Êpul mă bruă mơ̆ng Anôk bruă gĭt gai lĭng kahan čar Dak Lak nao ksiêm dlăng bruă mprăp ruah khua leh anăn bruă klam srăng gak răng ti Anôk bruă kahan jơ̆ng 888, Êpul kahan 584 leh anăn lu să, ƀuôn hgŭm phŭn msĕ si să Ea Kar, să Ea Ô, ƀuôn hgŭm Ƀuôn Hô.

 Êpul ksiêm dlăng leh bruă rơ̆ng kơ klei bi msiam, dăp hla kak dŭm anôk, adŭ mplĕ hră kơ klei ruah phung bi ala Bruă kƀĭn ala gưl XVI leh anăn bi ala Êpul gơ̆ng bruă ƀuôn sang dŭm gưl, wưng 2026 – 2031. Êpul bi ala bi mni kơ klei mprăp mơ̆ng  grăp anôk bruă hlăm klei ksiêm dlăng, pŏk ngă jăk dŭm asăp mtrŭn, hdră kčah kơ bruă ruah khua, mkŏ mjing hâo hưn, mtô bi hriăm kơ phung knuă druh, lĭng kahan păn kjăp klei yuôm bhăn mơ̆ng klei ruah khua, rơ̆ng djŏ hdră kčah, êngiê leh anăn êđăp ênang.

Dŭm anôk bruă dôk mđĭ lar jăk klei bhiăn gak răng, păn kjăp boh klei, mprăp djăp êpul, kdrăp mnơ̆ng, hmao msir boh klei tăm mâo. Nao ksiêm dlăng ti Tiểu đoàn 303, Trung đoàn 584, Đại tá Đinh Văn Hưng, Khua dlăng bruă đảng Anôk bruă gĭt gai lĭng kahan čar Dak Lak mtă kơ dŭm anôk bruă lŏ dơ̆ng ngă jăk bruă mtô bi hriăm klei mĭn kđi čar; mđĭ lar jăk klei gak răng, mđĭ klei thâo răng, rơ̆ng êđăp ênang jih hnơ̆ng hlăm wưng mkŏ mjing klei ruah khua. Mbĭt anăn, mkŏ mjing jăk bruă hâo hưn, mjing ai êwa jăk mơak čiăng kơ knuă druh, lĭng kahan ngă klei dưi leh anăn bruă klam mnuih ƀuôn sang. Mtă kơ knuă druh, lĭng kahan anôk bruă lŏ dơ̆ng mđĭ lar ai tiê đua klam, bi hgŭm, bi leh jăk djăp bruă klam jao.