiăng mâo lu hdră bruă msĕ, dleh pŏk ngă. Msĕ si hdră bruă 1: Msir mgaih boh klei kƀah lăn dôk, sang dôk, lăn mkra mjing, êa jua leh anăn Hdră bruă 2: Čuăl mkă, dăp, hơĭt mnuih ƀuôn sang ti dŭm anôk čiăng êdi… mâo boh phŭn, hdră kñăm leh anăn phung msĕ. Lu alŭ wăl akâo kơ Knŭk kna mkra mlih, bi hrŏ dŭm hdră bruă mâo sa boh phŭn čiăng kƀĭn klei găl bi liê. Êngao anăn, mâo hdră bruă lu anôk bruă hlue ngă, lu boh phŭn mtŭk mtŭl plah wah gưl čar, kdriêk, să. Msĕ si Hdră bruă 8: Hlue ngă klei mtăp mđơr êkei mniê leh anăn msir mgaih klei mjêč hŏng phung mniê leh anăn hđeh điêt, mâo 3 anôk bruă hlue ngă jing Êpul hgŭm phung mniê, êpul êdam êra leh anăn anôk bruă djuê ana. Mnuih ƀuôn sang sa blư̆ mă bruă hŏng lu anôk bruă srăng luč lu hruê mmông, amâo tŭ dưn. Hlue si Trần Duy Dũng, Khua Knơ̆ng bruă sang čư̆ êa

kdriêk Nam Trà My, čar Quảng Nam, ênoh hră mơar lu đei, dŭm boh phŭn mtŭk mtŭl ngă kơ knuă druh să dleh tŭ mă, ngă huĭ soh tơdah pŏk ngă hdră bruă:

 “Đa đa knuă druh să lu blư̆ ksiêm dlăng hră mơar ka klă, leh anăn lu boh phŭn hră mơar amâo djŏ hŏng boh sĭt, dleh pŏk ngă, Kdriêk ktuê dlăng klei mĭn kơ phung knuă druh mđĭ ai tiê jhŏng mĭn, jhŏng ngă, jhŏng đua klam. Khădah snăn, ai tiê jhŏng mĭn, jhŏng ngă, jhŏng đua klam brei hlue si hdră kčah amâo djŏ ya klei čiăng ngă snăn ngă ôh. Knhal jih thŭn hmei dlăng hlăm boh tŭ msir mgaih čiăng ksiêm dlăng phung knuă druh, êpul bruă Đảng leh anăn Đảng viên.”

Thŭn 2023, čar Quảng Nam dưi mbha giăm 1.227 êklai prăk hlue ngă Hdră kñăm ala čar mđĭ kyar bruă duh mkra- ala ƀuôn krĭng mnuih djuê ƀiă. Truh jih mlan 10/2023, čar Quảng Nam brei čan giăm 310 êklai prăk, mâo giăm 50% hdră kčah thŭn; prăk brei čan kơ bruă knuă giăm 5 êklei prăk, mâo hlăm brô 10% hdră kčah. Anôk bruă Đảng čar Quảng Nam mbha kơ phung knuă druh, khua gĭt gai grăp mlan nao ti anôk bruă nah gŭ, ktuê dlăng hdră pŏk ngă hdră bruă, pral ruh mgaih klei gun kpăk, mđĭ pral hnơ̆ng brei čan. Trần Anh Tuấn, K’iăng Khua Knơ̆ng bruă sang čư̆ êa čar Quảng Nam, Khua Anôk bruă gĭt gai dŭm Hdră kñăm ala čar čar Quảng Nam brei thâo, čar anei kƀĭn ktuê dlăng hră mơar adôk mtŭk mtŭl, gun kpăk čiăng akâo kơ Gưl dlông ruh mgaih, mbĭt anăn pral mâo hdră msir đru kơ knuă druh ênưih thâo săng boh phŭn hră mơar:

 “Čar Quảng Nam mâo sa hdră mơar bi klin klă klơ̆ng, ƀhĭ klĭ hŏng grăp anôk hdră kñăm ala čar. Srăng mkŏ mjing sa hră mơar ktrâo lač mbĭt dŭm boh phŭn prŏng. Bi hŏng êpul klă klơ̆ng hlăm klei pŏk ngă bruă djŏ tuôm hŏng dŭm phŭn, dhar bruă srăng mâo hră mơar hjăn. Anôk bruă gĭt gai dŭm hdră ala čar ala čar srăng bi kƀĭn čiăng ktuê lăng djăp bruă klă klơ̆ng bi mklă bruă adôk gun kpăk ti anôk, ya klei ngă soh srăng bi ktlah klă klơ̆ng leh anăn čih hlăm sa hră mơar.”

Mđĭ pral hnơ̆ng brei čan hlăm Hdră kñăm ala čar mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng, čar Quảng Nam gĭt gai dŭm anôk bruă, alŭ wăl dưi jao prăk pral ngă bruă. Ti hdră bruă ka mâo klei ktrâo lač klă klơ̆ng, ênưih hlue ngă snăn alŭ wăl kƀĭn pŏk ngă hnưm, rơ̆ng bi leh hnơ̆ng. Hŏng klei gun kpăk hlăm lu hdră bruă ka dưi ruh mgaih, phung bi liê amâo dưi ôh tuh klei soh kơ hdră êlan, dôk čang guôn gưl dlông ktrâo lač ƀiădah brei pral duah hdră ruh mgaih, hlue ngă bi jăk hdră kñăm mơ̆ng hdră bruă./.