Blŭ hrăm ti Anôk bi kƀĭn, Khua knŭk kna Phạm Minh Chính brei thâo, giăm 2 mlan êgao, Knŭk kna, Khua knŭk kna mbĭt hŏng dŭm Phŭn, dhar bruă, alŭ wăl ktuê hang ksĭ hluê ngă leh kjăp bruă bi kdơ̆ng hŏng klei tlĕ mă kan hdang IUU hŏng mta kñăm “Gĭr bi kdơ̆ng kjăp hŏng hdră trah mă IUU, gĭr ruh mtlaih “Hră kñĭ” mơ̆ng EC hŏng bruă mă kan Việt Nam hlăm thŭn 2025.

Khua knŭk kna mtă brei mđing čih mkra hră hâo mdah hluê klei ba mdah mơ̆ng EC, tơdah klei hâo mdah ka dưi ksiêm dlăng, brei bi mklă bruă klam klă klơ̆ng. Lač klă dŭm bruă anăn srăng ngă hlăm wưng bhiâo amâo dah sui, hlei ngă, si srăng ngă, čiăng dưi mâo mta kñăm knhal jih thŭn 2025 dưi lui hră kñĭ mơ̆ng EC. Mbĭt anăn, Khua knŭk kna lač mta kñăm amâo djŏ knŏng čiăng lui hră kñĭ mơ̆ng EC ƀiădah yuôm bhăn hĭn jing mđĭ kyar anôk bruă kan hdang mơ̆ng Việt Nam, kriê dlăng hră trah mă, thâo klă phŭn gha lehanăn ngă bruă mâo klei đua klam, jih jang kyua kơhưm mơ̆ng ala čar, mơ̆ng djuê ana, kyua klei tŭ dưn kơ mnuih ƀuôn sang./.