Khua knŭk kna mñă klă, hdră êlan pral Ƀuôn prŏng HCM – Thủ Dầu Một – Chơn Thành jing hdră bruă mơ̆ng Đảng, klei mĭn mơ̆ng mnuih ƀuôn sang, anei jing asăp mtrŭn mơ̆ng ai tiê, čiăng lač jăk kơ mnuih săn leh asei mlei kơ ala čar kyua anăn brei hluê ngă jăk, amâo dưi lač amâo ư, amâo dưi lač dleh, amâo dưi lač ngă ƀiădah amâo čiăng ngă, amâo dưi bi kdung, brei hluê ngă kjăp, lač hlŏng ngă mtam, tơdah ngă brei ngă bi sĭt, mjing boh tŭ yuôm.
"Kâo mtă kơ čar Bình Phước jing tal êlâo, ƀuôn prŏng Hồ Chí Minh, Bình Dương hlăm tlâo mlan gưl anei brei ngă leh hră mơar mkŏ ktuê êlan Dak Nông truh ti Chơn Thành. Anei jing hdră bruă mơ̆ng Đảng, klei mĭn mơ̆ng mnuih ƀuôn sang, mâo mnuih ƀuôn sang dôk čang guôn, klei đĭ kyar dôk čiăng mjêč êdi. Kyua anăn, kâo mtă kơ jih jang amâo dưi bi kdung ôh, brei hluê ngă djŏ klei gĭt gai, ktrâo lač mơ̆ng Khua knŭk kna, hluê ngă kjăp, amâo djŏ lač lehanăn lui snăn, ai tiê drei lač brei ngă mtam, ƀuăn leh brei ngă bi sĭt, mjing boh tŭ dưn, anăn jing asăp mtrŭn mơ̆ng lam ai tiê lehanăn drei lač jăk kơ mnuih leh djiê, mnuih săn leh asei mlei kyua krĭng lăn anei hŏng dŭm bruă ngă klă sĭt amâo djŏ knŏng lač mang mă snăn, brei jih jang drei hluê ngă bi dưi. Kâo mtă kơ jih jang lŏ tĭng dlăng jih si srăng ngă hlăm hruê 2/9/2026 bi hdơr 81 thŭn hruê mkŏ mjing ala čar drei srăng dưi ba yua, kyua anăn brei jih jang drei gĭr mđĭ pral hdră hluê ngă”
Khua knŭk kna brei thâo, kluôm ala dôk mđing kơ 3 hdră bruă phŭn jing klei kơ hdră bhiăn, anôk bruă nah gŭ lehanăn mnuih mă bruă mâo hnơ̆ng thâo, Khua knŭk kna čang hmăng čar Bình Dương ba akŏ hlăm 3 hdră anei boh nik jing bruă kơ klei bhiăn đru mguôp bi mlih klei bhiăn mơ̆ng hdră bi hgŭm knŭk kna – êngao knŭk kna, duh bi liê ruh mtlaih jih klei gun kpăk, mbĭt anăn ba akŏ hlăm hdră mđĭ kyar bruă êlan klông bi hgŭm krĭng.
Hdră mkra êlan êran pral Ƀuôn prŏng HCM – Thủ Dầu Một – Chơn Thành kdrêč nao găn čar Bình Phước mâo boh taih dlông êbeh 52 km, mâo čuăl mkă hŏng 6 grông êlan êran pral, hŏng hnơ̆ng 100km/h. Anei jing ktuê êlan tal êlâo mkŏ Ƀuôn prŏng Hồ Chí Minh hŏng Bình Dương, Bình Phước lehanăn lŏ mkŏ truh hŏng êlan êran pral Gia Nghiã – Chơn Thành čiăng truh ti Lăn dap kngư.
Wưng tal 1, hdră anei dưi duh hŏng 4 grông êlan, êlan mjưh êdeh mjêč kluôm ktuê êlan anei, mâo boh prŏng 2,5m. Hŏng ênoh duh êbeh 8.833 êklai prăk, dưi hluê ngă hluê hdră bi hgŭm knŭk kna – êngao knŭk kna PPP. Wưng hluê ngă 36 mlan tĭng mơ̆ng klei kuôl kă mâo ba yua.
Ktuê êlan êran pral Ƀuôn prŏng HCM - Thủ Dầu Một - Chơn Thành mkŏ mơ̆ng ktuê êlan roh 3 Ƀuôn prŏng Hồ Chí Minh truh ti wăl krah Chơn Thành, čar Bình Phước, mjing boh kdrŭt mđĭ kyar kơ krĭng Ngŏ kwar Dhŭng, pŏk mlar wăl anôk ƀuôn prŏng lehanăn wăl tuh tia mkra mjing. Tơdah ktuê êlan êran pral Chơn Thành - Gia Nghĩa ngă leh, srăng bi hgŭm hŏng krĭng Lăn dap kngư, mjing klei bi hgŭm krĭng, mtrŭt mđĭ kyar bruă duh mkra – ala ƀuôn, rơ̆ng kjăp klei êđăp ênang bruă ala čar. Hdră bruă anei ăt đru hluê ngă mta kñăm 5 êbâo km êlan êran pral mâo Đảng, Knŭk kna kčah mtrŭn hlăm wưng thŭn 2021-2030.
Khua knŭk kna mñă klă, thŭn 2025 jing thŭn mtrŭt mđĭ kyar pral êdi mđing truh kơ Klei bi kƀĭn bruă Đảng kluôm ala tal XIV, Khua knŭk kna mtă kơ čar Bình Dương mkŏ mjing jăk Klei bi kƀĭn bruă Đảng dŭm gưl; mkŏ mjing jăk dŭm knăm mơak, knăm bi hdơr yuôm bhăn mơ̆ng Ala čar, đru mguôp hlăm bruă ksiêm wĭt bruă hluê ngă Hdră mtrŭn mrô 18 mơ̆ng Gưl dlông kơ bruă mkŏ dăp, bi khuăt anôk bruă, ksiêm dlăng dŭm mta kñăm, bruă klam čiăng ngă jăk hĭn, mâo boh tŭ dưn thŭn 2025 đĭ lu hĭn mkă hŏng thŭn 2024 lehanăn bi leh dŭm mta kñăm, bruă klam mơ̆ng kluôm wưng păn bruă.
Hŏng boh taih dlông êbeh 50 km mơ̆ng hdră bruă, Khua knŭk kna mtă brei bi hrŏ wưng hluê ngă, kah mbha 3 wưng (Aguah, tlam,mlam), 4 êpul mă bruă, pĭt hnêč huă ƀơ̆ng hnêč mơh čiăng truh kơ hruê 2/9/2026 srăng ba yua hdră anei mjing wăl anôk đĭ kyar, Khua knŭk kna đăo knang dŭm phŭn, dhar bruă srăng dưi ngă.
Khua knŭk kna mtă kơ ƀuôn prŏng Hồ Chính Minh, Bình Dương, Bình Phước, Tây Ninh brei hluê ngă djŏ wưng kčah, rơ̆ng hnơ̆ng tŭ jăk lehanăn mđing dlăng kơ klei hdĭp mnuih ƀuôn sang jao leh lăn pô kơ hdră bruă, hŏng ai tiê anôk dôk mrâo brei jăk hĭn anôk hđăp, mbĭt anăn mđĭ hdră bi kdơ̆ng hŏng klei bi liê pliă plia, klei ƀơ̆ng ngăn, brei mă bruă hŏng klei kpă mngač, kyua mnuih ƀuôn sang, kyua klei đĭ kyar mơ̆ng ala čar./.
Viết bình luận