Ti ƀuôn hgŭm Phan Thiết, ƀuôn hgŭm knơ̆ng krĭng êa ksĭ čar Lâm Đồng, dăl hlăm dŭm hrue êgao kơ klei ruah khua mâo nanao klei mjhĭt m’uăt hlăm mnuih ƀuôn sang. Mnuih ƀuôn sang nao bi ksiêm dlăng anăn, lehanăn klei hdĭp phung mgơ̆ng ruah, mbĭt hŏng jih jang hdră mă bruă mơ̆ng phung mgơ̆ng ruah, kñăm pioh ruah mnuih mâo klei năng. Hŏng mnuih ƀuôn sang tinei, klei nao ruah khua amâo mâo djŏ knŏng jing klei tŭ dưn kơ pô ƀiădah lŏ jing bruă klam mơ̆ng sa čô mnuih hŏng lăn čar. Trần Hữu Trung, ti anôk dôk mrô  14, ƀuôn hgŭm Phan Thiết, lač:

“tal êlâo jing hlăm gŏ sang găp djuê lehanăn mnuih riêng gah, alŭ anôk dôk anei hlăm knăl kjuh dăp mmông nao ruah khua bi ênŭm. Tinei mơ̆ng đưm leh truh mmông nao bi ruah truh yang hrue dơ̆ng jing ênŭm leh čang hmăng  mâo ruah mnuih mâo knhuah dôk dơ̆ng ƀơ̆ng huă jăk, thâo bruă pioh kiă kriê hlăm wưng tinăp, jing mlih mrâo klei mĭn, snăn mnuih ƀuôn sang mơak snăk.”

Hlăm ai êwwa mơak mñai klei ruah khua ti krĭng čư̆ čhiăng čar Lâm Đồng. Ti ƀuôn  Long Lanh, ƀuôn hgŭm Lạc Dương, anôk mnuih ƀuôn sang djuê ana K’ho hdĭp mda, jih jang boh klei kơ klei ruah khua mnuih ƀuôn sang mđing duah, bi yăl dliê hlăm yang ƀuôn, hlăm gŏ sang. Amai Dà Ju K’Tim, brei thâo:

“Êjai bi tuôm hŏng phung riêng gah, klei bi blŭ hrăm tal êlâo jing djŏ tuôm kơ klei ruah khua. Kơ hrue ruah khua, kơ phung mgơ̆ng ruah tal anei, lehanăn kơ anôk mplĕ hră. Wưng anei jing mdê hĭn kâo čang hmăng  jih jang mnuih bi ruah phung mâo klei thâo, mâo knhuah dôk dơ̆ng ƀơ̆ng huă jăk, mâo klei mĭn mlih mrâo čiăng dưi rŭ mdơ̆ng lăn čar lanăn duh mĭn kơ mnuih ƀuôn sang.”

Mơ̆ng krĭng êa ksĭ hlŏng truh hlăm krĭng čư̆ čhiăng čar Lâm Đồng, jih jang wir phă klei ruah khua phung bi ala bruă kƀĭn ala gưl 16 lehanăn Êpul gơ̆ng bruă ƀuôn sang dŭm gưl wưng păn bruă 2026 - 2031 hŏng klei đăo knang lehanăn klei čang hmăng prŏng. Hrue   15/3 êbeh 2,7 čô mnuih hlăm čar Lâm Đồng hŏng grăp pŏk hlă mplĕ, bi hrŏng ruah mnuih bi ala brei kơ pô hŏng klei năng, jing mnuih mâo knhuah dôk dơ̆ng ƀơ̆ng huă, mnuih mâo klei thâo, mnuih hur har pioh mă bruă kơ lăn čar, lehanăn kơ mnuih ƀuôn sang./.