Klei bi lông đeh kphê Việt Nam srăng mkŏ mjing hlăm hruê 10/3/2025, hưn mdah boh tŭ leh anăn mđup brei klei pah mni hlăm hruê 13/3/2025, djŏ gưl mkŏ mjing Knăm mơak kphê Ƀuôn Ama Thuôt tal 9. Phung nao bi lông jing mnuih Việt Nam mơ̆ng 18 thŭn kơ dlông, dôk hdĭp mda leh anăn mă bruă ti Việt Nam. Phung bi lông srăng găn dŭm boh phŭn bi lông, mâo: mă asăp kphê pioh đeh; hriăm yua masin đeh; mâo hdră kčah đeh leh anăn hră lač kơ mnâo mnơ̆ng dhơ̆ng; đeh kphê…

Trịnh Đức Minh-  Khua Êpul hgŭm kphê Ƀuôn Ama Thuôt, čar Dak Lak dôk gĭr ktưn mđĭ kyar Ƀuôn Ama Thuôt jing ƀuôn prŏng kphê dlông rŏng lăn, êngao kơ bruă bi mklă hnơ̆ng ênhă, hnơ̆ng mnơ̆ng dhơ̆ng snăn hnơ̆ng jăk, mnâo kphê leh mkra mjing brei dưi mđing uêñ. Mơ̆ng klei tŭ jing klei bi lông tal sa, hlăm klei bi lông thŭn anei, Êpul hgŭm lŏ dơ̆ng mâo lu klei mlih mrâo čiăng kơ phung đeh kphê mâo klei găl bi êdah klei thâo pô. Mbĭt anăn, mjing mnơ̆ng dhơ̆ng kphê mkra mjing êlam mâo hnơ̆ng jăk, mpŭ kơ ênoh yuôm kphê hlăm klei đeh kphê. Trịnh Đức Minh brei thâo:

 “Klei bi lông thŭn anei kơ hdră mkŏ mjing prŏng hĭn, jiă kma êpul êya lu hĭn. Tal 2m brei puăng kčŏk kphê dưi brei puăng hlue si mta mrâo mơ̆ng hnơ̆ng čuăn mơ̆ng SCA (Êpul hgŭm kphê jăk lu ala čar) leh anăn CQI (Anôk bruă hnơ̆ng jăk kphê -ti Mi). Tal 3 jing iêô phung thơ̆ng kơ bruă ala tač êngao gưl dlông ksiêm dlăng hnơ̆ng jăk kphê jiă kma êlam êdah êdi kơ kphê čiăng iêô jak phung khăp kơ kphê truh hŏng anôk thơ̆ng kơ kphê”.

Việt Nam ba anăp kơ kphê Robusta jăk mơ̆ng dlông rŏng lăn snăn ăt mâo phung đeh kphê mbruă hĭn dlông rŏng lăn. Anei jing klei čang hmăng phung khua gĭt gai Êpul hgŭm kphê Ƀuôn Ama Thuôt, anôk bruă gĭt gai klei rang mdah đeh kphê Việt Nam 2025. Leh 2 mlan pŏk ngă, klei bi lông leh anăn mâo klei hâo hưn mơ̆ng 36 čô mơ̆ng 13 čar leh anăn ƀuôn prŏng čih anăn hgŭm, hlăm anăn čar Dak Lak leh anăn ƀuôn prŏng Hồ Chí Minh mâo lu phung čih anăn hĭn.

 Klei mdê mơ̆ng klei bi lông anei mkă hŏng klei bi lông đeh kphê lu ala čar jing yua kphê Arabica leh anăn Robusta Việt Nam. Phung bi lông đeh jing kphê Pour Over (sa klei kar kphê hŏng kngan mâo mnâo kphê jăk hĭn) leh anăn kar hŏng phĭn. Mbĭt anăn, brei klă bi raih 3 klei thâo: ksiêm dlăng bi jăk hnơ̆ng kphê asăr, đeh leh anăn kar. Hlăm anăn, năng mđing jing brei puăng kơ kčŏk kphê srăng dưi brei hlue si hnơ̆ng kčah mrâo mơ̆ng SCA (Êpul hgŭm kphê jăk lu ala čar) leh anăn CQI (Anôk bruă hnơ̆ng jăk kphê -ti Mi).

Hlue si Lê Đức Huy,  K’iăng Khua Êpul hgŭm kphê Ƀuôn Ama Thuôt, klei bi lông đeh kphê Việt Nam amâo djŏ knŏng jing anôk bi kƀĭn phung khăp, jih ai tiê hŏng kphê čiăng bi kah mbha klei thâo ôh, mjing anôk mkŏ mâo klei iêô jak, bi lar klei khăp kơ kphê ôh ƀiădah lŏ jing hdră mđĭ ênoh yuôm kơ kphê Việt Nam. Lê Đức Huy brei thâo:

 “Čiăng mđĭ kyar hơĭt kjăp anôk ba čhĭ amâo djŏ knŏng drei mđĭ kyar mkăp ôh ƀiădah brei lŏ mđĭ kyar klei ba yua. Việt Nam bi mklă leh pô jing ala čar mkra mjing Robusta prŏng hĭn mơ̆ng dlông rŏng lăn leh anăn pô ba anăp leh kơ kphê

Robusta jăk dlông rŏng lăn snăn ăt brei pô mâo phung đeh kphê mbruă hĭn dlông rŏng lăn”.

Dưi lač, klei bi lông đeh kphê Việt Nam 2025 jing sa bruă ngă klă sĭt leh anăn yuôm bhăn mđĭ kyar bruă kphê hlue si hdră thơ̆ng leh anăn kjăp. Anei amâo djŏ knŏng jing klei găl čiăng mpŭ kơ phung thâo đeh kphê ôh ƀiădah lŏ jing knhuang yuôm bhăn hlăm hdră mđĭ hnơ̆ng kphê Việt Nam.

Êngao kơ klei bi lông hđeh kphê, hlăm jar Knăm mơak kphê Ƀuôn Ama Thuôt tal 9 thŭn 2025, Êpul hgŭm kphê Ƀuôn Ama Thuôt lŏ mkŏ mjing thiăm bruă ngă čiăng iêô jak phung tue msĕ si: Klei bi lông The Art Amazing Cup 2025 kơ phung khăp kar kphê jăk siam, hlăm hruê 11/3 leh anăn Talkshow hŏng akŏ “Ƀuôn Ama Thuôt anôk truh mơ̆ng kphê dlông rŏng lăn” hŏng lu phung hlak mblang mâo kơhưm./.