Ti ƀuôn hgŭm Ia Lốp, knông lăn nah yŭ čar Daklak, bi kñông hŏng čar  Mondulkiri (ala mtao Campuchia), dŭm hrue anei, boh klei kơ ruah khua mâo mñă leh hlăm dŭm klei bi kƀĭn ƀuôn, lehanăn klei bi lar hlăm loa bi kčăi asăp mơ̆ng ƀuôn hgŭm. Hŏng boh klei ruah khua, mnuih ƀuôn sang mâo klei bi trông kơ phung mgơ̆ng ruah, kơ klei mă bruă kơ klei thâo, lehanăn dŭm klei đru mguôp mơ̆ng grăp čô êlâo kơ klei nao mplĕ hră. Lang Văn Tuyển, Khua bruă Đảng ƀuôn  Chiềng, ƀuôn hgŭm Ia Lốp lač:

“Mơ̆ng klei hâo hưn, snăn mnuih ƀuôn sang mâo klei thâo săng kơ klei yuôm bhăn mơ̆ng klei ruah khua, lehanăn mnuih ƀuôn sang bŏ hŏng klei mơak, lehanăn dôk guôn truh hrue bi nao ruah khua djăp ênŭm.”

Hlăm grăp blư̆ klei ruah khua, mnuih ƀuôn sang krĭng knông lăn Daklak mâo leh lu klei čang hmăng lehanăn klei đăo knang kơ phung mgơ̆ng ruah srăng jing phung bi ala brei kơ pô. Tui si Vy Thị Hương, ƀuôn Chiềng, ƀuôn hgŭm Ia Lốp, mnuih ƀuôn sang čang hmăng kơ phung bi ala leh djŏ ruah srăng mâo klei mđing lu hĭn kơ dŭm bruă nah gŭ hlăm krĭng knông lăn, mđĭ kyar klei hdĭp mda mnuih ƀuôn sang, mjing bruă knuă mă hơĭt kjăp, đru bi răng mgang kjăp klei êđăp ênang ti krĭng knông lăn.

“Grăp tlam hmei hmư̆ nanao loa bi kčăi asăp hâo hưn kơ klei ruah khua. Mnuih ƀuôn sang čang hmăng mơ̆ng klei ruah khua anei dưi ruah phung mâo klei thâo, mâo knhuah dôk dơ̆ng ƀơ̆ng huă jăk, thâo uêñ đru kơ mnuih ƀuôn sang hlăm klei hdĭp mgi dih, lehanăn čang hmăng phung bi ala leh djŏ ruah mâo klei duh mĭn kơ klei hdĭp mnuih ƀuôn sang bi jăk hĭn”.

Mbĭt hŏng mnuih ƀuôn sang hlăm ƀuôn, phung nai mtô ti knông lăn mdưm leh lu klei čang hmăng kơ phung bi ala hlăm wưng tinăp. Huỳnh Thị Bích Vân, Khua sang hră hđeh điêt Thiên Nga, ƀuôn hgŭm knông lăn Ia Rvê brei thâo, grăp pŏk hră mplĕ jing mơĭt klei hmăng hmưi lŏ mâo thiăm dŭm hdră êlan mđing hĭn kơ bruă mjuăt bi hriăm ti krĭng knông lăn.

 “Hmei čang hmăng kơ phung bi ala leh djŏ ruah srăng mâo klei mđing hĭn kơ bruă sang hră mơar, boh nik hlăm klei mjuăt bi hriăm sang hră hđeh điêt ti krĭng knông lăn.”

Čiăng kơ klei ruah khua mâo ngă djŏ hŏng klei čoh čuăn, bruă prăp êmiêt ti dŭm alŭ wăl knông lăn čar Daklak hlăk dôk ngă nanao, mâo 4 boh ƀuôn hgŭm knông lăn ti hang, lehanăn 12 boh ƀuôn hgŭm ktue hang ksĭ. Ênoh mnuih nao ruah khua mâo čih yap klă lehanăn mƀlir ênŭm. Kahan răng mgang knông lăn bi hgŭm hŏng dŭm gưl bruă Đảng, bruă sang čư̆ êa  alŭ wăl mđĭ hĭn bruă hâo hưn, mtrŭt mnuih ƀuôn sang bi nao ruah khua. Trung tá Trịnh Xuân Tuyên, Khua bruă Đảng kđông kahan răng mgang knông lăn Ia Rvê lač:

 “Kđông bi hgŭm leh hŏng êpul bruă sang čư̆ êa mâo klei hâo hưn čiăng kơ mnuih ƀuôn sang păn kjăp klei dưi, bruă čuăn kơ pô bi nao ruah khua, lehanăn mtrŭt mnuih ƀuôn sang nao ruah bi djăp ênŭm.”

Đại tá Đỗ Quang Thấm, khua hlăm bruă kđi čar mơ̆ng kđông kahan răng mgang knông lăn čar Daklak brei thâo, mbĭt hŏng klei mtrŭt mjhar mnuih ƀuôn sang nao bi ruah khua, kahan răng mgang knông lăn hiu suang răng klei êđăp ênang. Kahan răng mgang knông lăn čar Daklak bi klă leh bruă răng mgang keli êđăp ênang , đru mjing klei jăk găl, hơĭt ai tiê hlăm hrue ruah khua.

“Hmei tiŏ nao lu hĭn knuă druh truh hŏng ƀuôn sang, boh nik hlăm dŭm anôk phŭn đru bi răng mgang klei êđăp ênang bruă kđĭ čar, răng mgang klei êđăp ênang yang ƀuôn ti knông lăn. Lehanăn mkŏ mjing dŭm klei hiu gak răng kjăp hlăm knông lăn, čiăng dưi mâo klei hơĭt sĭt kơ klei ruah khua anăp anei.”

 Mơ̆ng dŭm boh ƀuôn sang ti knông lăn, mnuih ƀuôn sang ti knông lăn Daklak hlăk dôk jing hrue mơak prŏng hŏng jih jang mnuih ƀuôn sang. Grăp pŏk hră mplĕ amâo mâo djŏ knŏng bi êdah klei dưi , lehanăn bruă klam mơ̆ng grăp čô mnuih, lehanăn lŏ dơ̆ng mơĭt klei đăo knang kơ phung bi ala brei kơ pô, jing klei mnuih ƀuôn sang čang hmăng, đru rŭ mdơ̆ng krĭng knông lăn knư̆ hrue knư̆ hơĭt