Čiăng mprăp kơ kơ hruê mplĕ hră ruah phung bi ala Bruă Kbĭn ala gưl 16 leh anăn bi ala Êpul gơ̆ng bruă ƀuôn sang dŭm gưl wưng thŭn 2026 - 2031 mkŏ mjing hlăm hruê 15/3 anăp anei, aguah mbruê 12/3, ti sang Bruă Kbĭn ala, Khua Bruă Kbĭn ala Trần Thanh Mẫn, Khua êpul gơ̆ng ruah khua ala čar gĭt gai klei kƀĭn hŏng dŭm êpul bruă mơ̆ng Êpul gơ̆ng ruah khua ala čar.

Hluê anăn, ară anei kluôm ala mâo giăm 79 êklăk čô bi ala, ti êbeh 72 êbâo anôk mplĕ hră hŏng klei mkŏ mjing dưi mprăp ênŭm ênap mơ̆ng gưl dlông truh kơ alŭ wăl.

Blŭ hrăm hlăm mmông mă bruă, Khua Bruă Kbĭn ala Trần Thanh Mẫn brei thâo, khua Bruă Kbĭn ala mñă čiăng răng mgang kjăp klei êđăp ênang kơ klei ruah khua. Dŭm anôk bruă djŏ tuôm čŏng thâo klă boh sĭt, mđĭ hĭn dŭm hdră êlan răng mgang klei êđăp ênang ti dŭm anôk mplĕ hră, hmao ƀuh leh anăn msir dŭm boh klei bluh mâo, kñăm kơ klei bi kdơ̆ng, gang mkhư̆ dŭm klei hưn amâo mâo djŏ hlăm hla pŏk yang ƀuôn, amâo brei phung ƀai mjhua hŏng klei ruah khua čiăng bi rai klei êđăp ênang, grăp anôk mplĕ hră srăng êđăp ênang, mâo klei găl čiăng kơ phung bi ala dưi ngă klei dưi leh anăn bruă klam pô. Hlăm hruê mplĕ hră ruah khua 15/3, srăng rơ̆ng kơ klei hưn mdah pral, hmao, djŏ čiăng hưn mdah hŏng phŭng bruă kđi čar, Êpul khua bruă Đảng leh anăn dŭm anôk bruă mâo klei dưi, dŭm êpul bruă mơ̆ng Êpul gơ̆ng ruh khua ala čar čiăng mprăp djăp hdră êlan mgaih msir grăp boh klei năng ai mâo hlăm hruê ruah khua.