Hŏng ênhă êbeh 24.000km2 leh anăn mnuih ƀuôn sang giăm 4 êklăk čô, Lâm Đồng dưi bi klă jing anôk đĭ kyar mơ̆ng krĭng Dhŭng kwar Krah leh anăn Lăn Dap Kngư. Hluê si klei čuăl mkă, wăl anôk đĭ kyar dưi mkŏ mjing hŏng 2 krĭng boh kdrŭt mâo čhư̆ čhiăng, krĭng dap leh anăn êa ksĭ. Hlăm anăn alŭ wăl vực Đức Trọng, Đơn Dương, Lâm Hà leh anăn Di Linh dưi čuăk mkă mđĭ kyar wăl krah hŏng anôk bruă Knŭk kna - kđi čar ti să Đức Trọng. Alŭ wăl Đà Lạt dưi bi klă hdră jing anôk bruă dhar kreh, sang hră mơar, kreh knhâo mrâo mrang leh anăn hiu chưn ênguê, mdei msăn tar rŏng lăn.

Hluê si Tôn Thiện San, khua knơ̆ng bruă ngăn prăk čar Lâm Đồng, čar srăng mkŏ mjing 6 êlan knhal bruă duh mkra Dưr - Dhŭng leh anăn Ngŏ Yŭ, mkŏ dŭm krĭng boh kdrŭt mơ̆ng čư̆ čhiăng truh ti êa ksĭ. Kluôm ênoh duh bi liê wưng thŭn 2026 - 2030 mĭn tĭng êbeh 1 êklăk êklai prăk, hlăm anăn ênoh prăk êngao ngăn prăk Knŭk kna hlăm brô 80%.

Čuăl mkă čar dưi bi klă hdră êlan iêo jak duh bi liê hlăm dŭm dhar bruă, bruă phŭn, mâo klei găl bi ktưn leh anăn ai dưi mkŏ mjing boh kdrŭt đĭ kyar mrâo kơ čar. Anăn jing êlan klông, logistics, đĭ kyar wăl krah, bruă hiu čhưn ênguê hnơ̆ng jăk, bruă lŏ hma kdrăp mrâo mrang, tuh tia mkra mjing, pui kmlă, mnia mblei, bruă sang mdrao mgŭn, dhar kreh, mjuăt ktang asei mlei, bi mlih mrô, kreh knhâo mrâo mrang leh anăn mlih mrâo mbruă”.

Hồ Văn Mười, Khua hlăm bruă Đảng gưl dlông, khua Bruă sang čư̆ êa čar Lâm Đồng brei thâo, bruă mkra mlih klei čuăl mkă mâo boh tŭ dưn yuôm bhăn êjai bi mŭt mbĭt 3 čar Lâm Đồng, Bình Thuận leh anăn Dak Nông, mkŏ mjing tur knơ̆ng hdră bhiăn kơ wưng đĭ kyar mrâo. Khua Bruă sang čư̆ êa čar Lâm Đồng mñă klă, Lâm Đồng jing čar mâo ênhă prŏng hĭn hlăm lăn čar, hŏng lu klei găl kơ mnơ̆ng gŭ lăn, pui kmlă, bruă tuh tia mkra mjing leh anăn bruă hiu čhưn ênguê, kyuanăn čiăng čuăl mkra mrâo čiăng bi lar jih hnơ̆ng klei găl, boh kdrŭt đĭ kyar wưng sui.

Mkra mlih klei čuăl mkra anei bi êdah klei gĭr mơ̆ng čar hlăm klei mĭn đĭ kyar, mă mnuih ƀuôn sang leh anăn knơ̆ng bruă jing mta phŭn, mă klei kreh knhâo mrâo mrang, mlih mrâo mbruă leh anăn bi mlih mrô leh anăn đĭ kyar mtah jing boh kdrŭt. Mđing truh mta kñăm mkŏ mjing čar Lâm Đồng jing anôk đĭ kyar mbruă ti Lăn Dap Kngư leh anăn Dhŭng Kwar krah. Čuăl mkă amâodjŏ knŏng bi klă mta kñăm mđĭ kyar ti anăp ƀiădah lŏ pŏk sa wưng sui mkŏ mjing dŭm boh kdrŭt đĭ kyar mrâo./.