Hdră bruă bi liê rŭ mơ̆ng êlan dơ̆ng êran pral Bảo Lộc - Liên Khương găn 10 să, ƀuôn hgŭm čar Lâm Đồng, hmăi kơ êbeh 5.400 gŏ êsei mnuih ƀuôn sang leh anăn 14 êpul bruă, hŏng ênhă lăn brei hrui wĭt giăm 600 ha, hlăm anăn mâo lăn dôk, lăn lŏ hma, lăn dliê, lăn lĭng kahan. Dưi rŭ mdơ̆ng hlăm hruê 29/6, hlăm wưng bi mlih ba yua knŭk kna alŭ wăl dua gưl leh anăn bi mŭt čar, hdră bruă tlă anăp hŏng lu klei dleh dlan, gun kpăk. Ti să Ninh Gia, anôk mâo êbeh 100 gŏ sang mnuih ƀuôn sang hmăi kyua hdră bruă, Võ Hữu Xuân, Khua Knơ̆ng bruă sang čư̆ êa să brei thâo, klei dleh dlan tal êlâo să tuôm jing kƀah knuă druh thơ̆ng čiăng hlue ngă bruă tla hnô, ruh mgaih anôk ala:

 “Hdră kơ phung knuă druh thơ̆ng mơ̆ng Adŭ bruă duh mkra mbha amâo bi kna ôh kơ phung mă bruă. Hlăm hdră kčĕ pŏk ngă bruă klam čuăl mkkă ăt msĕ mơh jing ênoh lăn mâo lu klei dleh dlan. Ară anei gun hŏng bruă čuăl mkă mbĭt mơ̆ng să kyua anăn ka dưi pŏk ngă ôh bruă ti anăp čiăng mkŏ mjing hdră bruă wăl mkŏ mjing anôk dôk mrâo”.

Hlue si Nguyễn Thanh Chương, bi ala Anôk kriê dlăng hdră bruă bi liê mkŏ mjing čar Lâm Đồng, leh êbeh 1 mlan hdră bruă mphŭn rơ̆ mdơ̆ng, ăt jing êbeh 1mlan ba yua bruă sang čư̆ êa 2 gưl, dŭm hdră kčah djŏ tuôm kơ bruă msir mgaih anôk ala ka dưi ngă; lăn ala tti dŭm anôk êlan dơ̆ng êran pral bi mlih; bruă bi mklă ênoh lăn klă klơ̆ng, čih mkra hdră tla hnô, dŭm wăl anôk dôk mrâo… êmưt sơăi.

Nguyễn Thanh Chương brei thâo, mbĭt hŏng ruh mgaih klei gun kpăk hlăm bruă klam alŭ  wăl, čar Lâm Đồng ăt dôk akâo kơ Gưl dlông mđing mđĭ lar hdră êlan mdê hjăn kơ anôk mă mnơ̆ng hlăm gŭ lăn čiăng rơ̆ng hnơ̆ng mkŏ mjing êlan dơ̆ng êran pral Bảo Lộc - Liên Khương:

“Êlan dơ̆ng êran pral Bảo Lộc - Liên Khương kčah leh 11 anôk mmă mnơ̆ng hlăm gŭ lăn, hlăm anăn mâo 4 anôk săr dơr, 1 anôk mă čuah leh anăn  6 anôk mă lăn leh anăn boh tâo čiăng pŏk ngă hdră bruă. 11 anôk anei ba leh hlăm Hdră mtrŭn 106 mơ̆ng Bruă kƀĭn ala kơ klei lông ba yua klei bhiăn mdê hjăn kơ dŭm hdră bruă. Hdră mtrŭn 106 mâo klei dưn yua truh hruê 30/6, Knơ̆ng bruă Sang čư̆ êa čar Lâm Đồng mâo klei akâo kơ Knŭk kna leh anăn Bruă kƀĭn ala brei lŏ dơ̆ng bi kdung sui Hdră mtrŭn 106 srăng pral hĭn hlue ngă Hdră bhiăn mnơ̆ng hlăm gŭ lăn”.

 Hlue si Hdră kčah čar Lâm Đồng, hlăm wưng rŭ mdơ̆ng êlan dơ̆ng êran pral Bảo Lộc-Liên Khương jing 30 mlan. Čiăng rơ̆ng hnơ̆ng kčah, khua gĭt gai  Knơ̆ng bruă Sang čư̆ êa čar Lâm Đồng khăng lŏ dơ̆ng ksiêm dlăng, gĭt gai ruh mgaih klei gun kpăk kơ hdră bruă. Mbĭt anăn mđĭ phung knuă druh thơ̆ng gưl čar trŭn đru kơ gưl să; mjêč mkŏ mjing Anôk bruă kriê dlăng hdră bruă êlan dơ̆ng čar, Anôk bruă mđĭ kyar keh lăn čar, Anôk bruă kriê dlăng hdră bruă lŏ hma čar… čiăng ngă dŭm boh phŭn thơ̆ng. Hồ Văn Mười, K’iăng Khua dlăng bruă Đảng čar, Knơ̆ng bruă Sang čư̆ êa čar Lâm Đồng, brei thâo, hŏng dŭm hdră bruă phŭn ti čar, hlăm anăn mâo hdră bruă êlan dơ̆ng êran pral Bảo Lộc - Liên Khương, ruh mgaih anôk ala dưi bi mklă jing hdră msir phŭn:

 “Hmei bi mĭn nanao kơ bruă anei. Hdră msir anăn jing bruă hâo hưn, mtô mblang kơ mnuih ƀuôn sang thâo săng kơ dŭm hdră bruă phŭn, dŭm êlan êlan dơ̆ng êran pral anei srăng ba ya klei tŭ dưn kơ mnuih ƀuôn sang tơdah tla hnô, ruh mgaih anôk ala brei bi djŏ guôp. Hmei ăt kčĕ hŏng khua gĭt gai bruă Đảng čar brei mkŏ mjing Anôk bruă gĭt gai msir mgaih dŭm hdră bruă phŭn, hlăm anăn mâo mkŏ mjing Anôk bruă gĭt gai ruh mgaih anôk ala leh anăn kčĕ hŏng khua dlăng bruă Đảng čar srăng jing Khua Anôk bruă anei leh anăn srăng kčĕ kơ phung mă bruă hlăm Anôk dlăng bruă Đảng čar hlămm ai tiê grăp čô brei đua klam ktuê dlăng, ksiêm dlăng gĭt gai bruă ruh mgaih anôk ala”.

Msir mgaih klei dleh dlan, gun kpăk hlăm klei bi mlih, ƀa yua knŭk kna 2 gưl, čar Lâm Đồng dôk kƀĭn ruh mgaih klei gun kpăk kơ hdră bruă phŭn čiăng mđĭ bruă duh mkra - ala ƀuôn đĭ kyar. Hjăn hŏng Hdră bruă bi liê rŭ mdơ̆ng êlan dơ̆ng êran pral Bảo Lộc - Liên Khương, dŭm knơ̆ng, dhar bruă mơ̆ng čar leh anăn 10 să, ƀuôn hgŭm anôk êlan dơ̆ng êran pral găn srăng kƀĭn jih hnơ̆ng kơ bruă ruh mgaih anôk ala. Bi ala kơ Phung bi liê kơ êlan dơ̆ng êran pral Bảo Lộc - Liên Khương brei thâo, truh mlan 10 ti anăp srăng bi leh bruă mă ƀom, min. Bruă ksiêm dlăng mkra mjing, ruah phung rŭ mdơ̆ng êlan dơ̆ng êran pral hlăm boh sĭt.