Anôk bi kƀĭn mrô 2 mơ̆ng Sang êa drao prŏng krĭng Lăn dap kngư dŭm hruê anei siam hŏng êa mil hrah mơ̆ng hla čhiăm gru. Anei jing krĭng ruah khua mrô 44 hlăm Dhar bruă ruah khua Ƀuôn Ama Thuôt, čar Dak Lak. Aê mdrao Nguyễn Ngọc Thịnh, Kơiăng khua Sang êa drao, Khua êpul ruah khua ti Sang êa drao brei thâo, truh kơ ară anei, djăp hdră ruah khua mâo mprăp ênŭm leh.

“Jih jang mnuih mă bruă ti sang êa drao hmei mâo mbha leh hră mnuih ƀuôn sang. Ti sang êa drao mâo sa klei mdê jing mnuih ruă lehanăn gŏ sang dôk tinei, kyua anăn Êpul ruah khua mơ̆ng sang êa drao brei 2 čô knuă druh klam bruă hiu ba huôm mplĕ hră, ba truh grăp adŭ mdrao, jhưng đih jing mnuih ruă amâo dưi êbat dưi mplĕ hră ti jhưng đih mtam.

Pô mă bruă mdrao mgŭn Nguyễn Thị Cẩm Vân, brei thâo: Anei jing gưl tal 3 amao dưi mplĕ hră ti sang êa drao mtam. Khădah bruă dlăng kriê mnuih ruă amâo mâo mmông wăn, ƀiădah ñu ăt hnêč mmông wăn kreh nao mƀlir anăn phung mgơ̆ng ruah lehanăn klei hdĭp, bruă mă čiăng ênưih dưi tui dlăng klei hâo hưn. Amai čang hmăng dưi ruah mnuih mâo djăp klei thâo, kơhưm dưi ba mơĭt klei mĭn čiăng mơ̆ng pô.

“Kâo čang hmăng dưi ruah phung bi ala mâo kơhưm, klei thâo, jing kdrông mkŏ plah wah anôk bruă mdrao mgŭn hŏng Đảng, Knŭk kna. Diñu srăng bi ala kơ ai tiê, klei mĭn čiăng mơ̆ng hmei mbĭt anăn ba mơĭt klei blŭ mơ̆ng hmei dưi truh hŏng Đảng, Knŭk kna čiăng dưi mđing dlăng, duh kơ anôk bruă nah gŭ ti sang êa drao dưi jăk hĭn čiăng mkăp kơ klei suaih pral mơ̆ng mnuih ƀuôn sang čar Dak Lak jăk hĭn.

Sang êa drao prŏng krĭng Lăn dap kngư mâo 12.000 jưh mdrao lehanăn êbeh 1.250 čô knuă druh, nai aê mdrao lehanăn mnuih mă bruă. Hlăm hruê ruah khua mgi, knuă druh, mnuih mă bruă mbĭt hŏng dŭm êbâo čô ruă dôk mdrao, găp djuê dôk kiă ti sang êa drao srăng nao mplĕ hră ti anôk ruah khua mrô 44 hlăm Dhar bruă ruah khua Ƀuôn Ama Thuôt, čar Dak Lak. Hŏng klei mprăp ênŭm, hdră ruah khua ti anôk “mdê hjăn” anei srăng mkŏ mjing tŭ dưn, êđăp ênang, djŏ hdră./.