Čih mkra klei hâo mdah dŭm ênoh čuăn bruă duh mkra yuôm bhăn mơ̆ng čar Daklak hlăm wưng thŭn 2025-2030. Msĕ si kơ klei mđĭ kyar bruă duh mkra mơ̆ng 11,5% grăp thŭn kơ dlông, hrui wĭt kah knar grăp čô mnuih thŭn 2030 truh 160 êklăk prăk, bruă lŏ hma đĭ kyar 6,84%/thŭn, bruă duh mkra rŭ mdơ̆ng đĭ 18,1%; klei bi mnia mblei đĭ 11,25%.

Đru mguôp klei blŭ ti anôk bi kƀĭn, Đào Tấn Lộc, Khua bruă Đảng čar Phú Yên êlâo dih lač, mâo dŭm ênoh čuăn adôk prŏng đei kbưi hŏng klei jing sĭt, boh nik hlăm klei dôk găn ară anei:

 “Klei đĭ kyar bruă lŏ hma 6,84% tui si kâo anăn jing prŏng đei, kyudah ka tuôm mâo ôh ênoh snăn, êgao hĭn kơ anăn bruă lŏ hma drei dôk knang lu đei kơ yan adiê, lehanăn kơ klei bi mnia mblei, drei ka dưi mghaih msir ôh kơ dua mta anăn. Lehanăn klei đĭ kyar bruă duh mkra, bruă rŭ mdơ̆ng jing 18,1% ăt jing ênoh prŏng mơh. Tơdah klei gĭr hlăm bruă rŭ mdơ̆ng êgao ênoh kčah, ƀiădah klei duh mkra anăn dôk jưh knang đei kơ prăk duh bi liê mơ̆ng yang ƀuôn.”

Ksiêm wĭt kơ bruă čih mkra hră mơar kơ klei bi kƀĭn, Cao Đức Khiêm, K’iăng khua bruă Đảng čar Daklak êlâo dih lač, tŭ ư hŏng 17 ênoh čuăn, 5 bruă čuan kơ klei ngă bruă, lehanăn 3 hdră êlan kñăm bluh đĭ. Siămdah, ñu lŏ mnă kơ hdră êlan mđĭ kyar mnuih mă bruă bi mâo mnuih mâo klei thâo:

 “Kâo ƀuh diih knŏng mrâo mđing kơ knuă druh kiă kriê, ka mđing sĭt ôh kơ mnuih mă bruă jing phung kỹ sư, mnuih mă bruă mâo klei thâo kjăp, truăn kơ bruă knuă, kñăm păn kjăp ngăn prăk mơ̆ng FDI. Tal dua jing kơ bruă nah gŭ, tinei ƀuh adôk êdu êdi, năng lŏ thiăm mbŏ hlăm hdră êlan čuăl mkă mơ̆ng čar, msĕ si kơ alŭ wăl duh mkra, anôk tuh tia mâo hnơ̆ng prŏng, mâo hdră êlan kjăp sĭt hlăm djăp mta.”

Klei bi kƀĭn mâo tŭ mă leh truh 11 klei blŭ, mâo 5 klei čih mkra hlăm hră mơar, lehanăn mâo 6 klei blŭ bi êdah ti anôk bi kƀĭn anăn mtam. Ngă bruă mă klei blŭ ti anôk bi kƀĭn, Nguyễn Đình Trung, khua hlăm êpul gĭt gai bruă Đảng gưl lông, Khua bruă Đảng čar, Khua kiă kriê bruă čih mkra hră mơar kơ klei bi kƀĭn prŏng Đảng čar Daklak gưl 18 brei thâo, êpul ngă bruă srăng tŭ mă lehanăn ksiêm bi nik jih jang klei blŭ:

“Hmei srăng lŏ dơ̆ng hrui mă jih hnơ̆ng lehanăn ngă djăp mta bruă bdjŏ hŏng hdră mtrŭn klei bi kƀĭn prŏng, lehanăn ngă kơ bruă kiă kriê mơ̆ng dŭm gưl bruă Đảng, Êpul gơ̆ng bruă ƀuôn sang, knơ̆ng bruă sang čư̆ êa, pioh hlue ngă jih jang bruă čuăn mơ̆ng Daklak bi jăk hĭn. Leh klei bi kƀĭn, čar čiăng lŏ dơ̆ng tŭ mă jih jang klei blŭ mơ̆ng phung bi ala, lehanăn hmei mâo klei mđing êdi kơ kleianăn.”