Hlăm lam “Sang hơuh mđao công đoàn” mrâo leh rŭ mdơ̆ng, ayŏng Trần Đình Thu, êpul 1, ƀuôn hgŭm Khánh Xuân, ƀuôn prŏng Ƀuôn Ama Thuôt, čar Dak Lak amâodưi mdăp ôh klei hơ̆k mơak, mgei ai tiê. Gŏ sang ayŏng Thu dleh dlan êdi, asei ñu pô ngă pô gak răng ti sang hră gưl 2 Trần Hưng Đạo, ƀuôn prŏng Ƀuôn Ama Thuôt, hnư hrui wĭt ƀiă, mô̆ amâo mâo bruă mă, dua čô anak điêt dôk nao sang hră mơar. 16 thŭn êgao, gŏ sang dôk êjai ti sang jưh mơ̆ng sang hră. Leh mkiêt mkriêm, lĭng čan dưi blei sa čuê lăn, ayŏng mâo Êpul hgŭm mnuih mă bruă ƀuôn prŏng đru brei 50 êklăk prăk mơ̆ng keh prăk “Sang hơuh mđao công đoàn”. Êpul khua kiă kriê sang hră leh anăn phung nai ăt đru brei čan amâo mâo mă prăk mnga brei kơ ayŏng mâo thiăm klei găl rŭ mjing sang dôk kjăp. Ayŏng Trần Đình Thu lač:

“Kâo hŏng gŏ sang lač jăk kơ klei uêñ mĭn mơ̆ng Êpul hgŭm mnuih mă bruă, mâo phung nai hlăm sang hră đru, brei kâo lĭng čan leh anăn đru kơ kâo dưi rŭ mdơ̆ng sang anei, gŏ sang kâo hơ̆k mơak êdi. Kâo ăt hmăng hmưi êpul hgŭm bruă srăng uêñ mĭn hĭn kơ phung mâo klei dleh dlan msĕ hŏng kâo.”

Yan mnga Giáp Thìn thŭn 2024 jing thŭn tal êlâo amĭ anak amai Trần Mai Hương Giang, ti ƀuôn hgŭm Ea Tam, ƀuôn prŏng Ƀuôn Ama Thuôt drông tết hlăm sang mrâo. Amai Giang brei thâo, hŏng prăk mlan nai mtô gưl 1, knŏng djăp hưn ƀơ̆ng grăp hruê leh anăn brei 2 čô anak nao sang hră. Lu thŭn êgao, 3 čô amĭ anak dôk ti sang hđăp amĭ ama. Akŏ thŭn 2023, amai mâo amĭ ama brei lăn mdơ̆ng sang leh anăn Êpul hgŭm mnuih mă bruă ƀuôn prŏng Ƀuôn Ama Thuôt đru sa kdrêč ngăn prăk mdơ̆ng sang. Kyuanăn, amĭ anak amai mâo sang dôk jăk leh anăn mâo klei hơĭt mă bruă knuă:

“Kâo lač jăk kơ jih jang phung đoàn viên công đoàn đru leh kơ amĭ anak kâo mâo sang dôk jăk leh anăn hơĭt anei”

Mrâo mă 50 êklăk prăk đru rŭ mdơ̆ng “Sang hơuh mđao công đoàn” mơ̆ng Êpul hgŭm phung mă bruă čar Dak Lak jao, Amai H’Ngiăm Niê, nai mtô ti sang hră hđeh điêt Hoa Thuỷ Tiên, să Dliê Ya, kdriêk Krông H’Nang amâo dưi mdăp ôh klei mgei ai tiê. Amai H’Nghiăm brei thâo, lu thŭn êgao, gŏ sang amai hdĭp hlăm sang sô siă leh anăn kniă. “Sang hơuh mđao công đoàn” hriê hŏng gŏ sang amai jing mnơ̆ng yuôm bhăn êdi, đru kơ gŏ sang mâo boh kdrŭt čiăng bi mlih klei hdĭp:

          “Lač jăk kơ gưl bruă nah dlông mkŏ mjing klei găl brei kâo mă prăk anei, kâo mgei ai tiê êdi, mơ̆ng êlâo truh kơ ară anei ka mâo ôh ênoh đru lu msĕ sơnei čiăng đru rŭ mdơ̆ng sang dôk. Kâo mĭn srăng mkra sang mâo ênoh hlăm brô 90 êklăk prăk. Êngao kơ prăk đru, hlăm sang mâo hlăm brô 15 êklăk prăk leh anăn lŏ čan prăk amai adei hlăm brô 20 êklăk prăk.”

Hdră “Sang hơuh mđao công đoàn” jing bruă tŭ dưn klă klơ̆ng hŏng klei hdĭp mnuih mă bruă, dŭm thŭn êgao, Êpul hgŭm phung mă bruă hur har gĭt gai leh anăn ktrâo lač dŭm gưl bruă Công đoàn ngă bruă hâo hưn, mtrŭt mjhar mkŏ mjing keh “Sang hơuh mđao công đoàn”. Knŏng mơ̆ng thŭn 2023 truh kơ ară anei, Êpul hgŭm phung mă bruă čar đru rŭ mdơ̆ng mrâo leh anăn mkra wĭt 129 boh sang hŏng ênoh êbeh 5 êklai prăk. Aduôn Nguyễn Thị Lý, k’iăng khua kiă kriê Êpul hgŭm phung ngă bruă čar Dak Lak brei thâo, mơ̆ng akŏ thŭn truh kơ ară anei, hlăm čar rŭ mjing mrâo 27 boh sang. Dŭm mlan adôk hlăm thŭn, dŭm gưl bruă Công đoàn čar Dak Lak srăng iêo krum, đru thiăm 73 boh “Sang hơuh mđao công đoàn” čiăng mđup brei kơ phung đoàn viên, phung mâo klei hdĭp dleh dlan amâo mâo sang dôk.

“Hlăm wưng kơ anăp, Êpul hgŭm phung nă bruă čar srăng lŏ gĭt gai hluê ngă klă dŭm mta phŭn hlăm bruă kriê dlăng klei tŭ dưn năng djŏ kơ mnuih mă bruă leh anăn mđĭ hĭn ai dưi ngă bruă kriê dlăng jăk hĭn kơ mnuih mă bruă. Tal 2 jing lŏ dơ̆ng mlih mrâo dŭm hdră kriê dlăng čiăng djŏ guôp hŏng klei čiăng mơ̆ng phung đoàn viên, hlăm anăn lŏ dơ̆ng rru mkŏ mjing keh prăk đru kơ phung ngă bruă ti čar Dak Lak čiăng hluê ngă jăk hdră Sang hơuh mđao công đoàn.

Dŭm boh sang dưi rŭ mdơ̆ng hŏng hdră đru “Sang hơuh mđao công đoàn” ti čar Dak Lak dưi đru leh kơ lu phung đoàn viên, mnuih mă bruă mâo klei hdĭp dleh dlan dưi bi hơ̆ĭt klei hdĭp, lŏ mâo thiăm ai dưi kpưn đĭ hlăm klei hdĭp./.