Krĭng mrô 6, ƀuôn hgŭm Quy Nhơn ară anei mâo 67 boh hô̆ mran mă kan hŏng êbeh 200 čô trah mă kan kreh hiu mă kan sui hruê ti êa ksĭ. Dŭm hruê giăm anei, leh hô̆ mran wĭt leh gưl hiu mă kan, Mai Thị Gái, Khua anôk bruă mặt trận alŭ 6 dôk ti anôk krañ hô̆ mran čiăng mtô mblang kơ hdră ruah khua. Tinei, ñu mbha hră, hưn mthâo kơ hruê mmông ruah khua, mbĭt anăn mtrŭt mjhar mnuih ƀuôn sang mkŏ dăp hruê mmông čiăng hluê ngă klei dưi, klei đua klam mơ̆ng mnuih ƀuôn sang. Hŏng dŭm hô̆ mran dôk ti êa ksĭ, ñu mtrŭt mjhar gŏ sang iêu pô mran hluê kdrăp hâo hưn čiăng mtă hnưm wĭt kơ hang čiăng nao hgŭm hlăm hruê ruah khua. Mai Thị Gái brei thâo:

“Grăp hruê, êpul ruah khua nao truh grăp sang mtô mblang, mtrŭt mjhar mnuih ƀuôn sang mkŏ dăp hruê mmông nao mplĕ hră ruah khua. Phung mgơ̆ng ruah ti ƀuôn hgŭm Quy Nhơn ăt dưi hưn mthâo čiăng mnuih thâo klă klei hâo hưn, dưi ruah mnuih năng mŭt hlăm anôk bruă kƀĭn ala”.

Dưi mtô mblang klă anăp, lu mnuih trah mă kan thâo săng klei yuôm mơ̆ng grăp pŏk hră lehanăn mprăp nao hlăm hruê ruah khua. Pô trah mă kan Nguyễn Văn Tuấn, ti alŭ 6, ƀuôn hgŭm Quy Nhơn brei thâo, ayŏng adei hlăm hô̆ mran mkŏ dăp leh bruă čiăng dưi wĭt kơ hang hlăm hruê ruah khua.

“Mprăp truh hruê ruah khua 15/3, hmei srăng hluê ngă, mdei sa hruê čiăng aguah ưm nao ruah khua ti alŭ wăl.

Mbĭt hŏng hdră mtô mblang hŏng pano, áp phích ti krĭng ruah khua lehanăn dŭm ktuê êlan phŭn, bruă knŭk kna lŏ mtrŭt mđĭ hdră mtô mblang klă anăp ti krĭng kă krañ hô̆ mran, đru kơ mnuih ƀuôn sang thâo klei yuôm bhăn mơ̆ng hdră ruah khua. Mơ̆ng anăn, lu mnuih trah mă kan mkŏ dăp leh hruê mmông wĭt ti hang nao mplĕ hră. Nguyễn Đức Toàn, Khua anôk bruă ruah khua ƀuôn hgŭm Quy Nhơn brei thâo, alŭ wăl pŏk leh lu hdră msir čiăng rơ̆ng kơ mnuih trah mă kan, mnuih ƀuôn sang hiu mă kan sui hruê hlăm êa ksĭ dưi hluê ngă ênŭm klei dưi ruah khua mơ̆ng pô.

“Lu mnuih trah mă kan mâo sang ti alŭ wăl sơaĭ. Dŭm krĭng ƀuôn prŏng lehanăn êpul ruah khua pŏk ngă truh grăp gŏ sang, mbha hră nao ruah, boh nik jing mbha hla čhiăm gru kơ mnuih trah mă kan čiăng kkuh mơak hruê ruah khua. Dŭm gŏ sang ăt hưn mthâo čiăng kơ mnuih trah mă kan thâo, mkŏ dăp hruê mmông čiăng hruê 15/3 dưi nao ruah khua djŏ hdră mtrŭn.

Hluê si Bùi Duy Ninh, Kơiăng khua knơ̆ng bruă sang čư̆ êa ƀuôn hgŭm quy Nhơn Đông, hdră mtô mblang, mtrŭt mjhar mnuih trah mă kan nao hgŭm ruah khua ti alŭ wăl mâo klei mđing dlăng. Ƀuôn hgŭm gĭt gai dŭm krĭng, êpul ruah khua bi hgŭm hŏng êpul hiu mă kan thâo klă wưng nao trah mă kan čiăng hưn mthâo djŏ guôp. Mbĭt anăn mđĭ hdră mtô mblang hlăm kdrăp bi kčaĭ asăp, dŭm mmông bi mjĕ mjuk êpul êya lehanăn ti dŭm kdrŭn, anôk kă krân hô̆ mran mtam.

“Mnuih hiu trah mă kan ti ƀuôn hgŭm mâo lu lehanăn kreh nao ti êa ksĭ sui hruê kyua anăn bruă mtô mblang, mtrŭt mjhar kơ hdră ruah khua mâo klei mđing dlăng. Mbĭt anăn ăt mtrŭt mjhar mnuih hiu trah mă kan mkŏ dăp hruê mmông nao êa ksĭ djŏ guôp čiăng dưi nao mplĕ hră ênŭm.

Hŏng klei nao hgŭm mơ̆ng kluôm anôk bruă kđi čar, mnuih hiu trah mă kan ti dŭm alŭ wăl ktuê hang ksĭ mơ̆ng čar Gia Lai thâo săng leh klei dưi, bruă klam mơ̆ng pô, pral mkŏ dăp hruê mmông nao hgŭm hlăm hruê mơak jih jang mnuih ƀuôn sang. Pŏk hră mplĕ mơ̆ng mnuih hiu trah mă kan srăng đru mguôp yuôm bhăn hlăm klei tŭ jing mơ̆ng hruê ruah khua anăp truh./.