Dak Lak ară anei mâo ênhă lăn ala, ênoh mnuih ƀuôn sang hlăm êpul dŭm čar, ƀuôn prŏng dôk mrô sa kluôm ala, mbĭt anăn jing anôk mkŏ bruă êlan klông yuôm bhăn mơ̆ng Lăn dap Kngư; mâo klei găl jăk čiăng bi hgŭm, mkŏ wăl mđĭ kyar, mjing boh kdrŭt mđĭ klei bi hgŭm mđĭ kyar bruă duh mkra, dhar kreh, ala ƀuôn hŏng dŭm alŭ wăl hlăm krĭng Lăn Dap Kngư, ktuê hang ksĭ kwar Krah leh anăn dŭm anôk bruă duh mkra prŏng kluôm  ala. Bruă duh mkra mđĭ kyar jăk, mđĭ lar hnơ̆ng đĭ kyar  kah knar mâo 8% /thŭn hlăm bŏ 20 thŭn hŏng anei. Boh nik, Dak Lak lŏ jing anôk bi kƀĭn lu klei jăk siam kơ ênoh yuôm dhar kreh djuê ana, klei bhiăn hdĭp mda mơ̆ng êpul êya 49 djuê ana, hlăm anăn mâo “wăl dhar kreh čing čhar Lăn dap Kngư” mâo êpul UNESCO tŭ yap jing mnơ̆ng kriê pioh dhar kreh amâo êdah klă mơ̆ng anak mnuih.

 Mrâo anei, nao leh anăn blŭ hrăm hlăm Knăm bi hdơr 120 thŭn Dak Lak mkŏ mjing leh anăn đĭ kyar, K’iăng Khua knŭk kna Nguyễn Hòa Bình bi mklă: kơhưm yuôm bhăn mơ̆ng čar Dak Lâk hŏng krĭng leh anăn ala čar dưi bi mklă hlăm lu hdră êlan mơ̆ng Gưl dlông hlăm grăp gưl. Klă hĭn jing klei klah čŭn mrô 67 mơ̆ng Phŭn bruă kđi čar kơ “Mkŏ mjing leh anăn mđĭ kyar ƀuôn prŏng Ƀuôn Ama Thuôt, čar Dak Lak truh thŭn 2030, hnơ̆ng trah dlăng truh thŭn 2045”; Hdră mtrŭn mrô 72 mơ̆ng Bruă kƀĭn ala kơ klei bhiăn, hdră êlan mdê hjăn mkŏ mjing, đĭ kyar ƀuôn prŏng Ƀuôn Ama Thuôt jing ƀuôn prŏng phŭn krĭng Lăn Dap Kngư; Hdră mtrŭn mrô 23 mơ̆ng Phŭn bruă kđi čar kơ hdră êlan mđĭ kyar bruă duh mkra- ala ƀuôn leh anăn rơ̆ng klei êđăp ênang krĭng Lăn Dap Kngư truh thŭn 2030, hnơ̆ng trah dlăng truh tyhŭn 2045… bi mklă bruă klam yuôm bhăn kơ čar Dak lak jing mđĭ kyar bruă duh mkra brei mguôp hŏng dhar kreh, ala ƀuôn, wăl hdĭp mda, lĭng kahan; mbĭt anăn, brei jing phŭn, anôk đĭ kyar mơ̆ng krĭng wăl.

 K’iăng Khua knŭk kna Nguyễn Hòa Bình mñă klă, čiăng bi leh tŭ dưn dŭm hdră kñăm, bruă klam kčah, brei mâo bruă Đảng, bruă sang čư̆ êa leh anăn mnuih ƀuôn sang dŭm djuê ana hlăm čar brei bi hgŭm, gĭr ktưn, kƀĭn gĭt gai hlue ngă bi jăk bruă klam, bruă phŭn ti tluôn:

“Iêô mkrum ai ktang, ba yua tŭ dưn klei găl, klei mâo đĭ kyar, mđĭ ktang boh kdrŭt đĭ kyar; mlih mrâo gru hmô duh mkra, boh phŭn jing mđĭ kyar dŭm mra mnơ̆ng dhơ̆ng lŏ hma, dliê kmrơ̆ng mâo klei găl, hnơ̆ng prŏng, hnơ̆ng jăk, ba čhĭ lu kơ ala tač êngao; mkŏ mjing bruă kđi čar kjăp ktang, kyua mnuih ƀuôn sang ngă bruă, mđĭ kyar bruă duh mkra- ala ƀuôn, răng mgang wăl hdĭp mda, rơ̆ng êđăp ênang ala ƀuôn, rơ̆ng êđăp ênang bruă lĭng kahan leh anăn ala ƀuôn”.

 Nguyễn Đình Trung, Khua hlăm bruă Đảng gưl dlông, Khua bruă Đảng čar Dak lak brei thâo, hlăm wưng kơ anăp, êngao kơ klei găl, klei mâo jing klă klơ̆ng, Dak lak ăt dôk ti anăp lu klei dleh dlan, lông dlăng, brei mâo jih bruă kđi čar hlăm čar lŏ dơ̆ng kơrŭ wĭt, mđĭ lar ktang ai tiê khăp kơ ala čar, ai ktang bi hgŭm jih jang djuê ana, ba yua klei găl, klei mâo; ba yua klei mđing dlăng mơ̆ng Đảng, Knŭk kna, klei sa ai mơ̆ng êpul ngă bruă duh mkra leh anăn dŭm gưl mnuih ƀuôn sang; ksiêm dlăng êlam, kluôm, djăp ênŭm leh anăn hlue ngă jăk klei mĭn “Mđĭ kyar bruă duh mkra jing bruă klam yuôm bhăn, mkŏ mjing Đảng jing bruă klam phŭn, mkŏ mjing bruă kđi čar kjăp, khuăt, ngă bruă tŭ dưn; kriê pioh leh anăn mđĭ kyar dhar kreh jiă kma knhuah djuê ana jing tur knơ̆ng ai tiê ala ƀuôn, mjing boh kdrŭt kơ klei mđĭ kyar kjăp; rơ̆ng êđăp ênang jing bruă phŭn, jêñ jêñ”.

“ Bruă Đảng, bruă sang čư̆ êa, lĭng kahan leh anăn mnuih ƀuôn sang dŭm djuê ana čar Dak Lak srăng lŏ dơ̆ng mđĭ knhuah gru cách mạng kdrưh kơăm leh anăn klei khăp kơ ala čar; mpŭ leh anăn djă pioh boh tŭ dŭm gưl ênuk phung nao êlâo ngă leh, bi hgŭm, hrăm mbĭt sa ai tiê, gĭr ktưn găn klei dleh dlan, lông dlăng, mkŏ mjing čar Dak Lak đĭ kyar pral, kjăp, ƀrư̆ mdrŏng sah, jăk siam, đru mjing tur knơ̆ng kjăp hŏng kluôm ala mŭt hlăm ênuk mrâo - ênuk kpưn đĭ mơ̆ng djuê ana Việt Nam.”   

Mđĭ lar klei găl, klei mâo mơ̆ng krĭng mâo knhuah gru hƀuê ênuk, mâo lu ênoh yuôm dhar kreh dŭm djuê ana mơ̆ng grăp krĭng kwar kluôm ala, anôk jing bruă phŭ, boh kdrŭt mđĭ kyar krĭng Lăn Dap Kngư, hŏng klei găl čŏng mâo jăk, čar Dak Lak dôk gĭr ktưn kpưn đĭ mkŏ mjing alŭ wăl ƀrư̆ mdrŏng sah, jia knhuah gru djuê ana, jăk siam, yâo mơak./.