Hlăm dŭm hruê êgao, ti anôk bruă ngă hră mơar knŭk kna Anôk bruă knơ̆ng Phú Quý, mâo nanao phung đru kơ mnuih ƀuôn sang. Mbĭt hŏng phung mda asei mkăn, Mai Nguyễn Anh Khoa, hđeh sang hră adŭ 11A3, sang hră gưl 3 Ngô Quyền dôk mtô, đru kơ mnuih ƀuôn sang čih anăn, yua tài khoản điện tử, ngă dŭm hră mơar knŭk kna hlăm kdrăp mrô…, Khoa brei thâo, ñu jing pô čŏng ngă bruă tinei 2 hruê kăm hŏng anei leh anăn mâo leh klei đru kơ 10 hră mơar. Bruă amâo mâo dleh ôh ƀiădah čiăng klei răng, tơdah hơăi lŏ wĭt mă mơ̆ng êlâo, luč mông.

Hmei đru kơ phung amiêt awa, neh prŏng čih dŭm klei hưn hlăm kdrăp mrâo, čiăng nao ti knơ̆ng prăk mă prăk đru grăp mlan. Lu klei đru djŏ tuôm hŏng hră gŏ êsei, bi klă jing gŏ sang ƀun amâodah hơăi čiăng mâo ênoh đru mơ̆ng anôk bruă Knơ̆ng.

Bi klă wưng tal êlâo mơ̆ng klei ngă bruă bruă sang čư̆ êa alŭ wăl 2 gưl srăng tuôm hŏng dŭm klei dleh dlan, kyuanăn, khua gĭt gai anôk bruă knơ̆ng hyuă kjăp leh anăn mkŏ mjing klei sa ai hlăm klei ngă bruă. Đỗ Thái Dương, khua bruă Đảng anôk bruă Knơ̆ng Phú Quý brei thâo, truh kơ ară anei mâo leh klei hơĭt mkŏ mjing leh anăn srăng lŏ bi ênŭm mnuih mă bruă, boh nik ti dŭm anôk adôk kƀah. Anôk bruă rơ̆ng kơ klei bi khuăt, ngă bruă tŭ dưn, grăp čô knuă druh, phung mă bruă knŭk kna klă sĭt jing pô mă bruă mơ̆ng mnuih ƀuôn sang.

Sa boh klei kñăm mơ̆ng anôk bruă knơ̆ng jing mkŏ mjing sa êpul knuă druh kpă ênuah, thơ̆ng kơ bruă čiăng ngă tur knơ̆ng kơ dŭm thŭn kơ anăp, mđĭ kyar anôk bruă knơ̆ng hlăm wưng kơ anăp.

Anôk bruă knơ̆ng Phú Quý bi klă, bruă duh mkra êa ksĭ lŏ dơ̆ng rơ̆ng jing bruă klma phŭn, nao mbĭt hŏng bruă hiu čhưn ênguê, mnia mblei. Gĭr truh thŭn 2030, hnư hrui wĭt kah knar grăp čô mâo 77 êklăk prăk, mkŏ hŏng thŭn 2025 đĭ 1,22 blư̆. Hnơ̆ng kan hdang trah mă mâo 30.000 – 35.000 tôn hlăm sa thŭn… Truh kơ ară anei, kluôm anôk bruă mâo 1.740 kŭm păn trah mă kan hŏng 7.566 čô mă bruă, hlăm anăn mâo 634 kŭm păn mă kan hnơ̆ng mơ̆ng 90CV kơ dlông. Sa êpul bruă trah mă kan ngă bruă tŭ dưn, nao mbĭt hŏng klei đru dŏng, tui duah leh anăn răng mgang klei dưi kiă kriê êa ksĭ plao ksĭ.

Anôk bruă knơ̆ng ară anei mâo 1 anôk mkra mđĭ kŭm păn, 4 anôk bruă đru nah tluôn, kdrŭn ksĭ dưi mđĭ ti gŭ 1000 tôn, dưi kƀĭn 150 kŭm păn trah mă kan, đuĕ kơ angŭn êbŭ dưi buh bi liê kluôm dhuôm ( wưng tal 2), kluôm ênoh duh bi liê êbeh 446 êklai prăk. Mrâo anei, ksiêm dlăng đa đa  hdră bruă ti plao Phú Quý msĕ si: kăm mran adôk jưh angĭn êbŭ, anôk rŭ mdơ̆ng bruă gang mkhư̆ klei klưh hroh hang ksĭ nah dưr plao ksĭ…Khua bruă sang čư̆ êa čar Lâm Đồng Hồ Văn Mười brei thâo:

Kâo lač klei bi klă mơ̆ng Phŭn bruă lŏ hma leh anăn mđĭ kyar krĭng ƀuôn sang êlâo dih ară anei jing Phŭn bruă lŏ hma leh anăn wăl hdĭp bi klă mkŏ rŭ mjing kdrŭn ksĭ anei jing yuôm bhăn êdi. Êngao kơ dêč kơ angĭn êbŭ kơ dŭm kŭm păn êjai mâo angĭn êbŭ trtuh tinei mâo krŭn ksĭ lu bruă đru kơ klei mđĭ kyar bruă duh mkra êa ksĭ.

Hŏng lu klei găl hlăm klei trah mă, rông kan hdang, hrui blei leh anăn mkra mjing kan hdang, Khua knŭk kna bi klă hdră êlan rŭ mjing plao ksĭ Phú Quý jing anôk trah mă, đru kơ bruă kan hdang, bi mguôp hŏng tui duah đru dŏng ti êa ksĭ. Mta kñăm mơ̆ng hdră, truh thŭn 2030, mkŏ mjing plao ksĭ Phú Quý jing anôk bruă trah mă, anôk bruă đru kơ bruă kan hdang, bi mguôp tui duah đru dŏng ti êa ksĭ mơ̆ng krĭng leh anăn hlăm lăn čar.

Blŭ hrăm gĭt gai kƀĭn kluôm bruă Đảng anôk bruă knơ̆ng Phú Quý gưl tla I, wưng thŭn 2025 – 2030 mrâo êgao, Y Thanh Hà Niê Kđăm, Khua hlăm bruă Đảng gưl dlông, khua bruă Đảng čar Lâm Đồng mñă ktang, mkŏ mjing anôk bruă knơ̆ng Phú Quý đĭ kyar ktang, bi mguôp kjăp mđĭ kyar bruă duh mkra hŏng bruă răng mgang klei êđăp ênang, bruă lĭng kahan hŏng bruă duh mkra, jing anôk bruă nah tluoon kjăp kơ plao ksĭ Trường Sa. Anôk bruă mâo bruă duh mkra êa ksĭ đĭ kyar, boh nik jing trah mă, mkra mjing kan hdang, mnia mblei đru kơ bruă kan hdang alŭ wăl ngŏ Dhŭng lăn čar leh anăn mđĭ truh kơ alŭ wăl Ngŏ Dhŭng Asi, mđĭ kyar bruă dŭ mdiăng ti êa ksĭ, nao mbĭt hŏng răng mgang wăl hdĭp mda leh anăn bruă hiu čhưn ênguê hơĭt kjăp. Y Thanh Hà Niê Kđăm mñă:

Hŏng dŭm klei găl leh anăn klei siam pô, Phú Quý dưi iêo jak ênoh lu mnuih ƀuôn sang mda asei mơ̆ng dŭm ƀuôn prŏng hriê mdĭp mda, čô̆ kơ bruă, ăt msĕ mơh mă bruă mơ̆ng kbưi hlăm lu mta bruă. Anôk bruă knơ̆ng čiăn uêñ mĭn, mkŏ mjing klei găl, rơ̆ng kơ bruă mkŏ mkra leh anăn dưn yua jăk ai dưi anei, hmao hŏng hdră đĭ kyar mrâo mơ̆ng krĭng plao ksĭ, mtrŭt mđĭ ai tiê mlih mrâo, mbruă mơ̆ng anôk bruă knơ̆ng.

Hlăm ênŭk kpưn đĭ mơ̆ng djuê ana, Phú Quý dôk bi lar ai ktang mơ̆ng lam, ba yua ai dưi mơ̆ng nah êngao čiăng mkŏ mjing anôk bruă duh mkra êa ksĭ, đĭ kyar pral, hơĭt kjăp, jing anôk bruă wăl krah mta 4 hlăm thŭn 2025.