Hluê anăn, Anôk kriê dlăng bruă Đảng čar Dak Nông bi mklă, bi mŭt mbĭt Anôk kriê dlăng klei hâo hưn čar lehanăn Anôk bruă đru čung ba mnuih ƀuôn sang čar jing Anôk bruă kriê dlăng klei hâo hưn lehanăn Đru čung ba mnuih ƀuôn sang mơ̆ng čar Dak Nông dơ̆ng mơ̆ng hruê 1/3. Lê Văn Chiến mâo ruah ngă Khua Anôk bruă. Mbĭt hŏng bruă mjưh hdră mă bruă mơ̆ng bruă Đảng dŭm anôk bruă lehanăn hdră duh mkra, čar Dak Nông mkŏ mjing bruă Đảng dŭm anôk bruă hlăm Đảng čar Dak Nông lehanăn bruă Đảng anôk bruă sang čư̆ êa čar Dak Nông.

Lưu Văn Trung, Kơiăng khua bruă Đảng čar, Khua Êpul gơ̆ng bruă ƀuôn sang čar dưi ruah ngă Khua bruă Đảng dŭm anôk bruă hlăm Đảng čar Dak Nông. Hồ Văn Mười, Khua Anôk bruă sang čư̆ êa čar Dak Nông păn ngă Khua bruă Đảng Anôk bruă sang čư̆ êa čar Dak Nông. Anôk kriê dlăng bruă Đảng čar Dak Nông bi mklă brei Nguyễn Thị Thu Hường, Khua anôk ksiêm dlăng bruă mă hlăm čar păn ngă Kơiăng khua Anôk mkŏ mjing bruă Đảng čar mơ̆ng hruê 15/2/2025. Brei Đỗ Tấn Sương – Khua Anôk bruă sang čư̆ êa ƀuôn prŏng Gia Nghĩa nao mă bruă ti Knơ̆ng ksiêm dlăng bruă mă hlăm čar čiăng kơ Anôk bruă sang čư̆ êa čar Dak Nông ruah păn ngă Khua knơ̆ng bruă./.