Hlăm wưng êgao, mnuih djuê ƀiă leh anăn krĭng čư̆ čhiăng kluôm ala gĭr leh hlăm bruă pŏk ngă hrăm mbĭt dŭm hdră êlan ti krĭng mnuih djuê ƀiă leh anăn krĭng čư̆ čhiăng leh anăn hdră êlan đru ba ala ƀuôn anăn klei hdĭp mnuih ƀuôn sang amâo mdei đĭ kyar, hdră bruă duh  mkra mâo klei bi mlih jăk, hdră duh ƀơ̆ng mnuih ƀuôn sang ƀrư̆ lu jơr; prăk hrui wĭt dưi mđĭ. Ênoh gŏ êsei ƀun hrŏ pral; bruă sang hră, mdrao mgŭn dưi mđing; dhar kreh, klei bhiăn hdĭp mda jăk siam kriê pioh leh anăn mđĭ lar. Boh klei êđăp ênang ala ƀuôn dưi krơ̆ng kjăp; êpul bi hgŭm djuê ana dưi mkra mđĭ. Hnơ̆ng đĭ kyar bruă duh mkra dŭm čar krĭng mnuih djuê ƀiă leh anăn čư čhiăng mâo lu, hlăm anăn dŭm čar krĭng nah Yŭ Dưr đĭ kah knar 8,0%/thŭn, Lăn Dap Kngư đĭ kah knar 7,5%/thŭn, Yŭ kwar Dhŭng đĭ kah knar 7,0%/thŭn…

Hlue si Khua phŭn bruă, Khua Knơ̆ng bruă djuê ana Hầu A Lềnh,  hlăm thŭn êgao, bruă djuê ana ăt adôk jing klei kƀah, hlăm anăn, bruă pŏk ngă dŭm hdră bruă adôk gun kpăk, hlăm anăn Hdră kñăm ala čar mnuih djuê ƀiă leh anăn krĭng čư̆ čhiăng ka djăp hnơ̆ng mkă hŏng klei kčah leh:

Bruă mkŏ mjing pŏk ngă dŭm alŭ wăl snăn mâo dŭm alŭ wăl pŏk ngă jih ai tiê, mâo hnơ̆ng ênoh brei čan lu kơ klei bi liê nanao, ƀiădah ăt mâo dŭm alŭ wăl jing bruă pŏk ngă ăt adôk kƀah, ƀiădah ăt adôk mâo alŭ wăl jing bruă pŏk ngă adôk kƀah, ka djăp mkă hŏng klei kčah. Yap kah knar kluôm âl, Hdră kñăm ala čar ăt mâo ênoh bi liê lu, khădah snăn, mkă hŏng hdră kñăm knŭk kna snăn ăt ka djăp ôh hnơ̆ng kčah. Klei thâo săng mnuih ƀuôn sang, klei sa ao hgŭm mơ̆ng mnuih ƀuôn sang adôk kƀah.

 Thŭn 2025, Knơ̆ng bruă djuê ana kčah 12 bruă klam phŭn, hlăm anăn gĭr pŏk ngă, bi leh dăp êpul mkŏ mjing bruă djuê ana hlăm Gưl dlông leh anăn alŭ wăl êlam mơ̆ng akŏ thŭn 2025. Hlăm klei bi kƀĭn, bi ala kơ dŭm alŭ wăl lač kơ klei dleh dlan, gun kpăk hlăm klei pŏk ngă bruă djuê ana ti alŭ wăl, mbĭt anăn akâo mâo hdră msir ruh mgaih.

Blŭ hrăm hlăm Klei bi kƀĭn, K’iăng khua knŭk kna Nguyễn Hòa Bình bi mklă, bruă djuê ana leh anăn hdră êlan djuê ana mâo Đảng leh anăn Knŭk kna mđing dlăng hlăm hdră kñăm ala čar nao leh êlam hlăm klei hdĭp mnuih djuê ƀiă leh anăn čư̆ čhiăng dưi mkra mlih, mơ̆ng anăn lač kơ hdră êlan Đảng leh anăn Knŭk kna êlam hĭn hlăm klei hdĭp. Khădah snăn, hlăm thŭn 2024, Knơ̆ng bruă djuê ana ăt adôk 7/14 bruă klam ka leh, anăn K’iăng Khua knŭk kna Nguyễn Hoà Bình mtă brei bi leh bruă klam anei hlăm gưl 1 thŭn 2025. Knơ̆ng bruă djuê ana brei bi mklă bruă klam, klei gĭr, bruă klam kđi čar hŏng mnuih djuê ƀiă leh anăn krĭng čư̆ čhiăng, păn kjăp hdră êlan mơ̆ng Đảng, Hdră mtrŭn mơ̆ng Bruă kƀĭn ala hŏng dŭm hdră êlan prŏng:

Hdră êlan lu, klei găl bi liê lu, kyua anăn tơdah drei amâo dưi ngă ôh bi jăk kơ mnuih ƀuôn sang, đru kơ mnuih ƀuôn sang snăn drei adôk mâo lu klei kƀah. Kyua anăn brei drei ksiêm hriăm mkŏ mjing êpul mă bruă mrâo mrang bi khuăt tŭ dưn hĭn leh anăn êpul mrâo srăng mprăp kơ bruă drông bruă klam mrâo. Mâo klei găl ƀiădah ăt mâo klei suăi êman. Klei suăi anăn jing hnơ̆ng bruă mă lu hĭn, suăi hĭn jing êpul bruă ăt srăng mâo klei bi mlih mơ̆ng nah dlông truh kơ gŭ, ƀiădah klei găl jing mđĭ thiăm mnuih mă bruă čiăng msir mgaih  kơ klei mđĭ klei hdĭp mda mnuih ƀuôn sang.

K’iăng khua knŭk kna Nguyễn Hoà Bình ăt mtă, thŭn 2025 gĭr ktưn brei dưi mkra bi leh sang kơ phung ƀun hŏng djăp klei gĭr; mbĭt anăn thŭn 2025 brei ksiêm dlăng Hdră kñăm ala čar mđĭ kyar bruă duh mkra- ala ƀuôn krĭng mnuih djuê ƀiă leh anăn krĭng čư̆ čhiăng wưng 1 leh anăn mprăp bi jăk kơ wưng II hlăm Hdră, khut khat amâo brei ti bruă klam hlăm wưng 1 mơ̆ng hdră adôk đuôm nư.