Boh tŭ ksiêm dlăng bruă msir klei akâo mơ̆ng phung bi ala kơ mnuih ƀuôn  sang mơĭt kơ klei bi kƀĭn tal 9, Bruă kƀĭn ala gưl 15; boh tŭ drông mnuih ƀuôn sang, msir hră mơar leh anăn  msir mgaih klei kčŭt hưn mơ̆ng mnuih ƀuôn sang thŭn 2025. Sa hlăm dŭm boh phŭn yuôm bhăn mâo phung bi ala Bruă kƀĭn ala mđing jing dŭm hdră msir êdah êdi čiăng gang mkhư̆ tŭ dưn hĭn hlăm wưng kơ anăp.

Phung bi ala bi mklă, thŭn 2025, bruă gang mkhư̆ klei ƀơ̆ng ngăn mâo klei tŭ dưn klă sĭt. Bruă thâo ƀuh, msir klei ƀơ̆ng ngăn, amâo jăk hlăm bruă ksiêm dlăng, ksiêm yap lŏ dơ̆ng mđĭ ktang, Bruă hiu duah, phat mkra klei ƀơ̆ng ngă dưi ngă djŏ si hdră bhiăn. Lu klei ƀơ̆ng ngăn prŏng dưi hlue ngă hlue si klei kčah mtrŭn mơ̆ng hdră bhiăn. Lu klei ƀơ̆ng ngă ngă boh jhat kjham snăk lŏ dơ̆ng msir mgaih; klei ngă soh lu phung knuă druh, hlăm anăn mâo khua gĭt gai hlăm Phŭn bruă kđi čar, Anôk bruă kriê dlăng dưi bi mklă. Bruă hrui mă ngăn drăp ƀơ̆ng ngăn hlăm wưng ksiêm dlăng mâo klei tŭ dưn jăk. Phung bi ala lŏ dơ̆ng mâo hdră msir mđĭ ksiêm dlăng klei dưi, gang mkhư̆ klei ƀơ̆ng ngăn mơ̆ng kbưi.