Aguah 19/5, Bruă Đảng Kon Tum mkŏ mjing Klei bi kƀĭn ksiêm wĭt 10 thŭn hlue ngă  asăp mtrŭn mrô 05 mơ̆ng Phŭn bruă kđi čar gưl XII “kơ mđĭ ktang klei hriăm, hlue ngă klei mĭn, knhuah mngač Hồ Chí Minh”.  Mơ̆ng 10 thŭn pŏk ngă, čar hlue ngă leh klă klơ̆ng mta phŭn djŏ hŏng boh sĭt, bruă klam grăp wưng. Dŭm gưl, dhar bruă mkŏ mjing leh 2.760 gru hmô jăk, hdră ngă mbruă, tŭ dưn, lar bra êlam bruă tui hriăm leh anăn hlue ngă klei Awa bi hmô hlăm êpul bruă Đảng leh anăn êpul êya mnuih ƀuôn sang. Hlăm klei bi kƀĭn,  Bruă Đảng čar Kon Tum bi mni, mđup brei hră bi mni mơ̆ng Khua dlăng bruă Đảng čar leh anăn hră bi mni mơ̆ng Khua Knơ̆ng bruă sang čư̆ êa čar kơ 30 êpul, 46 čô mâo klei tŭ êdah êdi. Anei jing gưl kơ kluôm čar lŏ dơ̆ng bi mklă bruă klam, klei sĭt hlăm bruă hlue ngă asăp Awa, mkŏ mjing Đảng leh anăn mđĭ kyar alŭ wăl.

Ăt hlăm aguah mbruê 19/5, Êpul khua bruă êdam êra čar Lâm Đồng mkŏ mjing klei kƀĭn trông ksiêm wĭt 10 thŭn hluê ngă ađăp mtrŭn mrô 05 mơ̆ng Phŭn bruă kđi čar gưl 12, mbĭt anăn pah mni phung êdam êra êda êdi hluê ngă asăp Awa thŭn 2025. Dŭm thŭn êgao, čar Lâm Đồng ngă leh tŭ dưn lu hdră bruă êdam êra dŭm gưl hŏng ênoh êbeh 75 êklai prăk, hlăm anăn mâo 45 hdră bruă gưl čar, 446 hdră bruă gưl kdriêk leh anăn êbeh 8.400 hdră bruă, kdrêč bruă gưl nah gŭ. Lâm Đồng lŏ rơ̆ng kơ 160 klei bi hmô êpul hgŭm bruă, êpul răng mgang wăl hdĭp mda, iêo jak êbeh 4000 čô êdam êra nao hgŭm. Hlăm 10 thŭn, Bruă êdam êra čar pah mni 380 êpul bruă, grăp čô êdah êdi leh anăn bi mŭt êbeh 5.800 čô êdam êra êdah êdi hlăm Đảng Cộng sản Việt Nam.

Aguah 19/5, Knơ̆ng bruă sang čư̆ êa čar Dak Nông mkŏ mjing Knăm pŏk ngă “Tết pla kyâo hdơr nanao kơ Awa Hồ” leh anăn pŏk ngă hdră kčah pla dliê thŭn 2025. Hlăm anôk bi kƀĭn, khua gĭt gai čar iêô mthưr jih jang anôk bruă,alŭ wăl leha năn mnuih ƀuôn sang mđing kơ klei Awa mtô : “Kyua klei tŭ dưn pluh thŭn pla kyâo, kyua klei tŭ dưn êtuh thŭn bi hriăm mnuih”. Leh knăm pŏk ngă, phung bi ala pla leh 1.300 ana hngô 3 pŏk hla ti krĭng čuăl mkă mtah hlăm Hdră bruă nah gŭ Dak Nút, ƀp Gia Nghĩa.  Hlăm wưng anăn mơh, dŭm alŭ wăl kluôm čar ăt hrăm mbĭt mkŏ mjing knăm pŏk ngă leh anăn trŭn ngă bruă pla kyâo. Thŭn anei, čar Dak Nông kčah hdră kñăm mđĭ kyar êbeh 1.700 ha dliê.