Mơ̆ng akŏ thŭn truh kơ ară anei, wăl anôk hiu čhưn ênguê ala čar Măng Đen, kdriêk Kon Plông drông leh lu phung tuê hŏng êbeh 374.000 gưl čô, mâo mkrah wah ênoh phung tuê nao ti čar  Kon Tum. Đặng Quang Hà, khua bruă sang čư̆ êa kdriêk Kon Plông brei thâo, 3 thŭn giăm anei bruă hiu čhưn ênguê mơ̆ng kdriêk đĭ kyar ktang, klă klơ̆ng thŭn 2022 kdriêk drông 600.000 gưl čô tuê, thŭn 2023 jing 1 êklăk čô leh anăn thŭn 2024 jing 1,2 êklăk čô tuê.

Ƀiădah hluê si Đặng Quang Hà, klei anei amâo djŏ ôh kdriêk dưi đru hlăm klei đĭ kyar 2 ênoh mơ̆ng čar tơdah amâo mâo mjêč ngă jăk dŭm hdră êlan čiăng kơ bruă hiu čhưn ênguê đĭ kyar hơĭt kjăp:

“Amâo mâo hdră êlan, amâo mâo mta kñăm drei amâodưi kriê pioh ôh wăl siam. Mkŏ mjing rup hiu čhưn ênguê čiăng mâo lu boh klei hlăm bruă kriê dlăng mơ̆ng knŭk kna, hlăm bruă mkŏ mjing anăn knăl, mkŏ mjing rup mơ̆ng wăl anôk hiu čhưn ênguê Măng Đen. Tơdah mơ̆ng ară anei mkŏ mjing anăn knăl, mkŏ mjing rup leh anăn dhar kreh dôk dơ̆ng ƀơ̆ng huă hlăm wăl anôk hiu čhưn ênguê Măng Đen, anăp anei drei ăt srăng tuôm hŏng lu klei kpăk hlăm lu anôk”.

Čiăng đru mguôp mđĭ kyar 2 ênoh mrô mơ̆ng čar Kon Tum hlăm thŭn 2025, wăl hiu čhưn ênguê Măng Đen dôk mkŏ mjing thiăm ai iêo jak phung tuê. Bi kơ klei kriê dlăng mơ̆ng knŭk kna, dŭm gưl bruă sang čư̆ êa gĭr ngă jăk bruă kriê dlăng čuăl mkă, dưn yua hdră êlan iêo jak tŭ dưn ai dưi duh bi liê bruă mkŏ mkra, kdrăp yua đru kơ bruă hiu čhưn ênguê…

Bi hŏng 139 anô mdei msăn ti alŭ wăl čiăng mđĭ hĭn hnơ̆ng tŭ jăk leh anăn dhar kreh đru kơ phung tuê. Nguyễn Văn Tuấn, khua gĭt gai Golden Boutique Hotel Măng Đen, brei thâo:

“Boh tŭ kmeh gơ̆ng čiăng krơ̆ng kơ phung tuê, čiăng kơ phung tuê lŏ hriê ti Măng Đen jing jih jang phung mă bruă hŏng jih ai pô, dlăng kơ phung tuê jing gŏ sang, găp djuê, mâo klei kriê dlăng jih ai tiê. Hmei uêñ mĭn nanao hlăm grăp hruê, mâo nanao klei mlih mrâo. Bi hŏng ai dưi hmei mtô mjuăt nanao čiăng ngă bruă thơ̆ng hĭn”.

Čiăng kơ bruă hiu čhưn ênguê Mang Đen amâo djŏ knŏng kdlưn hlăm dŭm hruê mdei, wưng tết ƀiădah hơĭt kjăp hlăm dŭm mlan hlăm thŭn, hdră êlan bi lu jơr mnơ̆ng dhơ̆ng hiu čhưn ênguê dôk mâo čar Kon Tum leh anăn Êpul bruă hiu čhưn ênguê Măng Đen mtrŭt ngă. Mbĭt hŏng 7 ênao tlâo drai, dŭm anôk bruă duh mkra mlam, đang pla mjing Măng Đen, anôk hiu čhưn ênguê yang ƀuôn Vi Rơ Ngheo, Kon Vơng Kia, tour hiu čhưn ênguê dŭm anôk bruă dhar kreh, wăl čư dliê… mrâo mkŏ mjing dưi bi lu jơr thiăm mnơ̆ng thơ̆ng hiu čhưn ênguê đru kơ Măng Đen iêo jak leh anăn krơ̆ng jơ̆ng phung tuê.

Bạch Thị Mân, khua knơ̆ng bruă dhar kreh, mjuăt asei mlei leh anăn hiu čhưn ênguê čar Kon Tum mñă klă hŏng klei gĭr mbĭt hŏng klei găl mâo, Măng Đen srăng mâo klei đru mguôp yuôm bhăn hlăm mta kñăm đĭ kyar 10% mơ̆ng čar hlăm thŭn 2025:

Măng Đen bi kƀĭn djăp klei găl. Hmei kñăm mkŏ mjing dŭm mta mnơ̆ng dhơ̆ng phŭn, hiu čhưn ênguê dhar kreh, hbuê ênuk, anôk myang, hiu čhưn ênguê mjuăt asei mlei…Mơ̆ng dŭm tur knơ̆ng, klei găl mâo dŭm anôk bruă kriê dlăng mơ̆ng knŭk kna mâo klei bi mguôp čiăng kơ plah wah dŭm anôk bruă knŭk kna, knơ̆ng bruă hrăm mbĭt ngă dŭm mta kñăm mâo leh”.

Bruă hiu čhưn ênguê mâo čar Kon Tum bi klă jing mta phŭn hlăm mta kñăm mđĭ kyar bruă duh mkra mnia mblei giăm 13% hlăm thŭn 2025. Hŏng klei găl mâo leh anăn hdră êlan mđĭ kyar  klă nik, wăl anôk hiu čhưn ênguê Măng Đen, kdriêk Kon Plông dôk mbĭt hŏng dŭm kdriêk, ƀuôn prŏng mkăn mơ̆ng čar Kon Tum gĭr mâo mta kñăm drông 3 êklăk gưl čô tuê čiăng đru mguôp hlăm klei đĭ kyar 10% mơ̆ng čar hlăm thŭn anei. Grăo čô tuê hriê ti Măng Đen amâo djŏ knŏng dlăng kơ klei siam ƀiădah lŏ đru mguôp hlăm klei mđĭ kyar bruă duh mkra ala ƀuôn mơ̆ng alŭ wăl./.