Bruă duh mkra ala ƀuôn čar Dak Lak lŏ dơ̆ng mâo klei bi knăl jăk. Čar Dak Lak dôk kƀĭn msir mgaih klei dleh dlan hlăm bruă ngă mơ̆ng knŭk kna alŭ wăl dua gưl, mđĭ klei tŭ dưn gĭt gai, ngă hdră kñăm đĭ kyar 8% thŭn 2025.

Knơ̆ng bruă sang čư̆ êa čar Dak Lak brei thâo, êngao kơ hnơ̆ng  jăk mơ̆ng bruă tuh tia mkra mjing, mkŏ mjing, lŏ hma, dliê kmrơ̆ng, kan hdang leh anăn ba čhĭ kơ ala tač êngao, snăn bruă rông mnơ̆ng ti čar ăt lŏ duah klei čang hmăng leh klei ruă tưp dưi ksiêm dlăng jăk. Truh ară anei, 100% sang đru dưi rŭ mdơ̆ng, êbeh 6.900 boh sang dưi bi leh ba jao, mâo giăm 78% hnơ̆ng ngă, gĭr bi leh jih jang êlâo kơ hruê 15/8. Hlue si Tạ Anh Tuấn, Khua Knơ̆ng bruă sang čư̆ êa čar Dak Lak, wăt tơdah snăn, čiăng dưi ngă hdră kñăm đĭ kyar ênoh mnơ̆ng dhơ̆ng ti čar jih thŭn 8%, đĭ kyar 8,64% hlăm 6 mlan knhal jih thŭn, ăt jing bruă klam dleh dlan. Čiăng dưi ngă hdră kñăm anei, êlâo hĭn brei ruh mgaih klei gun kpăk hlăm bruă knŭk kna dua gưl; msir mgaih klei kƀah, hnơ̆ng dŭm hdră bruă phŭn, leh anăn mđĭ brei čan prăk knŭk kna.