Hlăm klei bi hdơr mơ̆ng phung khua kahan hđăp tuôm bi blah, dŭm hruê mlan bi blah thŭn 1975 ăt dôk nanao. Hŏng diñu, djăp anôk, djăp êlan ti Lăn Dap Kngư dôk bi mguôp hŏng klei bi blah ktang snăk leh anăn klei săn asei lu phung ƀĭng kahan. Trung tướng Đoàn Sinh Hưởng, Pô jhŏng ktang lĭng kahan yang ƀuôn, Khua hđăp Êpul kahan 4- hlăk anăn jing khua êpul mgăt êdeh sar mơ̆ng Êpul kahan 273, Êpul kahan 3, nao mblah Ƀuôn Ama Thuôt - ăt hdơr kơ mnĭt mmông hƀuê ênuk anăk.

 “Ti lăn anei mâo leh lu mnuih săn asei kơh mâo klei tŭ dưi anei. Klei kñăm Ƀuôn Ama Thuôt drei mtlaih êngiê leh jing klei kñăm phŭn mơ̆ng Hdră bruă leh anăn mbĭt anăn mblah dưi Ƀuôn Ama Thuôt mjing klei găl kơ klei gưl mblah dưi mkăn. Truh arră anei Ƀuôn Ama Thuôt, Dak Lak prŏng siam, kâo ƀuh mơak mơh, mơak kơ klei lŏ hdơr kơ phung ƀĭng kahan, lŏ hdơr kơ phung săn leh asei kơ lăn čar anei, kyua krĭng lăn anei.”

Mơ̆ng klei mblah dưi mâo klei  mlih mrâo anăn, kdrăn mblah kwar Dhŭng pral bi mlih, mjing tur knơ̆ng kơ klei bi blah êdei anăn truh kơ klei mblah dưi yan Mnga thŭn 1975. Hlue si phung ksiêm hriăm lĭng kahan, Klei bi blah Lăn Dap Kngư amâo djŏ knŏng jing sa klei mblah dưi kơ lĭng kahan ôh ƀiădah lŏ mâo lu klei hriăm yuôm bhăn kơ ênoh yuôm kơ klei gĭt gai bi blah leh anăn mkŏ mjing klei bi blah.  K’iăng nai prŏng, nai prĭn Hoàng Xuân Nhiên, Sang hră bruă lĭng kahan, pô thơ̆ng kơ klei ksiêm hriăm bruă lĭng kahan Việt Nam brei thâo, sa hlăm dŭm klei êdah kdlưn mơ̆ng Klei bi blah Lăn Dap Kngư jing klei dăp kahan, mjing klei găl kdrăn bi blah.

“Hlăm klei bi blah Lăn Dap Kngư snăn klei dăp kahan jing sa hlăm klei êdah kdlưn leh anăn anei ăt jing sa klei hriăm yuôm bhăn kơ bruă răng mgang ala čar mơ̆ng djuê ana drei hlăm ênuk mrâo. Hlăm hdră mđĭ kyar bruă lĭng kahan Việt Nam hlăm klei găl mrâo dôk lŏ dơ̆ng ksiêm hriăm, brei mđĭ lar hĭn ênoh yuôm phung nao êlâo ngă leh čiăng kơ drei mâo klei mblah dưi  kdrưh kơăm hĭn. Leh anăn răng mgang ala čar drei dôk nanao, răng mgang ala čar mơ̆ng hnưm, mơ̆ng kbưi.”

Êbeh 50 thŭn leh klei mblah dưi hƀuê ênuk, Lăn Dap Kngư mâo leh klei mlih mrâo. Dŭm krĭng lăn tuôm jing kdrăn bi blah ktang phĭt ară anei jing dŭm krĭng mkra mjing lŏ hma prŏng, lu ktuê êlan klông dưi pŏk mlar, dŭm wăl ƀuôn prŏng dôk grăp knhuang mkŏ mjing, klei hdĭp mda mnuih ƀuôn sang ƀrư̆ dưi mđĭ. Hŏng phung kahan tuôm hgŭm hdră bruă hlăk đưm, klei bi mlih mơ̆ng krĭng lăn dp kngư jing klei bi mklă mngač hĭn kơ klei yuôm bhăn mơ̆ng phung săn asei hlăm klei bi blah.

Đại tá Nguyễn Đức Tính, Khua anôk bi blŭ hrăm Tiểu đoàn 401 Dak Lak –anôk bruă tuôm mă bruă klam mkhư̆ phung roh đuê̆ mơ̆ng Dak Lak nao truh kơ Lâm Đồng hlăm klei bi blah Lăn Dap Kngư -  brei thâo:

 “Leh klei bi blah mtlaih êngiê snăn mơak snăk, truh ară anei tơdah mkă hŏng êlâo dih jing klei mdê snăk. Čang hmăng lăn čar đĭ kyar hlue si Hdră mtrŭn klei bi kƀĭn Đảng tal XIV snăn ƀuh Đảng leh anăn Knŭk kna gĭr đĭ kyar 2 ênoh mrô mơ̆ng thŭn 2026 leh anăn mprăp kơ klei ruah khua phung bi ala kơ Bruă kƀĭn ala tal XVI leh anăn Êpul gơ̆ng bruă ƀuôn sang dŭm gưl snăn pô đăo knang lăn čar pô srăng đĭ kyar, klei hdĭp anak čô pô srăng jăk mơak hĭn.”

Amâo djŏ knŏng jing klei ktưn hưn mơ̆ng phung kahan hlăk đưm ôh, Klei mblah dưi Lăn Dap Kngư dôk jing klei mơak kơ hđeh mrâo hruê anei. Amai Vũ Mai Hương, pô dôk hriăm nai prŏng Hdră bhiăn ti Sang hră gưl prŏng Hdră bhiăn Hà Nội -  anôk jưh ti Dak Lak brei thâo, klei yăl dliê mơ̆ng kdrăn bi blah hlăk đưm đru kơ ênuk mda asei thâo săng klă hĭn kơ ênoh yuôm klei êđăp ênang leh anăn bruă klam pô hŏng ƀuôn sang, lăn čar.

 “Mơ̆ng klei hriăm leh anăn klei yăl dliê kơ Klei bi blah Lăn Dap Kngư thŭn 1975, hmei jing phung mda asei thâo săng êlam hĭn kơ klei săn asei phung nao êlâo. Klei anăn đru hmei mpŭ hĭn kơ ênoh yuôm klei hnŭk êngiê hruê anei ăt jing thâo săng hĭn kơ bruă klam pô hlăm bruă đru mkŏ mjing, mđĭ kyar ƀuôn sang.”

51 thŭn êgao leh, ƀiădah ai tiê mơ̆ng klei mblah dưi Lăn Dap Kngư ăt lŏ dơ̆ng lar ktang. Mơ̆ng klei mblah dưi hlăk đưm truh kơ klei đĭ kyar hruê anei, krĭng lăn dap kngư dôk lŏ mkŏ mjing klei mrâo mrang hŏng klei čang hmăng gĭr ktưn, hŏng klei mĭn leh anăn klei đăo knang hlăm klei đĭ kyar kjăp mơ̆ng lăn čar.