Ti anôk bruă knŭk kna să Hoà Phú, čar Dak Lak, dŭm hruê akŏ mlan 7 mâo lu mnuih ƀuôn sang nao ngă hră mơar. Bi leh hră mơar hưn mdah online leh anăn mă hră ba wĭt, Nguyễn Thế Lâm, ti alŭ 9, ƀuôn hgŭm Hoà Phú brei thâo, khădah jing hruê tal êlâo mă bruă hluê si klei bi hmô mrâo ƀiădah mâo dŭm klei mlih jăk hlăm klei ngă hră mơar knŭk kna.

 “Klei jăk hĭn kâo ƀuh jing mdê hŏng êlâo, anăn jing êlâo dih srăng dôk guôn, leh anăn hră mơar ba anôk anei leh anăn ba hĕ anôk dih, ƀiădah mlih mrô ară anei dôk bi êdah hlăm bruă knuă, grăp bruă grăp hruê drei. Dưn yua klei mlih mrô hlăm hră mơar dưi mgaih msir pral leh anăn mâo boh tŭ dưn”.

Ăt msĕ sơnăn, ti anôk bruă knŭk kna ƀuôn hgŭm Ƀuôn Ama Thuôt, čar Dak Lak, mnuih ƀuôn sang dăp pruê̆ čiăng mă mrô ngă hră mơar. Vũ Đức Hưởng, ti ƀuôn hgŭm Ea Kao, čar Dak Lak brei thâo, khădah hruê anei bruă sang čư̆ êa 2 gưl klă klơ̆ng mrâo mă bruă, grăp hră mơar dưi ngă ti anôk pô dôk, ƀiădah kyua klei mưng ñu ăt nao ti anôk bruă ngă hră mơar hđăp mơ̆ng ƀuôn prŏng Ƀuôn Ama Thuôt êlâo dih. Ñu mâo klei ư ai kyua dŭm hră mơar dưi mlih mrô, mơ̆ng klei mă hră truh kơ phung ngă hră mơar, ba wĭt hră mơar.

 “Kâo hruê tinei čiăng mlih mrô hră lăn. Kyua anôk anei kâo mưn ngă leh leh anăn diñu ngă pral êdi kyuadah kâo hriê tinei. Klă sĭt boh blŭ ƀuh mdê ƀiă, bruă ăt mdê mơh ƀiădah sui ăt mưng mơh. Êdei anei năng ai knuă druh srăng mtô kơ pô jing ti anôk pô dôk ngă tinăn srăng ênưih hĭn. Bi ară anei hruê tal êlâo kâo ăt nao anôk hđăp čiăng ngă hră mơar”.

Dŭm hruê êgao, lu mnuih ƀuôn sang nao ti dŭm anôk bruă knŭk kna ti dŭm ƀuôn hgŭm ti Dak Lak čiăng ngă hră mơar čiăng êdi msĕ si: hră k’kiêng, hưn pô djiê, hră ênua mdrao mgŭn, hră nao sang hră, čih anăn anôk dôk, ngă hră lăn…Čiăng đru kơ mnuih ƀuôn sang, phung knuă druh, phung mă bruă ti anôk bruă ăt mâo klei gĭr, hriăm dŭm kdrăp yua hlăm klei ngă bruă bruă sang čư̆ êa dua gưl.

Nguyễn Đăng Huy, pô mă bruă ti anôk bruă knŭk kna ƀuôn Hgŭm Hoà Phú, čar Dak Lak brei thâo, mơ̆ng hruê ngă klei bi hmô mrâo, phung knuă druh, phung mă bruă pătdah amâo mâo hruê mdei. Jih jang bruă truh kơ mmăt mlam čiăng bi djŏ klei čih, bi êran jăk, bi djăp ênŭm klei čiăng mơ̆ng mnuih ƀuôn sang.

 “Jih jang phung mă bruă ti anôk bruă ƀuôn hgŭm Hòa Phú mrâo jing phung knuă druh mơ̆ng lu anôk, kyuanăn klei bi mrâo, thâo klă, ngă bruă ăt mâo mơh klei hơĭt, ƀiădah êjai ngă bruă mơ̆ng aguah truh kơ ară anei ăt mâo dŭm klei čih hưn djŏ  tuôm hŏng hră mơar mrâo, kyuanăn bruă bi mrâo, mgaih msir ăt dleh dlan, ƀiădah phung ayŏng adei dôk gĭr mgaih msir”.

Ti dŭm ƀuôn hgŭm hlăm čar Dak Lak, dŭm hruê anei, dŭm êpul phung phần mềm leh anăn phung ngă bruă mơ̆ng dăng kông Dak Lak (VNPT) klă anăp nao mtô kơ phung knuă druh ngă bruă ăt msĕ mơh đru kơ mnuih ƀuôn sang ngă hră mơar.

Hluê si Nguyễn Nam Quốc, khua kiă kriê dang kông Dak Lak, anôk bruă ăt đru kơ klei čih hưn đru kơ mnuih ƀuôn sang dưi ngă hră mơar knŭk kna online. Hŏng čar Dak Lak mrâo, bruă mtô kơ phung knuă druh, phung mă bruă ti dŭm ƀuôn hgŭm hlăm bruă yua kdrăp mă bruă dưi ngă mơ̆ng êlâo, boh nik hŏng dŭm ƀuôn hgŭm hlăm čar Phú Yên êlâo dih, čiăng ngă klei mlih diñu thâo yua mtam. Nguyễn Nam Quốc, brei thâo:

 “Msĕ si ti Dak Lak, grăp anôk bruă ƀuôn hgŭm dưi dăp ƀiă êdi 2 čô thơ̆ng kơ bruă phần mêm leh anăn sa čô thâo kơ măi tĭnh čiăng mâo mtam klei đru, amâo mâo brei mâo klei luč êlan blŭ hrăm, luč sa mta bruă ti dŭm anôk ngă hră mơar. Êngao kơnăn VNPT Dak Lak ăt dôk mkŏ mjing dŭm group đru leh anăn dŭm mrô hot line čiăng kơ jih jang dŭm anôk mâo sa mta klei truh, ăt msĕ mơh tơdah mnuih ƀuôn sang mâo klei kpăk srăng mâo klei đru, klei mgaih msir mtam”.