Amai Nguyễn Thủy Triều, Khua adŭ bruă - Khua gĭt gai Êpul hgŭm Kphê Ƀuôn Ama Thuôt, čar Dak Lak brei thâo, Êpul hgŭm Kphê Ƀuôn Ama Thuôt ară anei dôk yua wăt website, hla pŏk web ala ƀuôn, hgŭm hlăm êpul chat êpul kphê jăk Việt Nam, mâo anăn mrô hlăm hla pŏk web hâo hưn mơ̆ng Anôk bruă ksiêm dlăng kphê dlông rŏng lăn, anăn klei hâo hưn pral msir mgaih grăp mnĭt. Grăp mmông, ba kơ phung hlăm êpul klei găl nao hlăm klei bi lông leh anăn rang mdah lu ala čar. Dŭm hdră bi hgŭm ksiêm hriăm, leh anăn dŭm adŭ mtô mjuăt mơ̆ng mphŭn dơ̆ng truh kơ êlam hĭn, đru kphê Việt Nam mâo klei tŭ dưn jăk. Amai Nguyễn Thủy Triều lač:

 “Êpul hgŭm kphê Ƀuôn Ama Thuôt mâo sa êpul êya prŏng, mâo djăp mta. Tơdah mâo sa boh tŭ ksiêm dlăng kơ kphê amâodah bi mklă kơ kphê snăn diñu mơĭt kơ êpul hgŭm čiăng ksiêmd lăng, mơĭt kơ êpul êya. Amâodah mâo ya klei hâo hưn kơ ênoh yuôm snăn phung hlăm êpul srăng kah mbha mtam kơ êpul hgŭm thâo pral. Tơdah pô hiu duah hlăm internet snăn sui, tăm năng amâo ƀuh ôh”.

Mơ̆ng thŭn 2007, hlăk ênoh mrô adôk ƀiă mnuih thâo, pô hriăm gưl prŏng - ƀĭng lŏ hma Nguyễn Công Thịnh ti ƀuôn prŏng Đà Lạt, čar Lâm Đồng, mkŏ mjing leh sa website thơ̆ng kơ kphê, hưn kơ ênoh kphê mơ̆ng dŭm anôk mnia blei lu ala čar, jing klei bi kƀĭn tŭ dưn. Truh ară anei, Lăn Dap Kngư mâo leh luu tur knơ̆ng mrô dưi yua tŭ dưn, hlăm bruă mkra mjing, mnia blei, bi hgŭm leh anăn mtô mjuăt. Hŏng ayŏng Đặng Công Kiên, Khua Êpul hgŭm bruă lŏ hma Kiên Thảo Phát, ti wăl krah knông lăn Ngọc Hồi, čar Kon Tum, bi mlih mrô ƀrư̆ mđĭ lar ênoh yuôm tơdah jing kdrăp mkŏ mjing êpul êya mrô hrăm mbĭt sa hdră êlan. Klei tŭ jing mơ̆ng dŭm anôk pla mjing durian, kphê doh mơ̆ng êpul hgŭm bruă, dŭm mta mnơ̆ng vi sinh mơ̆ng êpul hgŭm bruă mkra mjing, jih jang kyua hgŭm hlăm êpul êya mrô kơ bruă lŏ hma:

 “Kâo hgŭm hlăm êpul êya lŏ hma leh anăn êdei anăn hriăm sa adŭ kơ Organic kyua phung nai mnuih Australia mtô hlăm 6 mlan online. Mơ̆ng klei thâo anăn kâo yua mkra mjing mnơ̆ng dhơ̆ng jăk. Êpul hgŭm bruă kâo ăt mâo mnơ̆ng dhơ̆ng sing học yua kơ bruă lŏ hma, yua mkra mjing mnơ̆ng dhơ̆ng lŏ hma leh anăn rao mnơ̆ng ƀơ̆ng. Êpul hgŭm bruă ăt mâo mnơ̆ng dhơ̆ng msĕ si kphê, durian. Dŭm mta êa drao snăn dưi pla ti gŭ êyui čiăng mjing čê”.

Bi mlih mrô bruă lŏ hma ti Lăn Dap Kngư ară anei lŏ dơ̆ng mđing hlue si hdră êlan tơdah mâo thiăm dŭm kdrăp mrô thơ̆ng pioh yua kơ bruă lŏ hma Việt Nam, msĕ si AutoAgri, MobiAgri, VNPTGreen... Dôk đru kơ dŭm êpul hgŭm bruă durian ti kdriêk Krông Pač, čar Dak Lak pŏk ngă ba yua VNPT GREEN, nai prĭn Nguyễn Lê Anh Dũng, Khua Anôk bruă kdrăp hâo hưn (VNPT Dak Lak) brei thâo: Êngao kơ kdrăp yua pioh kơ dŭm anôk pla mjing leh anăn êpul hgŭm bruă, VNPT dôk pŏk ngă bruă lŏ hma mrô AIMS, đru kriê dlăng kluôm mơ̆ng klei pla mjeh truh kơ pla mjing - răng mgang mnơ̆ng pla mjing, rông mnơ̆ng - mdrao kơ mnơ̆ng rông, kan hdang, mđĭ kyar krĭng ƀuôn sang truh kơ kriê dlăng bruă lŏ hma dliê kmrơ̆ng kan hdang:

 “Hmei dôk nao ti grăp alŭ wăl čiăng mkŏ mjing êpul phung mda asei, thâo săng kơ kdrăp mrô čiăng hrăm mbĭt hgŭm hlăm bruă mjing ênoh mrô kơ hdră mrô hmei dôk pŏk ngă ti alŭ wăl. Truh thŭn 2030, srăng ba ênoh mrô dưi mjing leh hlăm boh sĭt”.

          Hlăm anôk bi kƀĭn mtrŭt mjhar bi liê hlăm bruă lŏ hma, krĭng ƀuôn sang Lăñ dap Kngư mrâo mkŏ mjing ti čar Gia Lai, Khua phŭn bruă lŏ hma leh anăn mđĭ kyar krĭng ƀuôn sang Lê Minh Hoan mñă klă, Lăn Dap Kngư leh anăn dŭm anôk bruă mơ̆ng Phŭn bruă, hŏng dŭm anôk bruă mnia blei… brei yua tur knơ̆ng mrô čiăng ngă bruă tŭ dưn hĭn, đru kơ bruă lŏ hma mmơ̆ng krĭng đĭ kyar kluôm wăt bruă dliê kmrơ̆ng, pla mjing leh anăn rông mnơ̆ng, dưi mâo bruă lŏ hma mâo lu ênoh yuôm msĕ si klei kčah leh hlăm Hdră mtrŭn 23 thŭn 2022 mơ̆ng Phŭn bruă kđi čar:

“Kâo mtă kơ čar Gia Lai, Kon Tum, Dak Lak, Dak Nông, Lâm Đồng mkŏ mjing sa klei bi kƀĭn mkăp lu hĭn wăl iêô jak phung duh bi liê kơ bruă lŏ hma, bi mguôp lu ênoh yuôm amâo djŏ ênoh hjăn păn ôh. Anei jing hdră mtrŭn mơ̆ng Đảng. Ară anei mâo leh wăl mrâo, mâo lu hdră kơ drei bi blŭ hrăm. Yuôm bhăn hĭn jing hdră kñăm drei dưi mâo”.

 Hdră mlih mrô dôk mkŏ mjing ktang, đru kơ grăp ƀĭng lŏ hma, anôk bruă duh mkra, êpul hgŭm bruă ti Lăn Dap Kngư (boh nik hlăm bruă lŏ hma) thâo ƀuh klă klei găl čiăng kpưn truh, gĭr mphŭn čô̆ kơ bruă tŭ jing./.