Hruê mbruê 7/8, Phŭn bruă mtô mjuăt leh anăn bi hriăm mkŏ mjing klei kƀĭn trông êlan online hluê ngă hdră bi lông ktưn “Kluôm lăn čar bi lông ktưn mlih mrâo hŏng klei mbruă leh anăn bi mlih mrô” leh anăn hdră bruă “Mnuih ƀuôn sang hriăm kơ bruă mrô”. Klei kƀĭn trông dưi mkŏ hŏng hlăm brô 600 anôk bi kƀĭn mơ̆ng dŭm knơ̆ng bruă mtô mjuăt leh anăn bi hriăm, dŭm anôk bruă sang hră gưl prŏng leh anăn anôk mtô kơ bruă mă hlăm lăn čar.

Blŭ hrăm mtrŭt mjhar hdră bruă bi lông ktưn, K’iăng khua phŭn bruă mtô mjuăt leh anăn bi hriăm Nguyễn Văn Phúc mñă klă, bi mlih mrô hlăm bruă sang hră mơar pŏk dŭm klei găl ka tuôm mâo čiăng mđĭ hnơ̆ng tŭ jăk bruă mtô leh anăn hriăm, bi mlih mrâo hdră êlan mtô bi hriăm, mjing bruă grăp čô hlăm klei hriăm, pŏk klei găl dưi hriăm kơ grăp čô mnuih ƀuôn sang. Čiăng kơ hdră bruă dưi mâo boh tŭ dưn hĭn, kluôm dhar bruă srăng kñăm ngă jăk 8 mta knăm, hlăm anăn mâo mđĭ hĭn klei mtô kơ bruă mrô leh anăn klei ksiêm duah klei kreh knhâo kơ phung hđeh sang hră, phung hriăm gưl prŏng. Hlăm klei kƀĭn trông, bi ala dŭm anôk bruă sang hră, knơ̆ng bruă sang hră mơar ăt kah mbha dŭm klei hriăm hluê ngă dŭm mta phŭn, hdră êlan kơ klei mlih mrô leh anăn mnuih ƀuôn sang hriăm kơ bruă mrô, mbĭt anăn bi êdah dŭm hdră êlan čiăng kơ klei hluê ngă dua hdră bruă bi lông ktưn ƀrư̆ hruê ƀrư̆ klă klơ̆ng hŏng bruă mtô mjuăt bi hriăm ti nah gŭ.