Djŏ gưl bi hdơr 42 thŭn hruê phung nai Việt Nam, aguah anei Bruă kƀĭn ala bi trông ti anôk bi kƀĭn kơ hră čih Hdră bhiăn phung nai. Êlâo anăn, hlăm gưl 1 Bruă kƀĭn ala bi trông hlăm êpul, đa đa phung bi ala mtă hră čih hdră bhiăn brei bi êdah hdră êlan hŏng phung nai năng hŏng klei digơ̆ duh myơr; mbĭtt anăn mâo hdră êlan mtrŭt phung nai mă bruă ti krĭng mnuih djuê ƀiă leh anăn krĭng čư̆ čhiăng, krĭng mâo klei găl bruă duh mkra- ala ƀuôn dleh dlan…

Phung bi ala mđing kơ bruă bi mklă hdră kčah hŏng phung nai êngao knŭk  kna; phung nai mâo bi mklă hlue si anăn bruă mă hŏng hnơ̆ng čuăn hlue si klei thâo mă bruă ƀiădah ăt rơ̆ng klei mdê hjăn hŏng grăp gưl hriăm leh anăn hnơ̆ng mtô bi hriăm. Phung bi ala bi trông kơ Hdră bhiăn phung nai đru mguôp mkŏ mjing hdră êlan kơ bruă mtô bi hriăm. Tlam, Bruă kƀĭn ala hmư̆ Hră hưn mdah bi mklă hră čih Hdră bhiăn mkra mlih, mbŏ dŭm mta Hdră bhiăn ksiêm dlăng mơ̆ng Bruă kƀĭn ala leh anăn Êpul gơ̆ng bruă ƀuôn sang leh anăn bi trông ti anôk bi kƀĭn kơ  Hdră êlan bi liê hră bruă êlan êdeh treng êran pral Dưr - Dhŭng; mkra mlih hdră êlan bi liê kơ Tač êdeh phiơr prŏng Long Thành.