Hlăm 2 hruê mkrah mă bruă knhal tuič mơ̆ng Klei bi kƀĭn, Anôk bruă kƀĭn ala srăng bi mklă lu Hdră bhiăn, Hdră mtrŭn yuôm bhăn mkăp kơ bruă mkŏ wĭt anôk bruă lehanăn mtrŭt mđĭ kyar bruă duh mkra – ala ƀuôn. Tuôr bi kƀĭn knhal tuič mkŏ mjing hlăm aguah knăm tlâo hruê 19/2.

Blŭ hrăm ti êpul aguah hruê 15/2, Khua gĭt gai Đảng Tô Lâm bi mklă: Bruă ba mdah Hdră mtrŭn lông ba yua dŭm hdră mtrŭn čiăng ruh mtlaih klei gun kpăk, dleh dlan hlăm hdră kreh knhâo, kdrăp mrâo lehanăn mlih mrâo jing yuôm bhăn, mjêč, rơ̆ng hdră ruh mtlaih pral dŭm klei gun kpăk lehanăn mtrŭt mđĭ hdră kreh knhâo, kdrăp mrâo lehanăn mlih mrâo. Khua knŭk kna Phạm Minh Chính mñă, čiăng đĭ kyar pral, hơĭt kjăp brei hluê ngă kjăp hdră kreh knhâo, kdrăp mrâo, mlih mrâo, mlih mrô jing klei čiăng êdi. Kyua anăn, brei ruh mtlaih klei dleh dlan djŏ tuôm kơ klei bhiăn, êlâo hĭn jing dŭm klei gun kpăk čiăng kơ Hdră mtrŭn mrô 57 pral mŭt hlăm klei hdĭp./.