Mnuih Mông lu hdĭp mda ti dŭm krĭng čư̆ čhiăng; prăk hrui wĭt mnuih ƀuôn sang êlâo dih knŏng knang hlăm bruă pla mjing pưk hma leh anăn rông mnơ̆ng. Kyua anăn, klei hdĭp mda dleh dlan; lu krĭng, klei ư̆ êpa dôk nanao. Khădah snăn, hlăm dŭm thŭn giăm anei, mâo lu gŏ êsei mnuih Mông mâo êdeh ô tô; rŭ mdơ̆ng sang kjăp hŏng mnơ̆ng yua yuôm… Gŏ sang ayŏng Chang A Hảng, ti ƀuôn Chu Va 8, să Sơn Bình, kdriêk Tam Đường (Lai Châu) jing sa klei bi hmô. Tuôm jing gŏ êsei ƀun hlăm ƀuôn, êlâo dih, klei hdĭp 6 čô hlăm gŏ sang grăp thŭn khăng kƀah nanao. Kyua mâo bruă Đảng, bruă sang čư̆ êa alŭ wăl hâo hưn, tă hdră mđĭ kyar bruă duh mkra leh anăn mâo găp djuê mđĭ ai, thŭn 2021, ñu jhŏng čan 200 êklăk prăk mơ̆ng knơ̆ng prăk, mbĭt hŏng ƀiă ỏăk mguôp, ñu klei leh 2 ênao êa hŏng ênhă giăm 200m2 rông 3 êbâo drei kan tầm. Êbeh 3 thŭn yap mơ̆ng leh čhĭ gưl kan tal êlâo, gŏ sang ñu amâo djŏ knŏng tlaih ƀun ôh ƀiădah lŏ jing gŏ êsei mâo klei hdĭp man dưn ti ƀuôn. Ayŏng Chang A Hảng brei thâo:

Ti anăp klei hdĭp gŏ sang kâo dleh dlan snăk, leh ƀuh mâo ayŏng adei ti Sa Pa hriê mưn lăn rông kan êa snăn kâo ksiêm hriăm.Ƀuh diñu rông jăk gŏ sang kâô ăt bi liê, ruah kan tầm ba rông leh anăn truh ară anei rông leh 3 thŭn. Ară anei bruă duh mkra gŏ sang mâo leh prăk hrui wĭt lu hĭn dŭm thŭn êlâo.

Ayŏng Sùng A Sử, mnuih ƀuôn sang ti ƀuôn Căng Há, să knông lăn Tung Qua Lìn, kdriêk Phong Thổ (Lai Châu) kah mbha, tơdah mnuih ƀuôn sang amâo tŭ ôh klei hdĭp dleh dlan, ƀiădah bi mlih klei mĭn, klei thâo săng čiăng gĭr ktưn tlaih ƀun, snăn bruă duh ƀơ̆ng Knŭk kna đru jing “grăn wah”, jing “anôk knang” kơ digơ̆ gĭr ktưn.

  Gŏ sang kâo mâo knŭk kna đru 18 êklăk prăk blei kbao mđai. Kâo yua leh prăk anăn blei kbao ba rông leh anăn leh wưng kriê dlăng snăn ară anei gŏ sang kâo mâo 2 drei, mđĭ ênoh kbao gŏ sang truh 3 drei. Kâo bi mni kơ Đảng leh anăn Knŭk kna mđing dlăng, đru brei kơ gŏ sang gĭr ktưn.

 Bi mklă bi hrŏ ƀun hơĭt kjăp jing bruă klam kđi čar phŭn, kyua anăn, Lai Châu mđing mđĭ kyar bruă mkra mjing mnơ̆ng dhơ̆ng, mđĭ kyar hlue si klei bhiăn anôk ba čhĭ, hrô kơ klei mĭn bruă duh mkra čŏng mkăp, điêt, hliê hlăm klei đĭ kyar; đru mđĭ bruă duh mkra leh anăn klei hdĭp mnuih djuê ƀiă. Boh nik mđing hâo hưn, mtô mblang kơ mnuih ƀuôn sang ai tiê čŏng gĭr, čŏng ngă, mjing klei čang hmăng gĭr ktưn tlaih ƀun, kpưn đĭ kơ mdrŏng jing sĭt. Trần Bảo Chung,  Khua Knơ̆ng bruă sang čư̆ êa kdriêk Phong Thổ, čar Lai Châu brei thâo, mơ̆ng dŭm hdră ngă anăn, kdriêk Phong Thổ hrŏ leh êbeh 5% ênoh gŏ êsei ƀun hlăm thŭn 2024.

Kdriêk gĭt gai dŭm să mkŏ mjing hdră kčah  klă klơ̆ng čiăng pŏk ngă; mbha klă phung ƀun, msĕ si gŏ êsei ƀun kƀah mnuih mă bruă snăn hmei đru kơ klei mkra mjing, amâodah đru kơ hnơ̆ng čuăn bi hrŏ ƀun tlaih ƀun…

 Mđĭ kyar ktang dŭm gru hmô bruă duh mkra djŏ guôp hŏng klei găl boh sĭt grăp alŭ wăl; mguôp hŏng bruă klam phung đảng viên brei nao êlâo, bi hmô kơ mnuih ƀuôn sang tui hriăm, hlue ngă. Hŏng hdră anei, bruă bi hrŏ ƀun ti čar čư̆ čhiăng, knông lăn Điện Biên ăt mâo lu klei tŭ dưn jăk. Êdah êdi msĕ si să Chà Nưa hlăm kdriêk knông lăn Nậm Pồ êlâo dih jing kdriêk ƀun hĭn čar Điện Biên leh anăn ăt dôk hlăm êpul kdriêk ƀun hĭn kluôm ala, ƀiădah ară anei jing leh anôk mngač kơ klei msir klei ư̆ êpa lui ƀun ƀin, mkŏ mjing krĭng ƀuôn sang mrâo ti knông lăn. Khoàng Văn Van,  Khua dlăng bruă Đảng să brei thâo:

Să Chà Nưa hmei ară anei knŏng mâo 4,3% ênoh gŏ êsei ƀun; thŭn 2015 snăn adôk 56% gŏ êsei ƀun, truh ară anei knŏng adôk êbeh 4% gŏ êsei ƀun. Hmei ƀuh boh tŭ lăm lui klei ƀun ƀin ti alŭ wăl ngă jăk.

Kơ hdră pŏk ngă čiăng mâo klei tŭ anei, Khoàng Văn Van brei thâo:

"Đảng viên nao êlâo, ƀuôn sang hlue êdei”, phung aê ama mơ̆ng đưm lač leh snăn. Čiăng mđĭ kyar bruă duh mkra ti să krĭng taih kbưi msĕ si Chà Nưa snăn phung knuă druh, đảng viên brei ngă êlâo, bi hmô kơ mnuih ƀuôn sang hlue ngă, anei jing klei hâo hưn pral hĭn, tŭ dưn hĭñ, lač ƀiădah amâo ngă snăn mnuih ƀuôn sang amâo hmư̆ ôh; pô ngă êlâo, ƀuh klei tŭ dưn snăn mnuih ƀuôn sang srăng hlue ngă.”

 Truh wưng anei, čar čư̆ čhiăng Yên Bái adôk êbeh 12.500 gŏ êsei ƀun, bi  knar hŏng 5,68%. Mkă hŏng ênoh gŏ êsei ƀun yap knhal jih thŭn 2023 jing hrŏ leh êbeh 7.600 gŏ êsei, bi knar hrŏ 3,48%. Sa hlăm dŭm hdră msir Yên Bái pŏk ngă čiăng mâo boh tŭ anei jing đru mnuih mă bruă krĭng ƀuôn sang hgŭm hlăm anôk mă bruă ti ala tač êngao, mbĭt anăn hưn mthâo bruă mă kơ phung mă bruă hlăm anôk bruă duh mkra hlăm ala čar. Lê Văn Lương,  K’iăng Khua Knơ̆ng bruă mnuih mă bruă, kahan êka êkeh leh anăn ala ƀuôn čar Yên Bái brei thâo, grăp thŭn, čar msir mgaih bruă mă kơ mơ̆ng 20.000 - 22.000 čô.

Hmei khăng hâo hưn mtô mblang hŏng mnuih mă bruă bi mklă ya bruă srăng hriăm, ya bruă srăng ngă; hdră kñăm hrriăm čiăng mâo bruă mă leh anăn hriăm čiăng mâo prăk hrui wĭt kơ gŏ sang, kơ pô leh anăn lăm lui klei ƀun ƀin.

 Yŭ Dưr - krĭng lăn knông lăn čar kwar, hlăk ƀrư̆ hruê bi mlih jăk siam. Mbĭt hŏng klei gĭr mnuih ƀuôn sang, dŭm hdră êlan mơ̆ng Đảng, Knŭk kna pŏk ngă amâô djŏ knŏng kƀĭn hlăm bruă duh mkra ôh, ƀiădah bi mlih jing bi hrŏ ƀun lu tĭng hlăm lu hnơ̆ng kčah mdê mdê, msĕ si bruă mă, hră ênua mdrao mgŭn, mtô bi hriăm, êa doh…  mjing boh kdrŭt, anôk knang kjăp kơ Yŭ Dưr dưi hlue ngă klei čang hmăng tlaih ƀun, gĭr ktưn kpưn đĭ kyar./.