Mdê hŏng ai êwa adiê êăt ti êngao, hlăm boh sang mrâo ung mô̆ ayŏng amao A Hâm, Y Lược ti ƀuôn Vi Chring, să Hiếu, kdriêk Kon Plông, čar Kon Tum dôk hơuh mđao hŏng hơ̆k mơak kkuh drông thŭn mrâo. Amai Y Lược brei thâo, ung mô̆ ñu mrâo lui sang hđăp hŏng boh sang “huâng ti gah, tĭ ti ôk” amâo djăp krơ̆ng mđao kơ gŏ sang hlăm hruê adiê êăt đĭ dôk hlăm sang mrâo drông Tết. Gŏ sang hlăm gŏ êsei ƀun, dŭm thŭn kƀah êsei huă djam ƀơ̆ng, bi ara anei ung mô̆ diñu wĭt dôk hlăm boh sang prŏng siam ară anei jing sĭt, ba klei hơ̆k mơak, mgei ai tiê kơ diñu :

“Boh sang tal êlâo kâo tĭ jih leh. Ară anei knŭk kna đru snei snăn kâo mơk snăk. Kâo srăng gĭr čiăng hgao klei dleh dlan êdei anei srăng jăk ƀiă”

 Msĕ si ung mô̆ ayŏng amai A Hâm, Y Lược, mâo 6 gŏ êsei ƀun mkăn ti să Hiếu hŏng 29 gŏ êsei ƀun ti dŭm să: Đăk Ring, Đăk Nên, Ngọc Tem, Măng Cành, Măng Bút ti kdriêk Kon Plong mâo sa klei mơak drông Tết hlăm dŭm boh sang mrâo prŏng siam, kjăp. Amai Y Hố, sa hlăm dŭm gŏ êsei ƀun mâo Knŭk kna đru mkra sang kah mbha, kyua ung ñu mâo klei ruă, lŏ hdĭp hlăm boh sang tĭ rưč anăn mơ̆ng thŭn anei gŏ sang kƀah klei mơak nanao tơdah yan mnga hriê, yan Tết truh. Khădah snăn, Tết thŭn anei mâo klei bi mlih:

 “Sang hđăp tĭ, adiê hjan msah jih. Sang ƀun ka mkŏ mjing huă mnơ̆ng Tết ôh. Sang mrâo snăn mđao hĭn. Mâo sang mrâo snăn mkŏ mjing Tết mơak hĭn. Tết thŭn anei snăn đŭng đĭ, blei ƀêñ keŏ mâo sang mrâo”.

Hŏng hnơ̆ng đru mơ̆ng knơ̆ng prăk gưl dlông 40 êklăk prăk, prăk alŭ wăl 1 êklăk kơ grăp boh sang, čiăng kơ dŭm boh sang djăp hnơ̆ng čuăn: Tur khăng- jar, mtih khăng - čuôr khăng” bruă sang čư̆ êa, êpul hgŭm alŭ wăl  mâo lu hdră ngă klă sĭt đru kơ dŭm gŏ sang, msĕ si: Đru gŏ sang kơ hruê ai mă bruă; đru mnơ̆ng dhơ̆ng; b;ei mnơ̆ng dhơ̆ng yua aguah tlam mđup brei kơ gŏ êsei mnuih ƀuôn sang. Mâo bruă sang čư̆ êa, êpul êya mđing dlăng kơ dŭm gŏ êsei ktưn hưn čan thiăm 40 êklăk prăk đru mnga ƀiă hlue si Hdră mtrŭn 28 mơ̆ng Knŭk kna čiăng kơ boh sang prŏng, kjăp hĭn. A Thảo, K’iăng Khua knơ̆ng bruă sang čư̆ êa să Hiếu, kdriêk Kon Plông brei thâo, kyua anăn, dŭm boh sang mrâo mơ̆ng gŏ êsei ƀun Tết anei ăt thiăm hơuh mđao jăk mơak kyua klei khăp gŏ sang leh anăn êpul êya:

 “Knŭk kna đru, mnuih ƀuôn sang čan thiăm. Gŏ sang mâo ayŏng adei mă bruă rŭ mdơ̆ng đru hruê ai mă bruă đru kơ gŏ êsei ƀun. Hlăm anăn mâo phung êdam êra đru mdiăng čuah, boh tâo đru kơ gŏ sang čiăng kơ mnuih ƀuôn sang mâo sang kjăp, hơuh mđao”.

Thŭn 2023 mrâo êgao, čar Kon Tum brei čan 35 êklai prăk đru kơ gŏ êsei ƀun, giăm ƀun rŭ mdơ̆ng sang mrâo leh anăn mkra sang dôk mrâo. Hlăm anăn 174 gŏ êsei ka mâo sang dôk amâodah sang dôk amâo kjăp ti 3 kdriêk: Kon Plông, Ia H’Drai, Tu Mơ Rông mâo sang mrâo drông Tết hŏng sang rơ̆ng hơĭt kjăp mơ̆ng 20 thŭn kơ dlông.

U Minh Nam, K’iăng Khua anôk bruă djuê ana čar Kon Tum brei thâo hlăm thŭn anei leh anăn thŭn 2025 čar Kon Tum kčah hdră kñăm đru 350 gŏ êsei ƀun, giăm ƀun mkra sang dôk. Čiăng klei mơak hnưm truh hŏng dŭm gŏ sang mâo klei hdĭp dleh dlan brei đru, mơ̆ng dŭm hruê tal êlâo thŭn mrâo 2024, Anôk bruă djuê ana čar Kon Tum pŏk ngă leh bruă anei:

 “Dŭm anôk bruă kƀĭn pŏk ngă ktuê dlăng, bi mklă klei čiăng, phung dưi dưn čiăng lŏ dơ̆ng pŏk ngă hlăm thŭn 2024 - 2025. Gĭr bi leh leh anăn êgao hdră kñăm đru sang dôk kơ gŏ êsei ƀun, mnuih djuê ƀiă leh anăn gŏ êsei djuê ana Yuăn hdĭp mda ti să, alŭ dleh dlan hlue si Hdră kčah”

Mơ̆ng klei mđing dlăng mơ̆ng Đảng, Knŭk kna, dŭm gưl bruă sang čư̆ êa alŭ wăl hŏng klei khăp ayŏng adei, djuê ana, Tết anei dŭm gŏ êsei ƀun ti čar Kon Tum mâo thiăm klei mơak. Dŭm boh sang mrâo prŏng siam hơuh mđao msĕ si thiăm boh kdrŭt leh anăn đru kơ mnuih ƀuôn sang kjăp ktang mŭt hlăm thŭn mrâo Giáp Thìn 2024 hŏng klei jhŏng ktang, hgao klei dleh dlan hlăm bruă mkra mjing čiăng kơ klei hdĭp jăk mơak trei mđao./.