Ti anôk bi blŭ hrăm, mnuih ƀuôn sang bi êdah klei đăo knang hŏng klei kiă kriê, gĭt gai mơ̆ng phung khua kiă kriê čar Lâm Đồng hlăk alŭ wăl dôk tlă anăp hŏng lu klei dleh dlan, lông dlăng. Mbĭt anăn, čang hmăng čar Lâm Đồng mđing mđĭ kyar klei găl mâo hlăm hdră hiu čhưn ênguê lehanăn ngă lŏ hma, mtrŭt mđĭ hdră mlih mro, bruă duh mkra mrô, mđing duh kơ anôk bruă êlan klông, boh nik hdră êlan êran pral phŭn msĕ si Tân Phú - Bảo Lộc, Bảo Lộc - Liên Khương lehanăn Đà Lạt - Nha Trang čiăng ba wĭt klei găl hlăm hdră bi hgŭm krĭng, mtrŭt mđĭ kyar bruă duh mkra – ala ƀuôn.

Khua Anôk bruă sang čư̆ êa čar Lâm Đồng Trần Hồng Thái mñă, čar Lâm Đồng dôk hlăm wưng pŏk êlan čiăng mđĭ kyar, dôk gĭr mkra êlan êran pral pŏk ƀăng tĭng nah Dhŭng, dŭm ktuê êlan mkŏ krĭng Lăn dap kngư, Ngŏ kwar Dhŭng, Dhŭng kwar Krah. Trần Hồng Thái brei thâo, thŭn ti anăp, čar Lâm Đồng srăng mphŭn mkra êlan êran pral. Dưi mâo êlan klông mrâo kơh dưi mâo klei đĭ kyar pral. Hlăm 2 – 3 thŭn ti anăp, čar Lâm Đồng srăng mđing mđĭ kyar anôk bruă êlan klông nah gŭ.

Ăt ti knăm anei, Khua anôk bruă sang čư̆ êa čar Lâm Đồng bi trông leh hŏng phung bi ala mnuih ƀuôn sang kơ hdră mtrŭn mđĭ kyar bruă tuh tia mkra mjing, bruă nah tluôn, hdră hiu čhưn, bruă lŏ hma ba yua kdrăp mrâo, bruă mlih mrô, mjuăt bi hriăm mnuih mă bruă, jak iêu hdră duh bi liê, bruă duh mkra mtah, wăl hdĭp mda, bruă mdrao mgŭn, bruă mjuăt bi hriăm hlăm wưng ti anăp mơ̆ng čar.

Mbĭt anăn, mnuih ƀuôn sang ăt ba mdah klei akâo čiăng hŏng phung khua kiă kriê čar Lâm Đồng mđĭ hĭn hdră kriê dlăng ngăn dŏ cŏng mâo – wăl hdĭp mda, mtrŭt mđĭ hdră msir mghaih anôk ala, mkŏ anôk dôk mrâo mơ̆ng dŭm hdră bruă phŭn, mđĭ kyar sang dôk hlăm yang ƀuôn, mkăp hră dưi djă yua lăn…

Hlăm anăn, klei čuăl mkă lui êruh dôk mâo sui, ngă luič liê mnơ̆ng dhơ̆ng lehanăn bi kdung hdră mđĭ kyar mơ̆ng alŭ wăl brei pral dưi ruh mtlaih. Păng Ting Sin, ti wăl krag Lạc Dương, kdriêk Lạc Dương, čar Lâm Đồng, lač:

         “Ti wăl krah Lạc Dương hmei mâo lu hdră čuăl mkă mđĭ mđăl lehanăn mâo mơ̆ng sui, mâo hdră truh kơ ară anei 20 thŭn leh ƀiădah ka dưi pŏk ngă mơh. Klei čang hmăng prŏng hĭn mơ̆ng mnuih ƀuôn sang jing dŭm hdră čuăl mkă amâo tŭ dưn, amâo dưi ngă drei lui yơh lehanăn tơdah mâo hdră čuăl mkă mrâo brei drei hlŏng pŏk ngă mtam”.

Êbeh 20 klei blŭ mơ̆ng phung bi ala ti anôk bi blŭ hrăm hưn mdah leh klei dleh dlan hlăk hdră čuăl mkă mnơ̆ng yuôm hlăm gŭ lăn hmăi truh kơ klei tŭ dưi mơ̆ng mnuih ƀuôn sang hlăm bruă mkăp hră dưi yua lăn; brei mâo hdră êlan hlăm wưng sui čiăng răng mgang klei tŭ dưn kơ mnuih ƀuôn sang rông êmô mă êa ksâo leh klei truh dŭm êtuh drei êmô ti alŭ wăl čar djiê leh tlŏ vaccine, čuăl mkă mđĭ mđăl, răng mgang wăl hdĭp mda. Mbĭt anăn, phung bi ala mtă brei mđing mđĭ kyar dua anôk bruă mâo klei găl mơ̆ng Lâm Đồng jing hiu čhưn ênguê lehanăn bruă lŏ hma, boh nik bruă lŏ hma ba yua kdrăp mrâo, kreh knhâo, mtrŭt mđĭ hdră mlih mrô.

          Blŭ hrăm klah čŭn ti knăm anei, Nguyễn Thái Học, Khua bruă Đảng jing jai čar Lâm Đồng mñă, phung khua čar Lâm Đồng srăng mđing hmư̆, tŭ mă jih klei blŭ đru mguôp mơ̆ng mnuih ƀuôn sang. Mbĭt anăn, ƀuăn srăng ruh mtlaih klei dleh dlan, gun kpăk anei čiăng mtrŭt mđĭ kyar čar Lâm Đồng kluôm dhuôm lehanăn hơĭt kjăp.

          “Kâo mtă kơ Adŭ bruă Đảng čar bi hgŭm hŏng Adŭ bruă mơ̆ng Anôk bruă sang čư̆ êa čar ksiêm dlăng, bi mklin jih klei blŭ mơ̆ng phung bi ala lehanăn hưn mthâo hŏng dŭm knơ̆ng, dhar bruă, dŭm alŭ wăl mâo klei đua klam ksiêm dlăng, msir mghaih, hưn mthâo boh tŭ kơ Anôk kriê dlăng bruă Đảng čar. Mâo dŭm bruă djŏ hŏng klei dưi mơ̆ng phung khua čar srăng msir mghaih, bruă djŏ tuôm hŏng gưl dlông čar srăng ba mdah”.

Khua bruă Đảng jing jai čar Lâm Đồng Nguyễn Thái Học mñă klă leh klei ƀuăn rơ̆ng kjăp mơ̆ng Anôk kriê dlăng bruă Đảng čar jing gĭr ktưn, hgŭm mguôp, jih ai tiê kyua klei đĭ kyar mơ̆ng Lâm Đồng, mă bruă hŏng klei đua klam, kpă mngač, ênuah ênô, gĭr bi mlih jih phung knuă druh ngă kpăk gun hdră mđĭ kyar mơ̆ng čar./.