Hdră “Yan mnga knông lăn – Mđao ai tiê mnuih ƀuôn sang ” yan mnga Ất Tỵ 2025 mrâo mâo Knơ̆ng gĭt gai lĭng kahan knông lăn čar Gia Lai mkŏ mjing ti să Ia Pnôn, kdriêk Đưc Cơ, hŏng lu mta bruă yuôm bhăn msĕ si: Anôk čhĭ mnia ênoh 0 prăk, đŭng điŏ leh anăn klei kdŏ mmuñ mơak lăn čar mlih mrâo, mơak Đảng, mơak yan mnga Ất Tỵ 2025. Tinei, Knơ̆ng gĭt gai lĭng kahan knông lăn čar Gia Lai mđup brei leh 100 hnư mnơ̆ng kơ dŭm gŏ sang knŭk kna dlăng ba leh anăn gŏ sang mâo klei hdĭp dleh dlan. Mbĭt anăn, 20 čô hđeh sang hră hlăm hdră “Đru adei nao sang hră” leh anăn anak rông mơ̆ng dŭm kđông kahan knông lăn dưi mâo hnư mnơ̆ng tết. Mâo hnư mnơ̆ng, ayŏng Siu Kỳ, ti ƀuôn Bua, să Ia Pnôn, kdriêk Đức Cơ brei thâo:

“Kâo pô hơ̆k mơak êdi, hlăm thŭn mrâo, Knơ̆ng gĭt gai lĭng kahan knông lăn čar Gia Lai hriê ti să mđup brei hnư mnơ̆ng, mkă dlăng klei suaih pral kơ mnuih ƀuôn sang, mnuih ƀuôn sang hlăm să leh anăn 4 ƀuôn lač jăk kơ klei uêñ mĭn mơ̆ng Knơ̆ng gĭt gai lĭng kahan knông lăn leh anăn dŭm anôk bruă”

Ia Pnôn jing să knông lăn mơ̆ng kdriêk Đức Cơ, čar Gia Lai mâo lu hĭn jing mnuih djuê ƀiă, klei hdĭp adôk mâo lu klei dleh dlan. Ară anei, hnơ̆ng gŏ êsei ƀun mơ̆ng să adôk 16,49%. Hŏng hdră amâo lui kơ sa čô ti tluôn leh anăn rơ̆ng kơ grăp gŏ sang mâo tết, hdră ngă leh lu mta bruă klă klơ̆ng.

Ti čar Dak lak, Hdră “Yan mnga knông lăn – Mđao ai tiê mnuih ƀuôn sang ”ăt mrâo mâo Knơ̆ng gĭt gai lĭng kahan knông lăn čar mkŏ mjing ti să Ia Lôp, kdriêk Ea Sup. Mbĭt hŏng ai êwa mơ̆ng knăm mơak, dŭm ênhiang kdŏ khua luống mơ̆ng mnuih Thái msĕ hŏng klei akâo kơ angĭn hjan jăk, mâo lu boh kroh. Amai Hà Thị Tằm, ti ƀuôn Nừng Nhạt, să Ia Lốp brei thâo, anei amâo djŏ knŏng jing klei hlăp lêñ ƀiădah lŏ bŏ hŏng boh tŭ dhar kreh, ai tiê bi mguôp leh anăn jing wưng čiăng kơ mnuih ƀuôn sang bi êdah klei mbruă, ai tiê êpul êya:

“Pô hriăm mơ̆ng điêt, hluê aduôn aê, mtô kơ phung mda asei amâo mâo wơr knhuah gru djuê ana pô. Khua luống mâo boh tŭ akâo kơ angĭn hjan jăk, mă bruă đĭ kyar”

Mbĭt hŏng dŭm mta bruă dhar kreh, phung lĭng kahan knông lăn lŏ bi mguôp hŏng phung nai, aê mdrao mơ̆ng Sang êa drao Đại học Y dược Buôn Ma Thuột mkă dlăng leh anăn mbha êa drao amâo mâo mă prăk kơ mnuih ƀuôn sang. Amai Cầm Thị Sáu ti ƀuôn Đóng, mgei ai tiê lač:

“Lač jăk kơ lĭng kahan knông lăn mkŏ mjing leh hruê knăm anei čiăng kơ mnuih ƀuôn sang dưi nao mkă dlăng klei ruă, dưi đŭng điŏ, dưi nao hgŭm hlăm klei kdŏ mmuñ”.

Lăng Thị Nguyên, k’iăng khua bruă sang čư̆ êa să Ia Lôp, kdriêk Ea Sup brei thâo, să mâo êbeh 1.800 gŏ êsei, hŏng 15 djuê ana bi hdĭp mda, hnơ̆ng gŏ êsei ƀun êbeh 54%. Hdră “Yan mnga knông lăn – Mđao ai tiê mnuih ƀuôn sang ” ba leh kơ mnuih ƀuôn sang krĭng anei sa yan mnga hơup mđao:

“Hdră yan mnga knông lăn mđao ai tiê mnuih ƀuôn sang hŏng 1 să knông lăn mâo hdră anei jing sa klei hơ̆k mơak leh anăn klei mđĭ ai prŏng hŏng mnuih ƀuôn sang să Ia Lôp. Ba wĭt leh sa yan trei mđao kơ mnuih ƀuôn sang wưng tết Ất Tỵ”

Hlăm hdră, giăm 400 hnư mnơ̆ng dưi mđup brei kơ dŭm gŏ sang knŭk kna dlăng ba, gŏ sang ƀun, mbĭt hŏng sa boh sang bi mguôp mâo ênoh 100 êklăk prăk. Boh nik, dŭm hnư đru hriăm hră ăt dưi mđup brei kơ phung hđeh sang hră dleh dlan hriăm thâo, lŏ đru kơ digơ̆ nao hlăm êdei anăp. Đại tá Rơ Lan Ngân, k’iăng khua bruă kđi čar lĭng kahan knông lăn čar Dak Lak brei thâo:

“Ƀri wưng tết Ất Tỵ thŭn 2025, lĭng kahan knông lăn čar mtrŭt mjhar leh phung mâo ai tiê kmah mkŏ mjing lu hdră, hlăm anăn mâo hdră hmei ngă msĕ si anak rông kđông kahan knông lăn, đru adei nao sang hră, huôm braih klei khăp, sang mđao knông lăn đru kơ mnuih ƀuôn sang mâo klei găl drông tết. Hmei ăt hmăng hmưi klei khăp mơ̆ng mnuih ƀuôn sang knông lăn lŏ kjăp hĭn hŏng lĭng kahan knông lăn anăn mbĭt hŏng lĭng kahan knông lăn ngă jăk bruă klam răng mgang klei dưi kiă kriê knông lăn”.

Hdră “Yan mnga knông lăn – Mđao ai tiê mnuih ƀuôn sang ” yan mnga Ất Tỵ 2025 dưi mkŏ mjing ti dua kriêk Knông lăn mơ̆ng Gia Lai leh anăn Dak Lak amâo djŏ knŏng hnư mnơ̆ng ƀiădah lŏ jing klei bi mguôp lĭng kahan mnuih ƀuôn sang, hyuă kjăp klei mjĕ giăm plah wah êpul lĭng kahan knông lăn hŏng mnuih ƀuôn sang dŭm djuê ana, mkŏ mjing tur knơ̆ng kjăp kơ sa knông lăn êđăp ênang, trei mđao./.