Dŭm hruê anei, ti djăp ktuê êlan să Đăk Ngok, kdriêk Đăk Hà, čar Kon Tum bŏ hŏng mnga lehanăn hla čhiăm gru ala čar. Êlâo kơ wưng kkuh drông Têt Djuê ana Ất Tỵ 2025, bruă Đảng să Đăk Ngok mkŏ mjing tŭ dưn Klei bi kƀĭn bruă Đảng tal III, wưng thŭn 2025 – 2030. Anei jing hdră kđi čar yuôm bhăn amâo djŏ knŏng mơ̆ng 239 čô Đảng viên ƀiădah lŏ jing klei đăo knang, klei čang hmăng mơ̆ng giăm 5.000 čô mnuih hlăm să. Lê Văn Y, alŭ Đăk Ngok, brei thâo:

 “Thŭn 2013 hruê mlan tal êlâo mkŏ mjing să Đăk Ngok mnuih ƀuôn sang dleh dlan, êlan klông kdlŭt kdlăt hmăi truh kơ klei hdĭp, brua duh mkra pla mjing mơ̆ng mnuih ƀuôn sang. Hdră 10 thŭn mkŏ mkra lehanăn mđĭ kyar hŏng sa êpul êya kiă kriê sa ai, hgŭm mguôp să Đăk Ngok ară anei đĭ kyar pral leh. Ară anei să dưi bi leh 19/19 hnŏng čuăn krĭng ƀuôn sang mrâo lehanăn klei hdĭp mnuih ƀuôn sang trei mđao, yâo mơak hĭn”.

Hlăm wưng păn bruă êgao, 12 anôk bruă Đảng hŏng 239 čô Đảng viên mơ̆ng să dDăk Ngok jing nanao hla čhiăm gru ba akŏ hlăm hdră mđĭ kyar bruă duh mkra ala ƀuôn, mkra mđĭ klei hdĭp mnuih ƀuôn sang. Truh kơ ară anei 4/7 alŭ mơ̆ng să dưi tŭ yap jing krĭng ƀuôn sang ênuk mrâo, 2 alŭ dưi tŭ yap krĭng ƀuôn sang mrâo hlăm alŭ wăl mnuih djuê ƀiă. Kluôm să ară anei knŏng dôk 8 gŏ sang ƀun. A Xen, djuê ana Sedang, ti ƀuôn Đăk Kđem, brei thâo:

 “Êlâo adih ƀuôn dleh dlan êdi, mơ̆ng 2 thŭn hŏng anei mnuih ƀuôn sang mâo klei thâo, đĭ kyar hĭn, thâo bi mlih hdră mkŏ dăp mnơ̆ng pla, mnơ̆ng rông. Mnuih ƀuôn sang lu jing pla mdiê lŏ lehanăn pla kphê. Mâo klei mđing mơ̆ng Đảng, knŭk kna, ară anei krĭng ƀuôn sang mâo leh klei kpưn đĭ jăk siam hĭn.

Wưng păn bruă êgao, hlăm ênoh 26 hnơ̆ng čuăn să Đăk Ngok dưi bi leh lu hnŏng čuăn yuôm bhăn, mâo boh tŭ êdah êdi msĕ si: Hnư hrui wĭt kah knar grăp čô mnuih mâo êbeh 70 êklăk prăk, mkŏ mkra să djăp hnơ̆ng čuăn krĭng ƀuôn sang mrâo kdlưn hĭn; ênoh gŏ êsei ƀun hrŏ pral. Phan Tiến Dũng, Khua bruă Đảng hlŏng klam Khua Anôk bruă mặt trận alŭ Đăk Bình brei thâo klei thâo hlăm hdră mkŏ mkra krĭng ƀuôn sang mrâo ênuk mrâo.

 “Anôk bruă Đảng gĭt gai hŏng hdră mtrŭn grăp mlan. Mtô mblang kơ mnuih ƀuôn sang hluê ngă djăp ênŭm hnơ̆ng čuăn. 19 hnơ̆ng čuăn ară anei dưi mâo lehanăn hmei jing leh sa krĭng ƀuôn sang mrâo ênuk mrâo akŏ thŭn 2024 mâo Anôk bruă sang čư̆ êa kdriêk tŭ yap. Mơ̆ng sa alŭ thơ̆ng kơ bruă lŏ hma akŏ wưng păn bruă knŏng mâo 55 êklăk prăk/čô snăn truh kơ knhal jih wưng păn bruă mâo leh giăm 80 êklăk prăk/čô. Hŏng klei gĭr mơ̆ng jih anôk bruă kđi čar ba wĭt leh klei trei mđao, yâo mơak kơ mnuih ƀuôn sang.

Bi mlih klei mĭn hlăm hdră duh mkra pla mjing mơ̆ng mnuih ƀuôn sang mjing leh ai êwa hdĭp mrâo kơ ƀĭng ngă lŏ hma Đăk Ngok. Să mkŏ mjing leh 6 êpul bruă lehanăn 2 êpul hgŭm. Bruă mđĭ kyar hdră duh mkra êpul êya đru mđĭ leh hnơ̆ng ngă bruă, boh tŭ yuôm mơ̆ng êbeh 450 ha mdiê, êbeh 1.600 ha kphê mbĭt hŏng dŭm êtuh ha ana boh kroh lehanăn ana mkra mjing êa drao. Hŏng klei gĭr mđĭ kyar bruă duh mkra – ala ƀuôn hơĭt kjăp, Klei kƀĭn phung bi ala bruă Đảng să Đăk Ngok wưng thŭn 2025 – 2030 bi mklă, mkŏ mkra să djăp hnơ̆ng čuăn krĭng ƀuôn sang ênuk mrâo, hnư hrui wĭt kah knar êbeh 78 êklăk prăk/čô… Aduôn Y Sương, Kơiăng khua bruă Đảng, Khua Anôk bruă sang čư̆ êa să Đăk Ngok brei thâo:

 “Bruă Đảng gĭt gai dŭm anôk bruă, êpul êya hŏng dŭm hdră bruă klă klơ̆ng čiăng hluê ngă grăp thŭn lehanăn grăp wưng. Iêu mtrŭt klei hgŭm mơ̆ng jih jang mnuih ƀuôn sang hlăm alŭ wăl čiăng mkŏ mkra krĭng ƀuôn sang ênuk mrâo. Mbĭt anăn mđĭ klei ba anăp mơ̆ng pô kiă kriê, pô djă akŏ lehanăn klei đua klam mơ̆ng pô đru kčĕ hluê ngă bruă. Mđing kơ dŭm bruă klam, hdră msir kñăm mđĭ kyar bruă duh mkra – ala ƀuôn, bruă lĭng kahan, răng mgang klei êđăp ênang, mkŏ mkra anôk bruă kđi čar hlăm alŭ wăl să. Mđing kơ hdră đru kơ ala ƀuôn, kơ bruă djuê ana, klei đăo bi knar lehanăn hơĭt kjăp.

Klei bi mlih kjăp ktang mơ̆ng să Đăk Ngok, kdriêk Đăk Hà, čar Kon Tum hlăm dŭm thŭn êgao jing sa klei bi êdah klă klơ̆ng kơ hdră kiă kriê djŏ, klă mơ̆ng Đảng lehanăn ai tiê hgŭm mguôp mơ̆ng mnuih ƀuôn sang. Lŏ čuê dŭm klei tŭ jing anăn, Đăk Ngok đăo knang srăng kkuh drông thŭn mrâo 2025 dưi mđing truh kơ mta kñăm mkŏ mkra krĭng ƀuôn sang sah mdrŏng, ênuk mrâo./.