Kdrêč êlan Yên Ninh dlông êbeh 100m, hlăm dŭm alŭ ƀuôn sang 8,9,10 ti ƀuôn hgŭm Yên Ninh, ƀuôn prŏng Yên Bái mâo dŭm pluh anôk bruă leh anăn sang hră. Krĭng anei hlăm akŏ mmông aguah, yang hruê dơ̆ng, tlam khăng gun kpăk hlăm êlan klông, ngă soh kơ klei êđăp ênang hlăm êlan klông leh anăn tuôm mâo leh klei bi drăm tinei. Mơ̆ng tur knơ̆ng ksiêm dlăng boh sĭt ti alŭ wăl, kahan ksiêm ƀuôn hgŭm Yên Ninh, ƀuôn prŏng Yên Bái kčĕ hŏng bruă Đảng, bruă sang čư̆ êa alŭ wăl mkŏ mjing gru hmô “Êpul čŏng kriê dlăng klei êđăp ênang hlăm êlan klông ti ƀăng jang sang hră gưl sa leh anăn gưl dua Yên Ninh", hŏng êpul hgŭm mâo: kahan ƀuôn, răng mgang alŭ ƀuôn sang, pô răng mgang hlăm sang hră leh anăn hlăm anăn phung kahan ksiêm jing phŭn. Trung tá Phạm Việt Đức, K’iăng Khua kahan ksiêm ƀuôn hgŭm Yên Ninh, ƀuôn prŏng Yên Bái brei thâo:

Êpul čŏng kriê dlăng mâo 8 čô. Grăp hruê srăng mphŭn mă bruă ti ƀăng jang sang hră êlâo kơ wưng phung hđeh mŭt hriăm hlăm brô 1 mmông leh anăn êlâo kơ wưng phung hđeh kbiă sang hră 1 mmông, kyua anei jing wưng phung amĭ ama drông lu, leh anăn ăt jing mmông phung hđeh kbiă sang hră - jing mmông gun kpăk, luč êđăp ênang lu snăk.

 Sang hră gưl dua Quang Trung ti êlan Quang Trung, ƀuôn prŏng Yên Bái mâo êbeh 1.400 čô hđeh sang hră. Wăt tơdah ƀăng jang ti djiêu êlan mtam, ƀiădah dŭm boh adŭ ti anôk kngư 10% dlông hlăm brô 70m. Grăp hruê truh mmông ruĕ hriăm, dŭm êbâo čô hđeh sang hră lŏ bi kluh mơ̆ng wĭt leh anăn dŭm êtuh čô amĭ ama dôk guôn drông anak hŏng êdeh êdâo khăng găn êrô hlăm ktuê êlan anei anăn khăng mâo klei gun kpăk hlăm êlan klông.

Čiăng rơ̆ng êđăp ênang, êngao kơ hâo hưn hŏng phung amĭ ama, hđeh sang hră leh anăn kơ phung hđeh sang hră, phung nai lŏ bi siñê ƀuăn rơ̆ng klei êđăp ênang hlăm êlan klông mơ̆ng akŏ thŭn hriăm, grăp hruê sang hră lŏ mbha Êpul Khua sang hră bi hgŭm hŏng phung mă bruă găk răng aguah tlam čiăng rơ̆ng êđăp ênang hlăm êlan klông ti ƀăng jang sang hră. Nai Nguyễn Thị Thúy Nga, K’iăng Khua sang hră brei thâo:

Sang hră mbha êpul kơ phung hđeh sang hră wĭt, nao ti ƀăng jang sang hră 2 êlan, sa jing hđeh sang hră êbat jơ̆ng, dua jing hđeh sang hră drŭt êdeh leh anăn brei phung amĭ ama, hđeh sang hră snăn dôk kbưi hŏng ƀăng jang 20 m. Hlue ngă rơ̆ng êđăp ênang hlăm êlan klông ti ƀăng jang sang hră, aguah mâo Khua sang hră, nai mtô, pô răng mgang leh anăn hđeh sang hră kăp ksiêm dlăng hlăm hruê kăm; yang hruê mâo  Khua sang hră, nai mtô, pô răng mgang hlăm sang hră ba hđeh sang hră găn êlan nah hnuă, leh anăn leh ruĕ hriăm snăn hđeh sang hră wĭt jih kơh phung nai wĭt.

Dŭm êpul kriê dlăng klei êđăp ênang hlăm êlan klông ngă bruă đru mguôp mđĭ klei thâo săng phung amĭ ama, hđeh sang hră hlăm bruă hlue ngă Hdră bhiăn răng mgang klei êđăp ênang hlăm êlan klông, đru kơ phung hđeh hơĭt ai tiê hĭn grăp blư̆ nao sang hră, bi hrŏ klei kpăk hlăm êlan klông. Adei Bùi Lương Nguyên, hđeh sang hră gưl 2 Yên Ninh, ƀuôn prŏng Yên Bái brei thâo:

Ti sang hră hmei ăt hmư̆ mtô kơ klei êđăp ênang hlăm êlan klông msĕ si mgăt êdeh snăn đua đuôn mgang kŏ, lu hdră kčah mkăn leh anăn phung hđeh ăt thâo hlue ngă kjăp. Tơdah nao sang hră, kâo ƀuh phung nai, phung kahan ksiêm ktrâo lač snăn kâo ăt ƀuh ƀăng jang sang hră jăk hĭn, hmei ăt hơĭt ai tiê hĭn.

Ti ƀuôn prŏng Yên Bái ară anei mâo 35 sang hră, hŏng êbeh 22 êbâo čô hđeh sang hră, hlăm ênoh anăn mâo lu sang hră êlan mŭt kbiă điêt, dleh găn êrô… Kyua anăn, bruă mtô bi hriăm ƀuôn prŏng Yên Bái khăng mâo hră mơar gĭt gai dŭm anôk bruă sang hră mđĭ ktang rơ̆ng êđăp ênang hlăm êlan klông kơ hđeh sang hră. Hà Yên Thái, K’iăng Khua adŭ bruă sang hră mtô bi hriăm ƀuôn prŏng Yên Bái, čar Yên Bái brei thâo:

Adŭ bruă sang hră - mtô bi hriăm ƀuôn prŏng khăng bi hgŭm kjăp hŏng Anôk bruă răng mgang klei êđăp ênang hlăm êlan klông čar čiăng hâo hưn mtô mblang Hdră bhiăn hlăm êlan klông kơ hđeh sang hră, gĭt gai dŭm sang hră hlăm mmông mâo lu êdeh mâo nai mtô, hđeh sang hră hlăm êpul kăp dlăng ti ƀăng jang sang hră mbha êlan, lač kơ hđeh sang hđeh sang hră mŭt hlăm sang hră, boh nik dŭm sang hră mâo hnơ̆ng kngư, drŭt êdeh đĭ trŭn, êdeh wai jơ̆ng amâodah êdeh êran hŏng pui kmlă.

 Hlue si klei ksiêm yap, mơ̆ng akŏ thŭn hriăm 2023 -2024 truh ară anei ka mâo ôh klei bi drăm hlăm êlan klông kjham mâo ti krĭng ƀăng jang sang hră ti ƀuôn prŏng Yên Bái. Ƀiădah ti anăp boh klei êdeh êdâo đĭ lu, boh nik êdeh ô tô, hlăk êjai êlan klông ti lu sang hră ka djăp ôh klei čiăng, ăt adôk mâo hđeh sang hră ngă soh Hdră bhiăn hlăm êlan klông, kyua anăn êngao kơ klei gĭr mơ̆ng sang hră, dŭm êpul bruă djŏ tuôm, grăp čô amĭ ama brei mđĭ klei thâo hlue ngă Hdră bhiăn hlăm êlan klông; mđing dlăng, mñă kơ anak čô pô hlue ngă djŏ dŭm hdră mtrŭn kơ Klei êđăp ênang hlăm êlan klông, kñăm mkhư̆ ƀiă hĭn klei amâo myun tăm mâo.