Ti ƀuôn Bàu Trúc, ƀuôn hgŭm Ninh Phước, anôk mâo êbeh 95% mnuih ƀuôn sang jing djuê ana Chăm, klei hâo hưn kơ bruă ruah khua mâo ngă truh hŏng grăp gŏ sang. Mnuih mâo k’hưm hlăm ƀuôn msĕ si Đàng Chí Quyết hur har truh hŏng grăp gŏ sang, čiăng mtrŭt mjhar mnuih ƀuôn sang nao mplĕ hră. Ñu ktrâo atăt kơ mnuih ƀuôn sang ksiêm dlăng kơ klei hdĭp bruă knuă mnuih mgơ̆ng ruah êlâo kơ pô nao ruah khua. Đàng Chí Quyết lač:

“Jing mnuih hlăm ƀuôn sang anei, snăn kâo thâo kjăp kơ klei bhiăn hdĭp hlăm ƀuôn. Kyuanăn kâo nao truh hŏng grăp gŏ sang, čiăng mtrŭt mjhar boh nik jing hŏng pô sang, khua kiă kriê klei đăo, khua djuê. Mơ̆ng anăn diñu lŏ mtă mtăn kơ mnuih hlăm gŏ sang lehanăn găp djuê pô thâo kơ hdră êlan klei ruah khua, hrue ruah khua, čiăng kơ mnuih ƀuôn sang thâo ruah mnuih mâo klei thâo, mâo klei dôk dơ̆ng ƀơ̆ng huă jăk djŏ hŏng klei mnuih ƀuôn sang čang hmăng.”

Mbĭt hŏng mnuih ƀuôn sang djuê ana Chăm, wưng anei djăp alŭ wăl hlăm krĭng čư̆ čhiăng čar Khánh Hòa ăt mđĭ hĭn klei hâo hưn, mtrŭt mjhar kơ klei ruah khua. Ti să Trung Khánh Vĩnh, mâo leh lu hdră mtrŭt mjhar djŏ hŏng knhuah bhiăn mnuih djuê ƀiă. Knơ̆ng bruă sang čư̆ êa ƀuôn hgŭm bi mguôp hŏng phung khua mduôn, Khua ƀuôn čiăng hlak mblang hdră bhiăn ruah khua hŏng klei blŭ Raglai, lehanăn ktrâo atăt mnuih ƀuôn sang ksiêm dlăng ênoh anăn phung mgơ̆ng ruah. Mâo lu klei bi hmô kơ jih jang bruă ruah khua. Cao Thị Ngọc Thanh, khua knơ̆ng bruă sang čư̆ êa ƀuôn hgŭm Trung Khánh Vĩnh lač:

“Hmei mkŏ mjing klei bi kƀĭn dhar kreh, kdŏ muiñ, tông čing čhar čiăng iêo jak mnuih ƀuôn sang, mơ̆ng anăn bi mguôp hŏng bruă hâo hưn mtă mtăn kơ klei ruah khua. Mơ̆ng bruă ngă snăn, mnuih ƀuôn sang thâo săng bruă klam hŏng klei ruah khua mơ̆ng grăp čô mnuih, lehanăn lŏ jing hrue mơak kơ jih jang mnuih.”

Dŭm hdră mă bruă hŏng klei knhêč anăn mơ̆ng čar Khánh Hòa mâo đru leh mnuih ƀuôn sang tui duah hdră ngă čiăng hrŏng ruah mnuih mâo klei thâo, maoa knhuah dôk dơ̆ng ƀơ̆ng huă jăk. Ai êwa klei ruah khua mơak mñai dơ̆ng mơ̆ng krĭng čư̆ čhiăng hlŏng truh hlăm krĭng mnia hang ksĭ čar Khánh Hòa, mprăp kơ hrue mơak jih jang mnuih./.