Hluê si hdră kčah, hlăm hruê kăm kơ anăp, bruă sang čư̆ êa čar Dak Nông srăng mkŏ mjing dua êpul ksiêm dlăng, mơ̆ng khua leh anăn k’iăng khua bruă sang čư̆ êa ba anăp, nao ksiêm hlăm 11 hdră ti dŭm kdriêk Dak Mil, Čư̆ Jŭt, Dak R’lâp, Krông Knô leh anăn ƀuôn prŏng Gia Nghĩa.

Anei jing dŭm hdră duh bi liê bruă knŭk kna hlăm bruă êlan klông, knơ̆ng kdơ̆ng êa, mâo boh tŭ yuôm bhăn hŏng klei đĭ kyar bruă duh mkra ala ƀuôn alŭ wăl, ƀiădah klei ngă bruă êmưt, hnơ̆ng brei čan ƀiă. Bruă ksiêm dlăng mbĭt hŏng bi klă dŭm klei dleh dlan, kpăk gun êjai ngă hdră čiăng mâo hdră êlan ruh mgaih, bruă sang čư̆ êa čar Dak Nông srăng ksiêm dlăng bruă klam hlăm klei gĭt gai, ktrâo lač, ksiêm dlăng mơ̆ng dŭm anôk bruă, pô duh bi liê, boh nik jing bruă klam phung ba anăp. Bruă sang čư̆ êa čar Dak Nông srăng ƀuah mkra ktang phĭt dŭm êpul êya, grăp čô ngă truh klei dleh dlan, bi kpăk, kƀah bruă đua klam, bi êmưt klei ngă bruă. Hŏng đa đa hdră amâo mâo dưi, bruă sang čư̆ êa čar Dak Nông srăng ba ênoh prăk kơ dŭm hdră jăk hĭn.