VOV4.Êđê- K’iăng khua lăn čar Võ Thị Ánh Xuân mbĭt hŏng êpul ngă bruă mrâo nao čhưn, mđup brei mnơ̆ng kơ anôk bruă gak răng, gang mkhư̆ klei ruă Covid 19 krĭng ktuê hang ksĭ lehanăn anôk gak răng, gang mkhư̆ klei ruă ti krĭng knông lăn lăn hang hlăm Kđông kahan răng mgang ƀăng jang knông lăn hŏng ala tač êngao Hà Tiên lehanăn mă bruă hŏng phung khua kiă kriê čar Kiên Giang kơ hdră gang mkhư̆ klei ruă Covid 19.

Ti dŭm anôk nao čuă čhưn, K’iăng khua lăn čar Võ Thị Ánh Xuân čuă êmuh leh klei suaih pral, klei hdĭp aguah tlam lehanăn hluê ngă bruă klam mơ̆ng phung knuă druh, lĭng kahan nao hlăm hdră gang mkhư̆ klei ruă tưp ti krĭng knông lăn. K’iăng khua lăn čar tŭ yap lehanăn bi mni klei gĭr msir mghaih djăp klei dleh dlan mơ̆ng êpul gang mkhư̆ klei ruă Covid 19 ti Hà Tiên; čang hmăng dŭm êpul djŏ tuôm lŏ dơ̆ng hgao klei dleh dlan, gĭr bi leh jih bruă klam. K’iăng khua lăn čar mtă kơ Kiên Giang brei pral hĭn hlăm bruă mkŏ dăp kdrăp mnơ̆ng, klei găl lehanăn êpul djŏ tuôm nao hlăm hdră gang mkhư̆ klei ruă tưp hlăm boh klei mrâo./.

                                                    Pô mblang: H’Nêč Êñuôl